1, 2. Aihtabi taki nani ra kaiki, ya nani ba lilia takisa?

JEHOVA RA mayuni pat wihka brisma ki? Baku sa kaka, aihtabi takaia aisanka ailal walram sa kaia sa. Sakuna, aisanka ailal walram kabia sin, asla aidrubanka kau tara pliska ra, pas sirka nani ra aihtabi takai nani ba bui aisai ba ra kaiki, ban wan kupia nikbisa. Baha pyua ra, wan kupia lilia tawan mahka wan mihta takbisa, bara sam taim inan sut wan daukisa. Upla daknika wala kum Jehova ra taui ba kaikuya bara, uba lilia wan sakisa!

² Mani bilara aima wiria man yawan nahamuna kaikisa. Ban sakuna, ya nani lika pat pat kaikisa luki? Insal nani ba sika! Wik bani upla tausin tausin Jehova lamara bali ba ra kaiki, “kasbrika purara ba kau lilia tara” taki ba luki kais (Luk 15:7, 10). Jehova aipaswanka kaikaia sip piska ba pawi auya ba mita, insal nani ba uba lilia lukisa! (Hagai 2:7.)

3. Dia muni Setan ba “layan ihbi baku [...] taukisa”, bara dia daukaia plikisa ki?

³ Ban sakuna, upla ailal tasba saura na swisi aihtabi taki ba mita, spirit paskanka sut ba lika lilia takras. Lasa nani ba ai kupia baiki pruya! Bara aihka lukaia dukya apia sa, kan Setan pali win Gâd ra mayuni uplika ba latwan kasak kaiki ba mita apia sa, bara pât tilara wapni  kaia sip apia pali sa (Job 2:4, 5). Baha mita, upla kum Jehova ra ai rayaka yabuya taim, Setan ba kuninkira sa marikisa, bara Setan ra mawan taya ra wipisa pitka sa. Bara wik bani Debil ra mawan taya tausin tausin wipi ba taka, ai kupia baiki, spirit laka ra “ya ya piaia wisi, layan ihbi baku pliki taukisa” (1 Pita 5:8). Layanka na, Gâd wal wan asla laka ba mayara batakaia, bara sauhkaia sin pliki pliki taukisa (Lawana 7:1, 2; 2 Timoti 3:12).

4, 5. a) Jehova bui ani dukya wal mapara Setan ra alki takaski brisa? b) Baibil ba kristian nani ra dia wisa ki?

⁴ Layanka na uba praut kabia sin, yawan sibrin tatatwaia apia sa. Dia muni? Kan Jehova bui diara wal mapara Setan ra alki takaski brisa. Ani nani sa ki? Pas baku, Setan ba Gâd uplika ra bakahnu ra sip sauhki tikras kabia. Baha ba Setan sin pain nu sa kaia sa, kan Jehova bui kaina  manas win kristian rait aihwa “kwara tara” kum “trabil tara” pyua ba raya lubia (Param marikan [Reveleshan] 7:9, 14, Lâ Raya Wauhkataya, 1986). Bara Jehova dia aisi ba sut aimakisa.

⁵ Wala ba sika naha: Jehova lamara bangwi ba kumi sin Setan sip piras kabia. Baha ba rait tara kum sa. Prapit Asaraia ba king Asa ra param win: “Dawan ba man nani wal sa, man nani witin wal sma kaka” (2 Kronikas 15:2; 1 Korint 10:13). Debil mihta ra kauhras kan uplika dahra Baibil ra aihwa aisisa (Hibru nani 11:4-40). Witin nani baku, yawan sin Jehova lamara ban sa kaka, layanka na mapara bapi buan kabia, bara pura lubia sin. Baibil bila: “Setan mapara dutki bus, bara witin ba man nani wina plapbia” (Jems 4:7).

6. Kristian banira pura luaia wisi, Setan dia daukisa?

⁶ Kaikata baku, Debil ba Gâd uplika ra bakahnu ra sip pura luras. Sakuna, aihwakras atia nani ra saura munaia sip sa. Nahki muni ki? Sip sa Gâd wal ai aslika laka ba swapni ra lakaia. Baha dukyara diara yuhmpa daukisa: 1) Kau karna mapara aiklabisa, 2) Kristian bani wîna kat aiklabisa, bara 3) Kunin laka ni aiklabisa. Kaisa kumi bani laki kaikaia.

