Rilidian sut tilara upla pain nani bâra sa. Naha uplika ba ra Jehova lulki swiras bara kulkanka yabisa. Sari sa wiaia, sakuna upla nani ba rilidian ninara diara saura ailal daukan sa (2 Korint 4:3, 4; 11:13-15). Rilidian nani ba upla nani ra sibrin dingki rau munisa, upla dakni tara nani ra ikan, war aiklabanka nani bara tuktan nani ra alki saura munan sturka wali ba tilara sa. ¡Naha walaia ba sari lâka tara yabisa upla wala nani ai lukanka pain bri ba ra! Matiu 24:3-5, 11, 12 aisi kaiks.

Rilidian rait aihwa ba Jehova ra kulkanka tara yabisa, sakuna rilidian kuninkira nani ba baku daukras sa. Gâd dahra bara upla pruan nani anira banhwi ba dukiara kunin aisisa, baku sin Baibil ra smalkanka nani takras ba upla ra smalkisa. Sakuna Jehova brinka sa upla sut ba Witin dukiara tânka kasak ba nu takbia. Isikiel 18:4, TNM bara 1 Timoti 2:3-5 aisi kaiks.

Rilidian kuninkira nani ba wisa Jehova ra latwan kaikisa, sakuna Jehova pain nu sa naha ba rait apia sa. Kan witin nani ba naha tasba Sitan karnika mununhtara ba ra latwan kaikisa (Jems 4:4). Baibil ra rilidian kuninkira nani sut ba “Babilon Tara” nina ba mâkisa. Noa piua ra Lisamra tara takan ningkara, Babilon tawanka ra rilidian kuninkira nani ba tâ krikan. Tisku pali, Gâd rilidian kuninkira nani tasba aiska ra saura muni ba sauhki tikbia. Param Marikanka 17:1, 2, 5, 16, 17 bara 18:8 aisi kaiks.

Jehova naiwa piua ra upla pain nani dukiara ban lukisa. Rilidian saurakira nani tilara kabia sin, baha tila wina wahbi sakisa. ¿Nahki natka ra? Tânka kasak ba smalki. Miqueas 4:2, 5 aisi kaiks.

Jehova ani uplika tânka kasak ba latwan kaiki bara ai daukanka pain bri ba ra Witin lulki swiras. Baha mita Witin kupia kraukisa rilidian kuninkira nani wina takaia sa. Ya uplika rait aihwa Gâd ra latwan kaiki ba wilin kabia ai rayaka ba sins munaia bara Gâd kupia lâka daukaia. Param Marikanka 18:4 aisi kaiks.

Patitara piua ra, apastil nani sturi yamni ba smalkan taim, upla ailal ba ai kupia aiska ni walan. Baha uplika nani ra Jehova mita lan daukan iwanka kum âuyapah lâka bara bîla kaikanka briaia. Baha uplika nani samplika kaiki yawan sin sturi yamni ba walaia sa bara wan rayaka ra Gâd Kingka lâka ba pas mangkaia sa. 1 Tesalonaika 1:8, 9 bara 2:13 aisi kaiks.

Ani uplika rilidian kuninkira swih tânka kasak alki dauki ba, Jehova naha uplika ra yamni kaikisa. Witin nani ba sip sa Gâd pânika takaia, tasba aiska ra muihni lakri nani latwanka lâka bara ban kaia ra iwaia bîla kaikanka brisa. ¿Naha sât yamnika nani ba brin mai daukisa? Mark 10:29, 30 bara 2 Korint 6:17, 18 aisi kaiks.

Jehova rilidian kuninkira ba sauhki tikbia taim naha tasba ra lilia lâka tara kabia. Rilidian kuninkira nani ba danh sip apia kabia upla nani ra kunin muni bara baiki sakaia. ¡Naha ba sturi yamni kum sa! Param Marikanka 18:20, 21 bara 21:3, 4 aisi kaiks.