Wan uplika, apia kaka wan panika kum saurka dauki ai kupia lakras taka, kangrigisan wina kangbi sakuya taim, wan kupia sarka kasak paskisa. Sakuna, baku takuya taim, yawan dia dauki ba mita, nahki prais Gâd ra latwan kaiki ba, bara witin wi ba dukyara nahki prais wan wapnika laka bri ba sin marikisa. * Baha mita, upla kangbi saki ba dahra tanka kum kum kaisa laki kaikaia.

Kangbi sakan kum ra nahki kaikaia sa ki? “Upla kum wan muihni wisa, sakuna taski laka daukisa, gridikira sa, aidul nani ra ai pura suni mayunisa, upla dusa kakuhbra sa, rum dadira sa, aîmplikra kaka sin, witin wal taukpara. Bahamuna uplika wal iwi plun sin piaia apia sma.” (1 Korint 5:11.) Baku sin, Baibil bila: “Ani uplika Kraist smalkanka ba [swibia] kaka, wamtla ra dingki bripara bara lakula sin wipara; kan ani uplika mita lakula wibia kaka, witin lika baha uplika saura dauki ba wal kumi takisa” (2 Jan 9-11). Aihwawakra Watla ba, Yahbra [noviembre] katka 15, 1988, wahya 19 ra naku wisa: “Upla kum ra ‘Naksa!’ pan wima ba, uplika wal kau sturi aisaia, apia kaka pana kat sin takaia mai brihwaia sip sa. Kangbi sakan uplika kum wal baku mai brihwabia dukyara diara kum daukma ki?”. Kangrigisan wina upla kum ra kangbi sakuya taim, spirit laka ra, bara wan pana laka sut sin kaina dakbisa.

Baha prais lâ karna mangkaia nit pali sa ki? Au sika! Diara ailal tawan nit pali sa. Pas baku, Gâd ra, ai Bila ra sin wapni laka yawan bri ba tawan nit pali sa. Yawan Jehova ra uba latwan kaiki ba mita, karna wan munbia kra sin, ai bila ban walan wan daukisa. Bara yawan pain nu sa, witin kasak, latwankira sa. Bara ai lâka nani ba wan yamnika dukyara sa (Aiseya 48:17; 1 Jan 5:3). Diara wala tawan sin naku sa: Saurka  daukan uplika ba wan sauhkaia sip sa. Baha mita, yawan witin ra saitra lakisa taim, wan daukanka mapara, bara spirit laka mapara sin wan kaina kahbi, kangrigisan bilara klin laka ba, bara nina kulkanka yamni ba ban bri kabia (1 Korint 5:6, 7). Diara yuhmpa kum tawan sin naku sa: Upla ra kangbi saki ba ra yamni munaia sip sa. Nahki muni? Saurka daukan uplika ba, ba’kat almuk nani smalkan ba walras kata. Yawan Baibil wi ba kat bapi bui, Lâ Bapaia Daknika ba, dia luki daukan ba ta baikisa kaka, uplika kupia nikbaia sip sa. Au! Yawan bapi bui ba mita ai kupia swapni dauki, ai lukanka sat wala ra lakaia sip sa. Bara ai uplika latwankira nani wal asla kan ba tiwan sa kaikbia taim, ban kra ai saurka pâtka ba kaiki, “ai kupia wal aisi[...]”, nahki Jehova ra tauaia plikbia (Luk 15:17).

Kangbi sakan uplika ba wan taya sa kaka? Wan taya kum sa kaka, Jehova ra wan wapnika laka ba trai kaikan kabia kaia sa. Baku taim, kangbi sakan uplika ra nahki kaikaia sa ki? Tanka sut mapa dahra nara sip aisaras sakuna, tanka wal uba taki ba dukyara aisabia.

Sam taim, kangbi sakan uplika ba ai lama pamalika wal sim watla ra iwisa. Kangbi sakuya taim, ai pamalika wal ban ai taya sa mita, pamalika bisniska nani ra ban dimi kabia swibia. Sakuna, kristian aslika laka ba krikan na ra, Jehova ra wapni kaia dukyara, kangbi sakan uplika ba wal spirit laka ra asla kaia sip apia sa. Ban kra, pamali stadika ra kabia, sakuna iwi wali kabia baman swibia. Bara kangbi sakan sa uplika ba kau tuktan sa kaka, aisika-yaptika ba Baibil stadika yabaia sip sa, kan ai luhpia ra smalki pakaia ba, ban witin nani warkka sa (Sins laka 6:20-22; 29:17). *

Tamya kangbi sakan ba man wal sim watla ra iwras sa kaka? Baku taim, uya wal asla takras kabia. Pamali trabilka kum bara sa kaka baman asla takisa. Sakuna diara bahki tawan  asla takaia tnatka nani pliki bangwras. Jehova ra, bara ai asla takanka ra sin wapni bangwi ba mita, Baibil lâka ba rispik munisa. Wan taya yamnika ba want sa. Bara wapni ra bapi bui si, wan taya ba wapni ra taubia help munaia sip sa (Hibru nani 12:11). *