7. Dia muni Setan ba kau ai kupia baiki Gâd uplika nina blikisa?

⁷ Kau karna mapara aiklabisa. Apastil Jan win “tasba aiska na lika Setan karnika munuhtara sa” (1 Jan 5:19). Baku win ba kristian rait aihwa nani sut mapara maisapahkanka kum sa. Setan mita tasba na —Gâd wina laiura uplika sut ba— pat pin sa bamna, nanara kau ai kupia baiki, Gâd uplika ba —ai mihta wina ban plapi swak taki nani ra— kau pali prak alkaia plikisa (Maika 4:1; Jan 15:19; Param marikan 12:12, 17). Bara ai pyua kunhku sa mita, kau kraskira dubil prais kau karna wark takisa.  Naiwa yua ra, Setan dia dia sip ba kat, kau saura rau wan sauhki wan mapara las war bukisa. Bahamna, yawan “diara tanka kakaira [...] dia daukbia ba nu kaia [sa]” (1 Kronikas 12:32).

8. Yawan lasa nani mapara “aiklabi[sa]” Pâl win taim, dia wiaia want kan?

⁸ Kristian bani wîna kat aiklabisa. Kristian nani ra Pâl nan ulban: “Yawan aiklabi ba lika [...] spirit saura nani ai karnika bri ba mapara [sa]” (Epesus 6:12). Dia muni Pâl ba “aiklabi” bila ba ulban ki? Grîk bila yus munan ba sika, wan lama pali kat upla ai mawan ai mawan kat aiklabi ba tanka sa. Pâl bui baku marikan yawan kumi bani ba lasa nani mapara war kum brisa. Yawan iwi tanira uplika ba lasa nani ra lukisa, lukras kra sin, sim dukya sa. Kan Jehova ra wan rayaka yaban yua wal baku, aiklabaia wisi wan klahkla bukan pitka sa. Bara aihtabi takan yua ba wina, mahka aiklabanka ba ta krikan. Baha mita Pâl bui Epesus kristianka nani ra ‘bapi bui kaia’ nit ba dukyara kli kli maisapahkan ba aihka lukaia dukya apia sa (Epesus 6:11, 13, 14).

9. a) Dia muni Setan ai lasika nani wal “kuninka [sat sat] nani” yus munisa ki? b) Dia muni Debil ba wan sinska blakaia plikisa ki, bara nahki ai mapara bubia? ( Wahya 192, 193 ra ulban ba kais.) c) Ani mina blakanka wala dahra aisabia ki?

⁹ Kunin laka ni aiklabisa. Pâl ba kristian nani ra wisa Setan “kuninka nani” ra kauhbiara (Epesus 6:11). Dia muni “kuninka nani” —ailal dahra prais— aisisa ki? Kan Debil ai lasika nani wal, kunin wan munaia wisi, tnatka kumi man yus munras, sakuna tnatka ailal sat sat ra yus munisa. Baku daukisa smatkira sa bamna. Kan kaikisa, kristian kum kum ba traika kaikanka satka kum pura luisa, sakuna tisku traika kaikanka satka wala kum mapara mahka ai mina pruki kauhwisa. Baha mita, yawan kumi bani dia dauki ba Setan ai lasika nani wal aman biki wan kaikisa. Kan pliki bangwisa spirit laka ra yawan dia swapnika  bri ba ra wan batakaia. Sakuna, tingki pali! Kan Baibil ba Debil kunin muni ailal dahra saki wan maisapahkisa (2 Korint 2:11). Bukka na tilara, tasba dukya plikaia ba, pana saura briaia ba, bara rug laka wan mina blakaia sip ba dahra sin pat laki kaikan sa. Kuna kaisa wala kum —sukia laka ba— dahra aisaia.

10. a) Dia ba sukia laka tilara dimisa ki? b) Sukia laka mapara Jehova nahki lukisa ki, bara man nahki kaikisma?

