Sturi yamni ba Jehova wina aula. Witin ba Gâd kum lilia sa bara want sa upla nani ba lilia iwbia (1 Timoti 1:11). Gâd marit lâka ba paskan. Lâ kat marit takaia ba hilp wan munisa pamali lilia kum briaia dukiara. Baku sin tuktan nani ra kan kahbisa. Kristian nani ba gabamint lâka nani ba kulkaia sa bara lâ kat marit takaia. Luk 2:1, 4, 5 aisi kaiks.

¿Marit lâka ba Gâd ba nahki kaikisa? Witin want sa marit lâka ra waitna mairin kum wal ban kabia. Jehova want sa marit nani ba pana pana kasak kabia (Hibru Nani 13:4). Gâd ba dibors lâka misbara kaikisa (Malaquías 2:16). Sakuna Witin swisa kristian kum dibors takbia witin maritka ba rug lâka ra kauhan sa kaka baman. Matiu 19:3-6, 9 aisi kaiks.

Jehova waitna bara mairin ba paskan marit lâka ra wark sât sât daukbia dukiara (Blasi Sturka 2:18). Pamali lalka ba ai pamalika ra dîa nitka bri ba yabisa bara witin nani ra Gâd dukiara smalkisa. Witin ai dukiara baman lukaia apia sa. Kau ni ai maritka ra latwan kaikaia sa. Marit nani ba pana pana latwan kaiki rispik munaia sa. Witin nani ba mistik kira sa, baha mita ai saurka nani pana pana ban swih tikbia kaka lilia iwbia. Epesus 4:31, 32; 5:22-25, 33, bara 1 Pita 3:7 aisi kaiks.

Maritkam lâka ra trabil brisma kaka, wâlsut wark takaia sa, pana pana latwan lâka ba marikaia dukiara (1 Korint 13:4, 5). Baibil ba dakwi takaia lâka ba tâ baikras  marit lâka ra trabil bahki nani wapni mangkaia dukiara. 1 Korint 7:10-13  aisi kaiks.

Jehova want sa luhpa nani ba lilia kabia. Witin sanska maikisa rayakam ra lilia lâka brima dukiara. Gâd ba want sa man aisikam yaptikam wina diara tânka bara sins lâka ba lan takma (Kolosi 3:20). Gâd ai brinka sa man Papaskrikam dukiara bara ai Luhpia dukiara sin wark takma. Smasmalkra 11:9–12:1 bara Matiu 19:13-15; 21:15, 16 aisi kaiks.

Aisa yapti nani ba wark karna takaia sa, ai luhpia nani ra kwala, plun bara utla yabaia dukiara (1 Timoti 5:8). Sakuna luhpiam nani lilia lâka briaia dukiara witin nani ra Gâd ra latwan kaikaia bara Witin dukiara smalkaia (Epesus 6:4). Man Gâd ra latwan kaikisma kaka witin nani kupia nikbia baha daukaia. Bara Baibil wina smalkankam nani ba sakisma kaka witin nani natka pain kum ra hilp munma. Kli Smalkanka 6:4-7 bara Sins Lâka 22:6 aisi kaiks.

Luhpiam nani ra kupia buki bîla bara pain dauki ba wisma kaka, lilia kabia. Baku sin wapnika mangkaia lâka nit sa. Baha ba witin nani ra hilp munisa daukanka saura nani wina sait ra kaia bara ai liliaka lâka briaia (Sins Lâka 22:15). Sakuna wapni mangkaia lâka ba karna bara praut lâka wal daukaia apia sa. Kolosi 3:21 aisi kaiks.

Jehova Witniska nani ba pamali nani dukiara buk sât sât ulbi sakisa. Naha bukka nani ba Baibil wina sakan sa. Lawana 19:7, 11 aisi kaiks.