1-3. a) Dia dukyara Baibil ra yukukras aisisa ki? b) Pana yamni nani pliki sakaia wisi, yawan dia daukaia sa ki?

KWALA piska kum ai lamara li buswan kaka, laya ba aubisa. Bara tnatka kum ra, upla sut ba kwala piska kum baku sa. Kan yawan sut ani uplika lamara tauki ba wina, ai daukanka, ai lukanka, bara dia saura dauki ba sin isi pali aubisa.

² Baibil ra diara yukukras nan wisa: “Sinskira nani wal tauki bas, bara sinskira kama; taniskira nani wal tauki bas, bara mai sauhki mai tikbia” (Sins laka 13:20). Tikska na ra, upla wal minit kum prawi taukaia dukyara aisaras. Sakuna “wal tauki” wi taim, upla wal pana laka ra pat pat aikuki taukaia tanka sa. * Baibil kum ra naha tikska dahra naku tanka kum sakan: “Upla kum wal taukaia ba sika, wan kupia alkan taka lamara kaia tanka sa”. Bara upla kum wan kupia alkan taim, rait apia uplika dauki ba baku yawan sin daukisa? Au! Bara wal taukaia laik sa kaka, kau pali yamni ku, apia kaka saura ku wan brihwaia sip sa.

³ Gâd latwanka laka ra ban kaia want sa kaka, pana yamni nani plikaia uba nit pali sa. Baha nani nahki  pliki sakbia ki? Isi sa: Gâd latwan kaiki nani ra, yawan sin latwan kaikaia. Wibia sa kaka, Gâd panika nani tila wina, wan panika nani pliki sakaia. Luki kais: Upla kum ai daukanka tawan Gâd bui ai panika baku wahbi brin sa kaka, rait apia pana yamni kum takaia sip sa? Baku bamna, kaisa kaikaia Gâd mita dia sat daukanka nani ai panika nani ra makabisa. Baha kaikisi pana yamni nani pliki sakaia dukyara yawan ridi kabia.

4. Dia muni Jehova ba upla inipis ai panika baku saki briras, bara Ebraham ra dia muni “yang upliki pali” makan ki?

⁴ Jehova ai panika kum pliki taim, upla inipis kum plikras. Witin ba sika Karnika Sut Bri Gâdka sa. Bara ai panika kaia ba kulkanka kau tara sa bamna, witin baku dauki ba aitani sa. Bahamna, ya nani ai panika kabia bak sakisa ki? Ai kupia aiskakira ni witin ra kasak luki nani ra lika plikisa. Naha tanka ra, Ebraham ra wira luki kais. Witin kasakka lukan laka tara bri kan ba mita kakaira pali sa. Gâd Ebraham ra win ai luhpia ba sakripais baku yabia. * Rait apia aisa kum mapara, baha sat bila walaia ba karna pali sa? Sakuna, Ebraham lika “Aisak ba sakripais dauki yaia” au takan, kan “kasak lukan, Gâd ba pruan nani pali sin kli bukaia karnika brisa” (Hibru nani 11:17-19). Bara baha sat kasak lukan ba taka mita, Jehova bui Ebraham ra “yang upliki pali” makan (Aiseya 41:8; Jems 2:21-23).

5. Diara sut purkara ai bila wali nani ra, Jehova nahki lukisa ki?

⁵ Jehova mita upla bila wawalra nani ra tara pali kulkisa. Diara sut purkara witin ra wapni bangwi nani ra  latwan kaikisa (2 Samyuil 22:26). Saptika 1 ra kaikata baku, latwan laka tara ni ai bila wali nani ra Jehova uba lihkisa. Bara Sins laka 3:32 ra wi ba kat, “pain nani ra” baman witin “ai kupia aiska kulkisa”. Baha nani ra lika ai kupia painkira ni yamni balram wisa ‘ai tempelka ra’ dimbia. Wibia sa kaka, ai mayunra yabia, bara ani minitka ra kabia sin ai pura sunbia (Lawana 15:1-5).