¹⁰ Smaya kaikaia ba, puisin munaia ba, pruan nani wal aisaia ba, bara dia dia spirit saura wal aiblakwi ba, sukia laka tilara dimisa. Ya bahamuna dauki ba lasa mayunaia laka ra kauhwisa, kan spirit saura wal asla pali aiblakwisa. Yawan nu ba baku, Jehova mita naha dukya nani ra “saura kaikisa” (Kli smalkan 18:10-12; Param marikan 21:8). Wan Aisa heven ra ba, “saura laka ba misbara kaik[aia]” wan makabisa kaka, diakan yawan ai waihla nani asla kaia plikbia! (Rom 12:9.) Luki man pat aihka wan dara walisa!

11. Sukia laka ra wan mina wilkbia sa kaka, Setan ba dia pura luanka tara bribia ki? Tanka ba praki kaiki mariks.

¹¹ Baku sika! Sukia laka ra dimaia ba, Jehova waihla nani tanira tauaia pitka sa. Baha mita, sip ba kat Debil ba trai munisa sukia laka ra wan mina wilkaia. Bara kristian kum ra prak alkan taim, Setan ba pura luanka tara kum brisuya. Dia muni? Naha ra luki kais: Suldawa kum ai waihla nani tanira taubia kaka, ai lalka raya ba ai napa sikin muni kiki kabia. Ban kra sin, tauan suldawika ba ra alki daknika wala lawaska kikaia wisi, mawan kat mangkaia lukbia. Sim baku, kristian kum ba sukia laka ra dimisi, Gâd waihla nani tanira wilin taui, Setan adarka munuhtara kabia. Bara Setan ba sika, pura luan tukinka  na marikaia ba, uba lilia kabia! Debil baku daukbia swibia ki? Apia pali! Kan yawan sika Gâd waihla nani tanira tauras.

12. Sukia laka dahra wan lukanka lakaia wisi, dia wala Setan bui daukisa?

¹² Sukia laka ba misbara kaikisa kaka, yawan kauhbia apia. Setan baha pain nu ba mita, yawan aihka lukbia munaia want sa. Nahki muni? Yawan “diara saura ra yamni [kaikbia], bara [diara] yamni ra saura” kaikbia dukyara wan lal blakaia plikisa (Aiseya 5:20). Bara prak wan alkaia wisi kli kli tnatka yuskira kum —yawan nahmpa nahmpa lukbia wisi saura mapara aisi ba— munisa.

13. Yawan nahmpa nahmpa lukbia wisi, Setan dia dauki ba tanka kum kum mangks.

¹³ Naha sat Debil blaki ba dukyara, kaisa tanka kum kum kaikaia. Paradais ra Setan bui Iv ra walan: “Baku bamna Gâd man nani ra mai win, dus nani gadin ra bara ba wina ma nani kumi sin pima apia [...]?”. Pyu wala ra sin, insal nani heven ra asla aidrubanka kum ra Setan bal Job mapara Gâd ra naku win: “Kasakkira baku man dukyam daukisa, sakuna mana luha lika wark takras”. Bara Jisas tasba ra smalki warkka ta kriki kan pyua ra Setan witin ra naku win: “Man ba Gâd Luhpia [sma] kaka, naha walpaya nani ra adar yas brit takbia.” Kau tanis sin, Setan baku aisi Gâd lawaska kikaia wisi aisan, kan 6 wik baku luan ra Jehova param wisata: “Naha sika Luhpi laitwankira; witin sika bak saki briri ba” (Blasi sturka 3:1; Job 1:9; Matyu 3:17; 4:3).

14. a) Sukia laka ba dukyara Debil ba nahki nahmpa nahmpa lukanka dingkisa ki? b) Tisku dia laki kaikbia?

¹⁴ Pyu luan ra baku, naiwa pyua ra sin, Debil ba sim  tnatka ba yus muni sukia laka ba dukyara upla lal blakisa. Sari sa, kuna kristian kum kum sukia laka tnatka nani sut ba rait saura sa sapa dukyara nahmpa nahmpa lukisa. Wibia sa kaka, Setan Iv ra walan prais, “Baku bamna saura sa ki?” selp lukisa (2 Korint 11:3). Sakuna, witin nani ai lukanka wapni ra mangkbia help munaia dukyara, bara yarka wan lal blakbia apia dukyara sin, yawan dia daukaia sip sa ki? Naha tanka sakaia dukyara, Setan bui diara wal mapara sukia laka yukuki dingki ba kaikbia: 1) Yawan lilia kaia wisi dia pliki ba, bara 2) Wan wîna main kaikaia wisi dia dauki ba.

