LISIN 10
¿Rilidian rait aihwa ba nahki pliki sakaia sip sa?
1. ¿Rilidian rait aihwa kum bâra sa ki?
“Aman kaiks, witinka nani Gâd prapitka wisi kuninkira nani ba.” (MATIU 7:15.)
Jisas ai nina blablikra nani ra rilidian kumi baman dukiara smalkan, rait aihwa rilidianka ba. Naha ba yabal kum baku sa. Bara raya ban kaia lâka ra wan brih wisa. Jisas win: ‘Upla wiria baman naha yabalka sakisa’ (Matiu 7:14). Ani rilidianka Baibil dîa wi ba kat smalkisa kaka, Gâd yamni kaikisa. Gâd ra mayuni uplika nani sut ba sim kasakka lukan lâka brisa. Jan 4:23, 24; 14:6 bara Epesus 4:4, 5 aisi kaiks.
2. ¿Jisas dîa win kristian kuninkira nani dukiara?
‘Witin nani wisa Gâd ra kakaira sa, sakuna ai daukanka nani baku apia sa.’ (TAITUS 1:16)
Jisas maisa pakan prapit kuninkira nani ba rait aihwa kristianka lâka ba tâski daukbia. Ban kra witin nani ba rait aihwa kristianka nani wal talia sa. Baku sin, witin nani wisa rait aihwa kristianka lâka nina blikisa. Sakuna witin nani dîa sât uplika ba ai daukanka nani bâk kaikaia sip sa. ¿Nahki muni? Rait aihwa kristianka nani baman ai daukanka bara ai rayaka pain bri ba mita kristian lâka kasak ba marikisa. Matiu 7:13-23, TNM aisi kaiks.
3. ¿Kristian rait aihwa nani ba nahki pliki sakaia sip sa?
Kaisa naha daukanka matsip ba laki kaikaia:
-
Baibil ba Gâd Bîla baku kaikisa. Witin nani trai munisa Baibil dîa wi ba kat iwaia. Baha mita, rilidian rait aihwa ba upla lukanka nina blikras, sakuna rilidian kuninkira lika baku daukisa (Matiu 15:7-9). Kristian rait aihwa nani ba diara sut smalki ba ai rayaka ra alki daukisa. Jan 17:17 bara 2 Timoti 3:16, 17 aisi kaiks.
-
Jehova nina ba kulkanka tara yabisa. Jisas ba Gâd dukiara smalkan. Baha natka ra tara kulkan. Witin upla ra hilp munan Gâd nina ba kakaira takbia. Baku sin, witin nani ra win ai pura suni kabia taim Gâd nina ba holi kulkan kabia makabaia kan (Matiu 6:9). Man iwisma pliska ra, ¿ani rilidianka ba Gâd nina ba upla ra smalkisa? Jan 17:26, LRW bara Roman 10:13, 14, TNM aisi kaiks.
-
Gâd Kingka lâka ba smalkisa. Gâd ba Jisas ra naha tasba ra blikan King lâka sturka yamni nani ba smalkaia. Gâd Kingka lâka baman upla trabilka nani wapnika mangkaia sip sa. Jisas pruan ba kat naha dukiara smalki kan (Luk 4:43; 8:1; 23:42, 43). Witin win ai nina blablikra nani Gâd Kingka lâka ba smalki kabia. Upla kum man ra Gâd Kingka lâka dukiara mai aisabia kaka, ¿ani rilidianka wina sa lukisma? Matiu 24:14 aisi kaiks.
-
Naha tasba daukanka saura nina blikras. Yawan witin nani ra pain kakaira takaia sip sa, kan pulitik bara war tilara dimras sa (Jan 17:16; 18:36). Baku sin, naha tasba daukanka bara lukanka nani nina blikras. Jems 4:4 aisi kaiks.
-
Pana pana latwan lâka kasak ba marikisa. Witin nani Baibil wina lan takan nisan sut uplika nani ra rispik munaia. Rilidian kuninkira nani ba nisan nani war aiklabi ba tâ baikisa, sakuna kristian rait aihwa nani ba baku daukras sa (Maika 4:1-3). Kristian rait aihwa nani ba ai taimka sakisa bara diara sut bri ba yus munisa upla nani ra hilp munaia dukiara. Jan 13:34, 35 bara 1 Jan 4:20 aisi kaiks.
4. ¿Rilidian rait aihwa ba pliki sakaia sip sma?
¿Ani rilidianka ba ai smalkanka nani ba Baibil wina sakisa, Gâd nina ba tara kulkisa, bara upla nani ra smalkisa Gâd Kingka lâka baman wan trabilka nani wapnika mangkaia sip sa?¿Ani rilidianka ba latwan lâka marikisa, bara witin nani war aiklabaia tilara dimras sa? ¿Man dîa lukisma? 1 Jan 3:10-12 aisi kaiks.
