1, 2. Diara lilia wan saki ba pliki taim, diaura luki kaia sa ki?

LUKI KAIS: Dus ma auhni kum samaia man sma bara, dusa ma piska kum ba sukwan sa kaikisma. Dia daukma ki? Wel, diara yuhmpa daukaia sip sma: Ul —sukwan ba sut sin— piaia, ul ba lulkaia, apia kaka sukwan ba saki taka ba piaia. Yuhmpa na wina ani daukma ki?

² Lilia takaia wisi, tasba na ra dia bara ba sim sat takisa. Kan aman laki kaikuya taim, dusa ma aisata ba baku diara ailal —yamni laka ba mapara— sukwan sa. Bahamna, yawan dia daukbia ki? Wel, upla kum kum dukya ba pain, saura sapa lukraskira ul langki pisa. Wala nani lika pât dimaia apia wisi ul ba lulki kangbaia pan want apia sa. Kau wala nani sin bara sa sukwan ba sakisi yamni ba lika brisa. Ban sakuna, Gâd latwanka laka ra ban kaia dukyara yawan kumi bani ba dia daukbia ki?

3. Naika dia dukyara aisabia ki?

³ Yawan aihkika ba las dauki nani ba tilara sa: Yawan nu sa lilia takaia ba nit sa. Sakuna diara nani wan yamnika laka sauhkras kabia kaka lika. Wel au, pas pali ani ba yamni ani ba sukwan sapa param kaikaia sa. Sakuna baha dukyara aisaras kainara, nahamuna wan rayaka ra nahki muni ba kaisa kaikaia.

4. Wan rayaka Gâd ra yaban sa bamna, lilia takaia wisi diara pliki taim dia lukaia sa ki?

⁴ Jehova Witnis kum 1946 manka ra aihtabi takan ba, bisi naku win: “Aihtabi takuya nani ra aisanka yabi bara, kyaima lihni ni yang ra ai aisisa baku pri tniki walaia trai munisna”. Dia muni luki? Witin bui win: “Rayaki Jehova ra yabri kupi kraukaia ba help ai munisa ban wapni bapi bui kaia”. Man sin witin baku lukisma kaia sa. Kan ban wapni kaia mata, Jehova ra pramis munram ba amya tikaia apia sma. Dia pramiska munram ki? Rayakam aiska ba ai warkka daukaia dukyara yus munaia (Smasmalkra 5:4; Hibru nani 10:7). Bika! Rayakam Gâd ra yabram ba mai tukbisa smalki taukaia warkka ba lilia daukma, sakuna diara wala wan rayaka ra dauki ba —lilia takaia wisi dia plikisma ba baku— sin tilara dimisa. Naha laka ra aisi muni apastil Pâl ba ai pyua kristianka nani ra win: “Baku bamna, pi bangwisma sapa, di bangwisma sapa, dia dia daukisma sapa, sut ba Gâd prana dukyara dauki bas” (1 Korint 10:31).

5. Libait laka 22:18-20 ra lâ ulban ba mita, nahki help wan munisa Rom 12:1 tanka tara bri ba kaikaia?

⁵ Kaiki ba baku wan rayaka ra dia dia dauki ba, Gâd ra mayuni  ba wal prawan sa. Rom kristianka nani kupia krauki, Pâl ulbi naku win: “Man nani wînam tara [Gâd] mihta ra mangkma, sakripais rayakira, hulikira, Gâd pain kaikuya ba laka kat” (Rom 12: 1, Lâ Raya Wauhkataya [LRW], 1986). Wan wîna tara wi ba ra, Pâl ba dia wan wiaia want sa ki? Tanka ba sika yawan aiska, wan sinska, wan kupia, bara wan karnika sut sin (Mark 12:30). Bara nahki muni ki, wan wîna tara “sakripais rayakira” baku yabisa? Wan solka aiskakira ni ai dukya dauki si. Bara bila “sakripais” waluya taim, kupia kraukanka tara kum wan sinska ra balisa. Dia muni? Kan Moses Lâka ra, daiwan skahwa sakripaiska kum yaban kaka, Gâd mita briras kan (Libait laka 22:18-20). Sim baku, kristian kum spirit sakripaiska skahwa kum yabisa kaka, Jehova mita bribia apia. Dia ba mita wan mayunra bribia apia isa ki?