15. a) Wan kuntrika nani tanira, sukia laka ba nahki kaikisa? b) Nahki muni kristian nani tilara sukia laka lukanka dingkan sa ki?

¹⁵ Kau pali wan kuntrika nani tanira tawa tawa sukia laka sat sat ba upla ba diara uba saura baku kulkras sa. Tilivisan soka nani, buk nani, bara nintendo pulanka kum kum ra sin, lasa dukya nani, diara kum lilia wan saki, saura wan munras, kuna painkira raya baku marikisa. Kau sin sukia sturka aisi soka wihki bukka nani sin bara sa, uba kakaira takan sa mita, nahamuna uba laik upla daknika sut brisa. Latan sa, lasa nani ba munan upla ba sukia laka ra saura kaikbia apia. Kristian nani tilara naha lukanka dingkan sa ki? Au. Nahki tnatka ra? Tanka kum baku, sukia laka bri soka kum kaikan kristianka kum bui, naku win: “Au, yang soka ba kaikri, kuna sukia warkka daukri tanka lika apia sa”. Dia muni baku lukaia ba pât ra wan dingkaia sip sa ki?

16. Dia muni lilia kaia wisi sukia laka bri dukya plikaia ba pât ra wan dingkaia sip sa?

¹⁶ Sukia laka kaikaia wihki daukaia ba wal sim dukya apia sa; sakuna kaikaia ba pât ra wan dingkaia sip sa.  Dia muni? Naha ra luki kais: Baibil ba marikisa, Setan ai lasika nani wal wan lukanka sip kaikras sa. * Sakuna kaikata baku, yawan dia lukisa sapa, bara ani ba wan swapnika nani sa sapa nu takaia wisi, yawan dia dauki ba —baha tilara lilia kaia wisi yawan dia pliki ba— sut biki wan kaiki bangwisa. Baha mita, ya ya ai daukanka bak, lasa bri uplika soka, bara bukka nani sukia laka sat sat dahra laik kaiki ba, lasa nani ra maisapahkanka kum blikisa. Raitka pali ba, witin diaura swapni sa marikisa. Bara lasa nani mita ani kau latwan bri yaba mapara pruki, uplika ra batakbia. Kasak sika! Sukia laka sat sat kaiki, kum kum ra tukban sukia laka laik taki las kat dauki bangwan (Galesha 6:7).

17. Upla siknis kum ai kupia kriwan ai dara wali ba mita, Setan dia daukaia sip sa?

¹⁷ Yawan lilia kaia brinka bri ba baman Setan yus munras, sakuna wan wîna tara main kaiki bri ba sin. Ban kra kristian siknis kum ba, kli kli daktar ra wih ai kupia kriwan ai dara walisa, kan sîka kumi sin witin ra sip rakras sa (Mark 5:25, 26). Ai kupia kriwan tawan Setan ai lasika nani wal dia daukaia sip sa ki? Setan ai lasika nani wal pain nu sa, Baibil wi ba kat “yapi smaya kaikaia, bara yu wala dia takaia ba wiaia warkka ba” yawan plikaia apia sa (Libait laka 19:26). Baha mita, dan sip apia baku ai dara wali siknis uplika ba, Baibil lâka kriki “sukia warkka dauki ba” mata sîka pliki wabia ai traika kaikbia kaia sa (Aiseya 1:13). * Baku saurka ra kauhwisa kaka, Gâd wal waihla wan sakisa. Nahki tnatka ra?

18. Kristian nani ba dia sat saîka, bara dukya nani yus munras sa, bara dia muni?

 ¹⁸ Israel uplika “sukia warkka” yus munan nani ra, Jehova bui naku win: “Man nani puram sunaia mihtam bukisma bara, mai kaiki kamna apia; man nani puram sunra ailal aisama sin, yang mai walamna apia” (Aiseya 1:15). Latan sa! Yawan baha mistikka ra kauhwaia want apia sa. Yawan siknis sa kaka, kau pali Jehova ai kyama praki, help wan munras kabia i ba diara saura nani daukaia apia sa (Lawana 41:3). Baha mita, sîka, apia kaka diara wala kum sukia laka ra aiblakwan sa kaka, yawan dia daukbia ki? Tilara dimras pali kabia! (Matyu 6:13.) * Baku lika, Jehova ban yamni wan kaiki kabia. (“ Sukia laka Sa ki?” ulban ba laki kais.)