6. Yawan Jisas ra latwan kaiki ba nahki marikisa ki, bara Jehova baha kaikisi ai kupia ra nahki lukisa?

⁶ Ai Luhpia unsak ra latwan kaiki nani ra, Jehova bui pana sin latwan kaikisa. Jisas bila: “Ani uplika latwan ai kaiki kaka, witin yang bili ban bri kabia: Yang Aisiki sin witin ra latwan kaikbia, bara yang nani witin ra balamni, witin wal wan watla daukamni” (Jan 14:23, Lâ Raya Wauhkataya [LRW], 1986). Nahki muni yawan Jisas ra latwan kaiki ba marikbia wisa ki? Ai ‘bila ban bri kabia’ wisa. Wibia sa kaka, adar wankan ba sut —baha tilara sturi yamni ba smalkaia, bara disaipel nani sin daukaia— bila walaia sa (Matyu 28:19, 20; Jan 14:15, 21). Baku sin, “ai mina wapanka nani nina blikma”. Kan yawan sip ba kat, Jisas aisan bara daukan baku alki brih wapaia trai munaia sip sa (1 Pita 2:21). Yawan Jisas ra latwan kaiki kristian laka ra wapi trai muni ba, Jehova kaikisa bara ai kupia kat kangbisa.

7. Jehova panika nani wal pana takaia ba, dia muni sinskira sa ki?

⁷ Pat kaikan baku, Jehova makabisa ai uplika ba, kasak lukan laka, wapni laka, bara bila walan laka sin bri kabia. Baku sin Jisas ra, bara ai wapanka ra sin latwan kaikbia makabisa. Baha mita, yawan kumi bani selp lukaia sa: “Painika nani ba, baha sat daukanka marikisa ki? Painika nani ba, Jehova panika sin bangwisa ki?”. Naha aman luki kaikaia ba, sinskira pali sa. Kan  smalki tauki, bara kristian wapanka bri uplika nani wal pana takaia ba, Gâd kupia laka kat iwaia help wan munisa. (“ Ya lika Pana Painkira kum Sa ki?” ulban ba laki kais.)

8. a) Neumi wihki Rut, b) Hibru wahmika yuhmpa ba, bara c) Pâl Timoti wal, pana laka brin ba wina, dia laik sma ki?

⁸ Gâd uplika nani pana painkira nani sakan blisin brin ba dahra, Baibil ra aihwa aisisa. Tila wina: Neumi wihki ai mula yapti Rut ba pana laka ra tauki kan, Hibru wahmika yuhmpa Babilun ra asla kan ba, bara Pâl Timoti wal pana takan ba dukyara sin Baibil ra aisisa (Rut 1:16; Danyal 3:17, 18; 1 Korint 4:17; Pilipai 2:20-22). Sakuna, tanka uba tara kum bara ba sika: Debit wihki Janatan pana takan ba. Kaisa baha kaikaia!

9, 10. Dia mita munan Debit Janatan wal pana takaia?

⁹ Baibil bila Debit Gulaiat ra ikan taim, “Janatan, Debit wal ai uplika aihwa pali takan, ai wîna baku latwan kaikan” wisa (1 Samyuil 18:1). Bara mahka ai panika laka ba dutki pali takan. Kum ba wahma, wala ba almuk kan. Sakuna Janatan war aiklabi pruan ba kat wal sut ban pana painkira nani kan (2 Samyuil 1:26). * Dia mita munan baha sat panika laka dutki briaia?

¹⁰ Debit Janatan sin Gâd ra latwan kaiki kan, bara wal sut ba wapni kaia want kan ba mita yaban asla takan. Wal sut ba spirit laka ra karna wark takaia ba tara kulki kan. Bara pana pana ai daukanka nani ba yamni  kaiki kan. Debit ba Jehova nina tawan ai kupia tahplu sibriraskira aiklaban ba dukyara, Janatan ba uba yamni kaikan. Pana sin Janatan ba almuk kum Jehova lâka bila wali ai wîna ra lukras, Debit yamnika pliki kan ba dukyara Debit ba tara kulkan. Luki kais, pyua kum Debit ai rayaka ra pât uba wauhwi kan, kan  kingka saura Sâl ba —Janatan aisika kata ba— Debit ra ikaia wisi nina bliki kan. Debit ba mahka plapi tauki kan. Bara pana laka ra Janatan ba mahka Debit “kupia ta baikaia Gâd ra ban luki kaia karnika yaia” wisi wan (1 Samyuil 23:16). Ai panika ra wih kupia buki kan ba dukyara, Debit nahki ai dara walan luki kais! *