6, 7. Kristian kum nahki ai wîna ba taski daukisa ki, bara las kat witin wal dia takbia?

⁶ Rom kristianka nani ra Pâl bui smalki win: “Wînam sirpika nani ba saurka laka mihta ra mangkpara”. Bara naku sin win: “Wînam laka ba spirit mita ikbia” (Rom 6:12-14, [LRW], 1986; 8:13). Wira kanra sin naha ‘wîna laka’ ba tanka dukyara aisi kan. Bara upla mita saurka man dauki tauki ba dahra nan win: “Ai bila ba wataui, bara tahpla laka ni bangkisa”. “Ai mina nani ba aihni plapi taukisa tala laikaia”. “Gâd sibrinka ra sin lukras pali bangwisa” [Lâ Raya Wauhkataya ra wi ba kat, “Gâd sibrinka witin nani nakra nani ra apu sa”] (Rom 3:13-18). Sakuna kristian kum saurka nani na daukaia dukyara, ai wîna piska kum yus munisa kaka, dia takisa? Ai wîna aiska sin taski laka ra lakisa. Naha laka ra, kristian kum kas lilkika nani, apia kaka upla rau sauhki iki soka nani kaikaia lihkisa kaka, “[ai nakra] nani ba  saurka laka mihta ra [mangkisa]”. Bara ai wîna aiska ba taski ra lakisa. Ba’kat ai mayunra ba sunu huli kapras ba taka, Gâd mita sip briras kabia (Kli smalkan 15:21; 1 Pita 1:14-16; 2 Pita 3:11). Lilia takaia wisi diara saura plikan ba mita, dupali nahki diara tara kum lus tiwan!

⁷ Param sa! Lilia takaia wisi yawan dia pliki ba, pulaia dukya kum apia sa. Kan rait apia yawan want sa, dia dia dauki ba wan sakripaiska ba kau sunu daukbia? Misar want sa! Sakuna lilia takaia wisi diara kum ba saura, yamni sapa yawan nahki nu takaia sip sa ki? Kaisa kaikaia.

8, 9. a) Lilia takaia wisi ani diara satka wal bara sa ki? b) Ani sat lilia wan saki dukya nani wina yawan saitra takisa ki, bara dia muni?

⁸ Kristian nani ba mapara diara lilia wan saki ba satka wal bara sa: Yawan saitra kaia sa dukya nani ba, bara wan kupia dara walra wanki ba kat yawan daukaia sip dukya nani ba. Taura, yawan saitra kaia sa dukya nani ba kaisa laki kaikaia.

⁹ Naha bukka Saptika 1 ra kaikata baku, lilia takaia wisi diara kum kum bara ba, Baibil ba saura pali kulkisa. Luki kais: Tilivisan ku, internet ku, so nani ra, apia kaka miusik ra sin, dia kau marikisa? Watauan laka ba, upla ra rau sauhkaia laka ba, sukia laka ba, bara kas laka ba marikisa, kuna upla baha daukbia sin tukbisa. Bara upla ailal Baibil lâka mapara nani na dukyara trabil apu lukisa. Sakuna kristian kum baku yawan dia daukaia sa ki? Saitra taki prawraskira kaia sa (Wark nani 15:28, 29; 1 Korint 6:9, 10; Param marikan [Reveleshan] 21:8). Jehova bui naku adar wankisa: “Saura laka ba misbara kais”, “wataui laka ba wina irbi taks”. Diara saura wal prawras sma kaka lika, “kasak  lukan laka kunin apu” brisma ba marikisma (Rom 12:9; Lawana 34:14; 1 Timoti 1:5).

10. Upla kum kum dia lukisa, bara baku luki ba dia muni trabil kum takaia sip sa ki?

¹⁰ Ban sakuna, kum kum lukisa, watauan laka kaikaia ba trabil apu sa. Ban kra nan wisa: “Yang bahamuna soka kaikisna, sakuna yang lika daukras”. Sakuna baku luki nani ba selp ai wîna ra kunin muni pât ra mangkisa (Jirimaia 17:9). Kan Jehova saura kulki dukya nani ba yawan lilia luki kaikisa kaka, rait pali “saura laka ba misbara [kaikisa]” wibia ki? Kli kli diara saura kaikuya taim wan kupia dara walra ba karna takisa, bara munisa yawan saurka ra kauhwbia, apia kaka upla wala saurka daukan ba yawan trabil apu lukbia (Lawana 119:70; 1 Timoti 4:1, 2).