19. a) Ani Debil kuninka ra upla ailal kauhwisa ki? b) Gâd uplika ba, dia sat sturka nani walras, bara aisaras kaia sa?

¹⁹ Wan kuntrika nani tanira, Setan karnika bri ba ra upla uya lukras sa, sakuna plis wala nani ra lika rangkara takisa. Debil rait karnika bri ba wina pura praki kau karnakira  sa luki bangwisa. Kau sin, yu bani pih, wark taki, yapi, bara dia dia dauki ba sut sin, lasa nani ra sibrin daukisa. Sakuna, sim pyua ra, lasa nani diara aihka karnakira daukan sturka walaia, bara aisaia sin laik bangwisa. Sakuna, Gâd uplika ba, baha sturka walaia, bara aisi tauki kabia aitani sa ki? Apia pali! Diara wal ba mita aitani apia sa.

20. Nahki muni wan dara walras Setan ra nina kulkanka tara kum yabi kaia sip sa ki?

²⁰ Pas ba sika, lasa nani diara tara daukan sturka nani aisabia kaka, Setan ra help muni kabia. Nahki muni? Wel, Baibil bila Setan ba karnika tara brisa wisa, sakuna marikisa Setan ba “sain nani, diara aihkakira kunin satka nani” sin yus munisa (2 Tesalonaika 2:9, 10). Lal blablakra kau tara pali bara ba sika Setan, bara sukia laka laik kaiki nani lukanka blakaia lan sa. Ba’kat sin daukisa diara rait takras kan kum ba, upla sinska ra rait takan,  apia kaka rait walan baku lukbia. Ban kra, rait takan baku aisabia, bara upla kum wina wala ra wisuya taim, sturka ba kau pura praki tara dauki auya sa. Kristian kum baha ra kauhbia kaka, dia takbia ki? “Kunin aisika” ra ta baiki kabia. Kan Setan ra nina kulkanka tara kum yabi kabia! (Jan 8:44; 2 Timoti 2:16.)

21. Yawan dia pali dukyara kau aisaia sa ki?

²¹ Tanka wala ba naku sa: Pyu luan ra lasa nani saura wan munan sturka kum yawan aisi ba rait kabia sin, kli kli muihni-lakri nani ra aisi tauki kaia apia sa. Dia muni ki? Kan yawan ba, Kraist ra ban luki kaia sa, Setan ra lika apia. Au sika! “Wan nakra nani na Jisas kat kaiki kap, witinka wina wan kasak lukan laka ba, ta wina tnata kat yawan ban bri ba.” (Hibru nani 12:2.) Debil ba dia daukaia sip kan, bara dia sip apia kan sturka ailal ba Jisas pain nu kan, sakuna witin tasba ra kan pyua ra ai disaipelka nani ra lasa sturka nani dahra aisi taukras kan. Kau ni, King laka sturka dahra lika aisi tauki kan. Jisas baku, yawan sin diara pain nani, wibia sa kaka “Gâd mita diara aihka tara daukan nani ba dukyara” aisi tauki kaia ba lika kau pain pali sa (Wark nani 2:11; Luk 8:1; Rom 1:11, 12).

22. “Kasbrika purara kau lilia tara bara [kabia]” dukyara, yawan dia daukaia sa ki?

²² Laki kaiki aula baku, Setan ba tnatka sat sat —tilara sukia laka ba— yus muni, Jehova wal wan panika laka ba sauhkaia plikisa. Ban sakuna, yawan diara saura ban misbara kaiki, diara pain ba latwan kaikisa kaka, sukia laka tilara dimaia apia wi ba dukyara yarka Debil wan mawahkbiara (Epesus 4:27). Setan sauhki tikan kabia ba kat, “[ai] kuninka nani” mapara yawan ban wapni bapi buisa kaka, dupali “kasbrika purara kau lilia tara bara [kabia]”! (Epesus 6:11.)