11. Debit Janatan wal pana takan sturka ba wina yawan dia lan takisa ki?

¹¹ Debit Janatan wal sturka ba wina yawan dia lan takisa ki? Kau pali lan taki ba naha: Pana laka ra diara kau tara ba sika, spirit laka ra sim lukanka bri kaia ba.  Wan lukanka, wan lâka daukanka, bara sim sat Gâd ra kasak kaia brinka bri nani ba wal asla taukaia ba yamni wan munisa. Kasak sika! Wan kupia ra nahki luki wan dara wali ba dukyara sin pana pana aisi wan kupia bukaia sip sa (Rom 1:11, 12). Bara baha sat panika painkira nani ba kangrigisan muihni-lakri nani tilara sa. Bahamna, Asla Aidrubanka Watla ra wi nani ba sut, wan panika painkira sa ki? Baku tanka lika apia sa.

12, 13. a) Kangrigisan bilara wan panika wahbi brisuya taim, dia muni aihwaki kaia sa ki? b) Patitara kangrigisanka nani ra dia trabilka takan, bara pâli aisi Pâl dia win?

¹² Aman kaiki wan panika nani wahbi briaia sa, kan kangrigisan bilara uplika sut ba spirit laka ra pawaia help wan munras. Baha ba aihka lukaia sa ki? Wel apia. Dus kum ra ma kum kum ba kau isti pawisa wala nani wal, sim baku muihni-lakri kum kum ba spirit laka ra kau tawa pawisa. Baku bara, kangrigisan bilara uplika ba spirit laka ra pawanka ba sat sat kaikbia (Hibru nani 5:12-6:3). Wel au, kangrigisan ra bisi diman kupia swapni bri nani ra latwan kaiki kaia sa. Baku lika kristian laka ra pawbia help munisa (Rom 14:1; 15:1).

¹³ Sam taim, kangrigisan ra wan panika nani dukyara aihwaki kaia sa. Ban kra upla kum saura taukisa, apia kaka ai kupia ra saura luki brukwi man taukisa. Patitara pyua ra sin kristian aihkika ba kasak bangwi kan, sakuna kum kum ba pain pali wataukras kan. Naha laka ra, Korint kangrigisanka ra kum kum ba smalkanka kum kum lulki swin. Bara mika apastil Pâl win: “Mamwahkpara [...,] wan panika saura nani mita wan lâka pain nani ba sauhkisa” (1 Korint 15:12, 33). Timoti ra sin Pâl mita win muihni-lakri kum kum  wapni taukras taka aman kaiki saitra kaia kan (2 Timoti 2:20-22).

14. Pâl pâli aisan ba, dia wan smalkisa ki?

¹⁴ Pâl pâli aisan ba, dia wan smalkisa ki? Wan marikisa upla kum —kangrigisan bilara kabia sin— saura taukisa kaka yawan uya lamara taukras kaia bitar sa (2 Tesalonaika 3:6, 7, 14). Wan spiritka laka main kaikaia sa. Amya ra bri bas yawan kwala kum baku wan lamara uplika satka ba aubisa. Kwala kum li taski ra dingkma kaka, dia aubaisa? Li klin aubia luki? Sim baku yawan pana saura nani wal taukisa kaka, diara yamni sip alkras (1 Korint 5:6).

