Tala yula nani. Tala bilara diara walhwal kau bri ba sika: Tala pauni, tala pihni, plakitas, bara plasma. Walhwalka na pis pis ra saki muni yula kau sirpi lupia wala nani sin wahbisa. Tala pauni ba wina upan satka kum hemoglobina maki ba sakisa. Daiwan, apia kaka upla talya wina sin bahamuna saki, tala uba mayara, bara tala baiwanka tara mapara sîka paskisa.

Plasma bilara 90 pursentka ba li sa. Baku sin wan âikama yula nani, sal, bara wan rayaka i ba sat sat yula nani —tila wina sugar, ma lupia wala sin— ailal brisa. Piska wala nani wan tala klasbi yaba yula nani, upan satka wala albúmina wi ba, bara yula pain siknis mapara aiklabi nani sin plasma ba wina sakisa. Bahamna, siknis sat aihka kum upla ra munisa taim, ban kra indiksan kum gammaglobulina maki ba sabaisa. Indiksanka na sika, sikniska ba pat pura luan uplika plasma wina sikniska mapara yula pain nani ba sakisi, indiksanka paskisa. Bara tala pihni ba wina sin yula nani interferones bara interleuquinas maki ba sakisa. Nahamuna kiansa sat sat wihki yula saura inpiksan wan muni ba mapara sîka baku yus munisa.

 Kristian nani ba sip sa ki, sîka baku tala yula nani yus muni ba briaia? Baibil ba au, apia wiras bamna, kristian kumi bani ai kupia dara wali ba kat daukaia sa. Kristian kum kum ba yula sirpi sut briaia apia wisa. Kan ai kupia wal lukisa, Gâd bui Israel luhpia nani ra adar yan witin nani daiwan kum iki talya ba “tasba ra li baku laikaia” kan win (Kli smalkan 12:22-24). Kristian wala nani, tala, bara tala ra diara walhwal kau bri ba briras sakuna, tala yula kau sirpi lupia nani lika briaia trabil apu lukisa. Kan ai kupia wal lukisa, yula ba, ba’kat dan ani wina balan rayaka tanka apia sa.

Man ba, au, apia sin takras kainara, kupiam ra luki kais: “Tainka brisna yang apia wirika, ani ani tala yula bri saîka —tilara siknis kum kum mapara aiklabi saîka nani, bara tala plapi ba klasbi ya ba saîka nani— sut sin briaia apia wisna laka ra sa? Tala yula satka kumi, apia kaka kau mapara diakan yang brimna, apia kaka briras sapa, daktar kum mawanra pain tanka marikaia sip kamna ki?”.

Aparit muni satka nani. Tila wina satka wal kau yus munisa. Kum Hemodilución wi ba sika, wan wîna wina tala taka kum saitra mawahki, watlika ra swiru kum wîna ra mangkisa. Bara ningkara talya taka kata ba kli wîna ra dingkisa. Wala kum Tala Laiwi Dingki wi ba naku sa: Upla aparit muni taim, insauhkan untika nani ra tala plapi ba brisi, klin muni, mahka wakia ra kli dingkisa. Daktar bani bahamuna wira sat  wala daukaia sip sa mita, kristian bani ai daktarka ra dia pali daukbia sapa makabi walaia sa.

Aparit muni nahamuna dauki ba dukyara dia daukma sapa lukuma taim, kupiam ra luki kais: “Wîni wina tailya mawahkan, bara pyu kunhku ra yaban plapras kabia kaka, kupi dara walra Baibil lan takan ba kat, talya na ban yang taka kum sa tawan “tasba ra li baku laikaia” nit apia sa lukaia aikbia  ki?” (Kli smalkan 12:23, 24). “Aparit kum ra tailya taka kum saki sîka wal abalki muni kli wîni ra dingkbia sa kaka, kupi ra turban daira walras kabia ki? Tainka brisna tailya wal prawi dia dia daktar muni sut ba briaia apia wirika, tilara tala iksaminka ba, wan talya klin dauki masinka ba (Hemodiálisis wi ba), bara lata wina tala pump muni masinka ba sut sin briaia apia wisna laka ra sa?”

Aparit kum witin ra munras kainara kristian kumi bani ai talya ni dia yarka daukbia luki kaia sa. Iksamin nani, bara siknis mapara wan talya tahwi kum saki, ban kra sîka wal abalkisi muni kli indiksan baku wan sabia dukyara sin, kumi bani selp luki kaia sa.