11. Diara lilia wan saki ba dukyara Galesha 6:7 ba nahki help wan munisa?

¹¹ Bara kristian kum kum nani ra baku takan sa. Lilia takaia wisi pat pat diara saura kaiki kan bara, las kat witin nani sin kauhwi rug laka daukan. Alai pali sa! Kan brin ba kat lan takan “upla mita dia mangki ba, baha sika krikbia” (Galesha 6:7). Sakuna yawan baha sat wan mina pruki kauhwaia nit apia sa. Diara sunu sinskam ra mangki briaia trai munisma kaka, rayakam ra yamni man krikma. (“ Lilia Takaia Wisi Dia Sat Plikaia Sna ki?” ulban ba kais.)

12. Lilia wan saki dukya nani pliki taim Galesha 6:5 wi ba nahki brih wapisa ki, bara diara daukaia luki taim ani wina help sakisa?

¹² Nanara, lilia wan saki dukya nani satka wala ba —wibia sa kaka, baha nani Baibil ra pain, saura sin wiras ba dukyara— aisabia. Naha nani pain, saura sapa upla bani ba selp luki kaikaia sa (Galesha 6:5). Sakuna,  baha luki kaikuya taim, yawan pasa ra lika apia sa. Kan wan mihta ra help tara kum brisa: Baibil ra tanka kasak wan smalki ba. Yawan Baibil aman laki kaikbia sa kaka, diara sut mapara —lilia wan saki dukya nani ba mapara sin— “[Jehova] kupia laka ba dia sapa tanka pain [bribia]” (Epesus 5:17).

13. Nahki muni Jehova saura kaiki dukya nani ba wina yawan laiura kaia sip sa ki?

¹³ Wel au, Baibil smalki ba kat tanka kaikaia laka ba,  upla sut sim prais briras (Pilipai 1:9). Bara lilia takaia wisi upla bani dia daukaia kau laik ba sin sat sat sa. Baha mita, yawan sip lukras upla sut ba sim dukya laik kaikbia. Nahki kabia sin, Gâd lâka ba aman laki kaikisi, yarka wan sinska wan kupia sin nikbia. Baku baman Jehova saura kaiki dukya nani ba wina yawan laiura kabia (Lawana 119:11, 129; 1 Pita 2:16).

14. a) Lilia takaia wisi dia dukya wala sin aman luki kaikaia sa ki? b) Wan rayaka ra Gâd mayunra ba pas taura kabia dukyara dia daukaia sa?

¹⁴ Lilia takaia wisi diara wala sin aman luki kaikaia sma: Taimkam tikisma ba. Kan lilia takaia wisi dia sat plikisma bui kaikisa kupiam ra ani ba saura, ani ba yamni lukisma sapa. Bara taimkam yabisma praiska bui kaikisa kupiam ra ani ba kau tara kulkisma sapa. Bara Kristian nani kupia ra, spirit laka dukya nani ba, kau tara bangwisa (Matyu 6:33). Baku bamna, rayakam ra Gâd mayunra ba pas taura kabia dukyara dia daukaisma ki? Apastil Pâl naku wisata ba alki bris: “Nahki sma ba aman kaiki bas, sins aitani briras nani ba baku kapara, sakuna sinskira nani bas. Pyua brisma na pain yus muni bas, kan yua nani na saura sa” (Epesus 5:15, 16). Baha mita, wan taimka pasa ra swiaia apia dukyara, bara spiritkam laka paki “diara yamni ba pliki sakma” dukyara sin, taimkam ni dia daukma ba ulbi briaia aitani sa (Pilipai 1:10).

