LISIN 4
¿Jisas Kraist ba ya sa ki?
1. ¿Jisas rayaka ba nahki tâ krikan?
¿Dîa muni upla nani ba Jisas lamara kaia want kan? (MATIU 11:29; MARK 10:13-16.)
Jisas upla nani baku apia kan. Witin heven ra spirit uplika kum baku iwi kan naha tasba ra kau aisubi takras kan piua ra (Jan 8:23). Jisas ba Gâd paskanka pas bara witin ai Aisa ra hilp munan diara nani ba paskaia dukiara. Jehova Gâd bui Jisas ra paskan. Baha mita, Jisas ra “Aisa Luhpia kumi” ba mâkisa (Jan 1:14). Jisas Gâd dukiara aisi kan. Baha mita, witin ra “Bîla ba” mâkisa. Sins Lâka 8:22, 23, 30, ALM bara Kolosi 1:15, 16 aisi kaiks.
2. ¿Dîa muni Jisas naha tasba ra balan?
Gâd ai Luhpia rayaka ba brih Ju tiarika kum kau waitna wal prawras kan ba ra plauya ra mangkan. Naha mairka nina ba Meri. Baha mita, Jisas aisika ba waitna kum naha tasba wina apia kan (Luk 1:30-35). Jisas naha tasba ra balan: 1) Gâd tânka kasak ba smalkaia dukiara, 2) witin sampla pain kum mangkan yawan traika kaikanka tilara kabia sin Gâd kupia lâka daukaia, bara 3) witin rayaka kasak ba “pri sakaia mana baku yabaia”. Matiu 20:28 aisi kaiks.
3. ¿Dîa muni pri wan sakaia kan?
Pri sakaia ba tânka sa upla kum ra prura mihta wina swaki sakaia (Impakan Sturka 21:29, 30). Gâd lukras kan upla nani dukiara prura bara almuk takaia lâka ba. ¿Yawan baha nahki nu sa? Gâd Adam ra win witin “saurka” ba daukbia kaka, prubia. Adam saurka daukras kan kata, pruaia apia kan (Blasi Sturka 2:16, 17; 5:5). Baibil ra aisi ba baku, Adam tâka ba mita prura ba naha tasba ra “balan”. Baha wina, Adam ai saurka ba ai luhpia nani ra laki yaban. Baha mita, yawan pruisa. Yawan pri sakan lâka ba nit kan Adam saurka wan wîna ra bri ba pri takaia dukiara, bara baku yawan prubia apia. Roman 5:12 bara 6:23 aisi kaiks.
¿Ya pri wan sakaia mana aibapaia kan prura wina swaki wan sakaia dukiara? Yawan pruya taim, silp wan saurka nani sut aibapisa. Sakuna upla kumi sin upla wala saurka dukiara aibapaia sip apia sa. Lawana 49:7-9 aisi kaiks.
4. ¿Dîa muni Jisas ba pruan?
Jisas ba yawan baku apia kan. Witin saurka luha kan. Baha mita, diara saura kum daukan ba tâwan pruras kan. Sakuna, upla nani saurka mana aibapaia dukiara pruan. Gâd ai latwanka lâka tara upla nani ra marikan mita ai Luhpia yawan dukiara blikan. Jisas sin ai latwanka lâka marikan, kan ai Aisa bîla walan bara ai rayaka wan saurka mana aibapaia dukiara yaban. Jan 3:16 bara Roman 5:18, 19 aisi kaiks.
¿Dîa muni Jisas pruan? lilkika ba kaiks.
5. ¿Jisas naiwa piua ra dîa daukisa?
Jisas naha tasba ra kan piua ra upla siknis nani ra rakan, upla pruan nani ba bukan, bara upla trabil tara bri kan nani ra hilp munan. Baha natka ra witin marikan naika piua ra upla bîla wawalra nani ba dukiara dîa daukbia ba (Matiu 15:30, 31; Jan 5:28). Jisas pruan ningkara, Gâd mita spirit uplika kum baku bukan (1 Pita 3:18). Baha wina, Jisas Gâd mihta aihkika ra wih iwi bîla kaiki kan. Jehova Jisas ra karnika yaban naha tasba ra king aimakaia dukiara (Hibru Nani 10:12, 13). Naiwa piua ra Jisas ba King kum sa heven ra, bara witin nina blablikra nani ba tasba aiska ra sturi yamni nani ba smalkisa. Daniel 7:13, 14 bara Matiu 24:14 aisi kaiks.
Tisku pali Jisas ai karnika ba yus munbia pât wahwanka nani âpu daukaia dukiara. Ya witin ra kasak lukbia ba bara witin bîla walbia kaka, liliakira naha tasba ra paradais kum ra iwbia. Lawana 37:9-11 aisi kaiks.
