Jehova want sa marit nani ba marit takan yua ra pramis munata ba alki daukbia. Pas waitna, bara pas mairin ra marit sakan taim, naku win: “Waitna ba [...] ai mairka ra asla prawbia, bara witin nani wal ai tanka brih, wal ai wîna kumi takbia”. Pyu luan ningkara, Jisas ba sim sturka aisisi, pura praki win: “Gâd mita asla prakan ba, upla mita dakbi sakaia apia  sa” (Blasi sturka 2:24; Matyu 19:3-6). Kaiki ba baku, Jehova Jisas wal lukisa, marit laka ba rayaka aiska dukyara sa, maîa kum pruya ba kat dan takisa (1 Korint 7:39). Asla prakanka na huli sa bamna, ban wina diara bahki tawan mahka swiaia apia sa. Au sika! Kan Baibil lâka kat apia diburs taki ba, Jehova misbara kaikisa (Malakai 2:15, 16).

Baibil wi ba kat, dia tawan lika upla diburs takaia sip sa ki? Wel, Jehova bui rug laka ba misbara misbara kaikisa (Blasi sturka 39:9; 2 Samyuil 11:26, 27; Lawana 51:4). Uba misbara kaiki ba mita, rug laka tawan lika upla diburs takaia sip sa wisa. (Saptika 9, baiki sakanka 7 ra, rug laka ba dia tanka sapa param aisisa.) Raitka pali ba, Gâd mita maîa pâtkas ba ra baman, ban marit kabia, apia kaka diburs takbia sapa selp luki daukbia raitka yaban sa (Matyu 19:9). Baha mita, maîa pâtkas ba diburs takbia kaka, Jehova mita saura kaikbia apia. Sakuna, kangrigisan tila wina kumi sin, upla diburs takbia tukbaia apia sa. Baku sin, diara kum kum taka mita, maîa pâtkas ba —wala ba rait ai kupia lakan sa kaikbia kaka—, ban kra ai maîa swiaia apia lukbia. Nahki kabia kra sin, maîa pâtkas ba —Baibil lâka kat diburs takaia raitka bri ba— sika, selp luki dauki ai twilkanka brihwaia sa (Galesha 6:5).

Sakuna trabil kum kum uba pura luan saura taki ba tawan —rug laka daukras kabia sin—, kristian kum ba dakwi takaia, apia kaka diburs kat sin takisa. Baku taim, Baibil bila ya ya ai maîa mahka swisuya ba “ban marit takras kaia sa”, apia kaka ai maîa wal kli briaia sa (1 Korint 7:11). Baku bara, kristian ba upla wala wal kli marit takaia dukyara pri apia sa (Matyu 5:32). Pura luan uba saura trabil kum kum tawan upla kum kum dakwi takaia ra brihwi ba kaisa kaikaia.

Pamali nitka nani yabaia want apia. Maîa waitna kum kum ba, ai pamalika nitka nani ba yabras sa. Sip apia ba mita apia sa, sakuna want apia i ba mita lika yabras. Bara baku dauki si, ai pamalika panis wauhbia munisa. Bahamuna waitnika dahra Baibil ba dia wisa luki? “Ai watla uplika nani ra lukras sa kaka, witin ba kasak lukan laka ba kulkras sa, bara kasak lukras uplika wal, witin ba kau saura sa.” (1 Timoti 5:8.) Naha sat maîa  waitna kum ai daukanka lakaia want apia sa kaka, maîa mairin ba luki kaikbia witin ai luhpia nani wal painka dukyara, lâ kat dakwi takbia sapa. * Bara waitnika ba kristian sa kaka, kangrigisan almukka nani ba, tanka na sut tihura laki kaikbia, kan naha tawan waitnika ra kangbi sakaia sip sa.

Upla wîna tara saura pali munisa. Upla kum kum bara sa, uba praut ba mita, ai maîa wîna tara, bara rayaka ba sin pât ra dingkisa. Saura mamunra ba kristian sa kaka, kangrigisan almukka nani ba trabilka na aman laki kaikbia. Kan ai kupia baiki blahwi aiklabaia sut laik tawan uplika ba kangbi sakan kaia sip sa (Galesha 5:19-21).

Spirit laka ra uba saura munisa. Maîa kum kum bara sa, dia sip ba kat ai maîa ba Jehova ra mayunbia takaskaia, apia kaka Gâd lâka krikbia wisi taibi munisa. Baku taim, “Gâd bila ba kau walaia  [sa], upla nani ra lika apia”. Bamna dakwi takaia sa sapa kristian maîra ba selp luki kaikbia (Wark nani 5:29).

Naha sat trabilka nani uba pura luan saura takuya taim, maîa pâtkas ba, ai maîa wina dakwi takaia, apia kaka ban wal iwi kabia tukbaia apia sa. Kangrigisan almukka, bara muihni-lakri wala nani mita sin, ta baikaia wihki Baibil smalki ba wiaia sip sa. Sakuna maîa waitna ai maîa mairin wal tilara dia taki ba sut sika, Jehova baman pain nu sa. Kristian waitna-mairin kum dakwi takaia wisi, ai maritka bilara trabilka nani pura praki aisabia kaka, marit laka aslika ba, bara Gâd ra sin kulkras prais takisa. Bara kunin smatkira nani yus munisa kaka —auyamakira paskan kabia sin— Jehova pain nu sa. Kasak sika! “Diara paskan ba sut param sa, bara witin ai nakra ra kwakan sa; witinka ra sika yawan wan dahra nani saki aisaia ba.” (Hibru nani 4:13.) Sakuna pura luan uba saura muni trabil kum ban bara sa kaka, bara diara wala daukaia apu taka, muihni-lakri ba dakwi takaia lukisa kaka, upla wala kumi sin ai dahra saura aisaia apia sa. Kan dia dia daukbia sin, tnata kat, “yawan sut Gâd lâ iwaika mawanra bui kabia bamna” (Rom 14:10-12, Lâ Raya Wauhkataya, 1986).