15. Pât bara ba wina uba lamara waia apia ba, dia muni sinskira sa ki?

¹⁵ Pât bara ba wina, uba lamara waia apia sin pain sa. Dia wiaia want sa ki? Dusa ma dukyara aisata ba ra kli luki kais: Ma piska sukwan ba sakaia wisi, sukwras piska lupia sin taih dakbisma. Sim baku, yawan lilia takaia wisi, diara sukwan nani ba —wibia sa kaka, Baibil ra saura wi dukya nani ba— plikras. Sakuna, diara nani  pain talia, sakuna spirit laka ra sukwan sa siknis wan sakaia sip ba wina sin laiura kaia sa (Sins laka 4:25-27). Baibil smalki ba kat pulraskira alki daukaia ba laiura kaia help wan munbia.

16. a) Jehova nahki luki ba kat yawan sin luki ba, nahki marikaia sip sa? b) Baibil dia smalki ba nahki wan rayaka ra yu bani alki bribia ki?

¹⁶ Lilia takaia wisi diara pliki saki taim, kristian rait aihwa nani ba Jehova nahki luki ba pas kaikisa. Bara Baibil ra Jehova bapanka mangki nani ba param marikisa. Naha laka ra King Salaman ba ulbi win “twisa kunin aisi ba, mihta nani sin tala pâtkas laiki ba, lukanka saura daukaia luki paski ba, [bara] mina nani aihni diara saura daukaia brihwi ba” sin Jehova misbara kaikisa (Sins laka 6:16-19). Jehova nahki luki ba yawan nu si, dia daukbia ki? Lawana aîulbra ba pana wan wisa: “Man nani Jehova ra latwan kaikisma ba, saura laka waihlam kulks” (Lawana 97:10, Miskitu Salmo Lawana nani [SLN], 1960). Lilia takaia wisi yawan diara pliki ba, marikaia sa Jehova misbara kaiki dukya nani ba yawan sin misbara kaikisa (Galesha 5:19-21). Upla mawanra baha sut marikaia sma. Sakuna, yakan upla mai kaikras taim dia daukisma ba, kau pali kupiam munuhta kat  dia sat uplika sma sapa marikisa (Lawana 11:4; 16:8). Kupiam aiskakira ni Jehova yamni kaiki ba kat wapaia want sma ki? Au takisma kaka, Baibil dia smalki ba rayakam ra alki brima. Au sika! Yu bani, ba’kat daukma! (2 Korint 3:18.)

17. Lilia takaia wisi diara daukaia lukras kainara, dia aman lukaia sa ki?

¹⁷ Lilia takaia wisi diara yawan daukaia luki ba, Jehova yamni lukisa sapa nu takaia dukyara, dia wala sin daukaia sip sa? Sip sma naha wala sin aman lukaia: “Daukaia lukisna ba mita, maipara, bara Gâd panika sna mapara sin dia munbia ki?”. Tanka kum baku, so kum kaikaia lukuma taim selp luki kais: “Soka na mita kupi ra dia munbia ki?”. Sakuna naha laka ra bapanka wala nani aman luki kaikaia bara ba sin kaisa kaikaia.

18, 19. a) Lilia wan saki dukya yamni nani pliki sakaia dukyara Pilipai 4:8 ba nahki help wan munisa? b) Ani tikska wala nani sin help wan munaia sip sa ki? (Wahya mina ba kais.)

¹⁸ Bapanka kau tara kum ba Pilipai 4:8 ra naku sa: “Diara pain nani, bara mayunra briaia aitani bani[ra] lukankam mangks. Diara kasak nani ba, dia dia kulki briaia aitani ba, diara wapni nani ba, diara sunu nani ba, dia dia upla mita lihki ba, bara dia dia upla mita pain kulki ba”. Wel au, Pâl naha win taim lilia wan saki dukya nani dahra aisaras, Gâd yamni kaiki dukya nani ra lukaia dukyara lika (Lawana 19:14). Ban sakuna, kaikbia sa kaka, lilia wan saki dukya nani ba tila diman sa. Dia muni?

¹⁹ Wel, lilia takaia wisi dia plikisma dukyara wira luki kais. So nani, pulanka nani, lawana nani, ani nahamuna satka kabia dukyara sin selp mamkabi wals: “Sinski ra “diara sunu nani” dingkisa ki?”. Naha tanka ra,  so kum kaikram ningkara, sinskam ra dia sat lilkika balisa? Painkira, auyapahkira, bara klin kaka, yamni pliki sakram sa. Sakuna diara taski sinskam ra balisa kaka, saura sa (Matyu 12:33; Mark 7:20-23). Dia muni saura sa? Kan wan kupia ba saurka ra laki, wan auyapah laka ba tiki, Gâd wal wan panika laka ba kat sin sauhkaia sip sa (Epesus 5:5; 1 Timoti 1:5, 19). Lilia takaia wisi diara wahra plikaia ba uba saura wan muni ba mita, yarka baha wal prawbiara (Rom 12:2). * Lawana aîulbra ba Jehova ra naku makaban: “Bahki lâka [...] kaikaia wina naikra nani laks” (Lawana 119:37, [SLN], 1960). Yawan sin, sim sat luki makabaia sa!

20, 21. Lilia wan saki dukya nani pliki taim, 1 Korint 10:23, 24 ba nahki help wan munisa ki?

²⁰ Selp diara daukaia luki taim, bapanka wala yawan aman luki kaikaia ba dukyara, Pâl ba naku win: “Diara sut lâ kat aitani sa; sakuna diara sut bani lika wan dukya pain paskras. Upla bani ai wîna pali helpka plikaia apia sa, sakuna ai walka helpka mika” (1 Korint 10:23, 24, [LRW], 1986). Yawan lilia takaia wisi, nahki muni bapanka na alki brih daukbia ki? Aitani sa selp wan makabi walaia: “Daukamna ba mita wala nani ba dia lukbia ki?”

²¹ Ban kra kupiam dara walra ba mapara diara kum kum daukaia ba “lâ kat aitani sa”. Ban sakuna, kristian wala kum ai kupia dara walra kau swapni bri ba saura lukisa kaka, yawan daukaia apia lukbia kaia sa. Dia muni? Kan “wan muihni nani [...] kupia dara walra sauhk[aia]” want apia sa. Daukma kaka, upla ai mina  prukbia kum mangkisma, bara Pâl win ba kat “Kraist pali mapara saura daukisma”. Amya tikpara naku wan kupia kraukan: “Upla kumira sin trabil munpara” (1 Korint 8:12; 10:32). Lilia takaia wisi diara kum “lâ kat aitani sa”, kuna wan muihni-lakri kasak luki “dukya [nani] pain paskras” kaka, rait aihwa kristian kum ba lika daukaia apia bitar lukisa. Baku tnatka ra Pâl bui latwankira luki wan smalkan ba alki daukisa (Rom 14:1; 15:1).

22. Dia muni kristian wala selp luki ba yawan rispik munaia sa?

²² Tani wala ra sin, —wibia sa kaka, wan kupia dara walra swapni brisa kaka— wan walka yamnika ra lukaia sa. Kristian wala nani ba sut, yawan luki ba kat sim sat lukbia dukyara taibi munaia apia sa. Luki kais: Man baik tawa ulisma kaka, wala nani sin man baku tawa ulbia taibi munaia sip sma ki? Baha mita, lilia takaia wisi muihni-lakri kum ba man pain kaikras, sakuna daukaia luki dukya ba Gâd lâka mapara apia sa kaka, man dia daukma ki? Latwankira luki, ai lukanka rispik munma. Baku lika, “upla sut mita man [...] ba upla yamni baku mai kaikbia” (Pilipai 4:5; Smasmalkra 7:16).

23. Lilia wan saki dukya yamni pliki sakaia dukyara dia daukaia sa ki?

²³ Lilia wan saki dukya nani pain pliki sakaia dukyara dia daukaia sa ki? Bila prahni ra wibia sa kaka, pas pali, dukya ba Baibil ba saura kulki nani tilara sa sapa laki kaikaia sa. Tilara sa kaka, laiura takaia sa. Bara dukya ba mapara lâ kum param apia sa kaka, Baibil smalki ba aman luki kaikbia. Bara wan kupia dara walra sauhkaia sip dukya nani wina laiura taki, wan walka bara kau pali wan muihni-lakri kupia insauhkaia apia wisi, main kaiki kabia. Lilia mai saki diara yamni baman plikisma kaka, Gâd ra mayuni, man bara pamalikam ba sin ai latwanka laka ra ban kabia.