15. Kangrigisan ra spirit lukanka bri panika nani nahki sakma ki?

¹⁵ Sakuna, Jehova ra tingki ai uplika tilara panika yamni nani pura luan ailal bara sa (Lawana 133:1). Nahki muni spirit lukanka bri panika nani sakma ki? Man yamni kat luki alki daukma kaka, upla wala sim sat luki alki dauki nani ba lamamra balbia. Sakuna man sin, mahka pana plikaia trai munaia sma. (“ Nahki Pana Painkira nani Saki Bangwri” ulban ba kais.) Man nahki takaia want sma ba kat dauki nani ra pliks. Baibil wi ba kat “kupiam ba kasak param [...] kwakma”. Wibia sa kaka, ani kyamka bara kuntrika wina kabia sin wan panika plikbia (2 Korint 6:13; 1 Pita 2:17). Yawan wal sim manka bri nani wal baman taukaia apia. Kan rait apia Debit ba wahma kuna Janatan ba almuk kan? Bika! Pana almuk aihkika nani mita tankira sinska laka wankaia sip sa.

16, 17. Muihni-lakri kum yawan mapara saura daukbia kaka, dia muni kangrigisan ba lulki swiaia apia sa?

¹⁶ Kangrigisan ra kristian kumi bani ba, sat sat  bangwisa. Baha mita trabil nani bal takaia sip sa. Ban kra muihni-lakri kum mita yawan mapara saura daukan, apia kaka saura aisan. Pana pana sat wala mapara lukisa, apia kaka diara kum wan tanka pain briras taka blahwanka takan kaia sa (Sins laka 12:18). Baku taim yawan dia daukbia ki? Wan mina pruki kangrigisan ba lulki swibia ki? Jehova ra, bara Jehova panika nani ra latwan kaikisa kaka, “Apia pali!” wibia.

¹⁷ Jehova sika wan Papaskra, bara wan Rayaka Yayabra sa. Bahamna witin ra latwan kaiki mayunaia sa (Param marikan [Reveleshan] 4:11). Bara kristian kangrigisanka witin yus muni ba yawan ta baiki kaia sa (Hibru nani 13:17). Baha mita, muihni-lakri kum wal trabil brisuya taim, yawan praut sa marikaia wisi kangrigisan ba lulki swibia ki? Apia pali aihwa! Kan  Jehova pâtka apia sa. Kau ni, yawan witin ra uba latwan kaiki ba mita, witin ra, bara ai uplika ra sin lulki swibia apia! (Lawana 119:165.)

18. a) Kangrigisan ra kupia kumi laka bara kaia sa kaka, yawan dia daukaia sa ki? b) Padin munaia raitka bara sa taim, yawan upla mistikka swih tikbia kaka, dia blisinka bribia ki?

¹⁸ Wan muihni-lakri nani ra latwan kaiki ba mita wan nikbisa kangrigisan ra kupia kumi laka bukaia. Latwan laka ba yabisa mistik sirpi nani ba purak lubia, kan yawan sut mistik taki ba pain nu sa (Sins laka 17:9; 1 Pita 4:8). Jehova bui ai panika nani mistik luha kabia makabras sa kaka, dia muni yawan baku makabia ki? Latwan laka ba sika help wan munisa pana pana wan swakwanka nani “swih tiki [kaia]” (Kolosi 3:13). Baku daukaia ba isi lika apia sa. Ban kra wan kupia lapta ba mita yawan lukisa praut takisi saura wan munan uplika ra laui daukbia. Sakuna raitka pali ba sika, ai kupia baiki uplika ba, selp ai wîna ra kau saura munisa. Baha mita, padin munaia raitka bara sa kaka, swih tiki bas (Luk 17:3, 4). Baku lika, wan kupia ra, kangrigisan ra, bara Jehova wal kat sin blisin ailal kupia kumi laka sin bribia (Matyu 6:14, 15; Rom 14:19).

19. Dia tawan upla kum kum wina yawan saitra takisa ki?

¹⁹ Sam taim, wan wisa kangrigisan bilara kan uplika kum wina yawan saitra takbia. Baku takisa, kan kristian kum Gâd lâka kriki ai kupia lakras sa kaka, kangrigisan wina kangbi sakaia sa. Bara upla kum kasak lukan ba mapara bui, kunin man smalkisa, apia kaka kangrigisan wina selp dakwi takisa taim, uplika ra sim baku daukisa. Baku taim Baibil ra param wisa: “Witin [nani] wal taukpara” (1 Korint 5:11-13; 2 Jan 9- 11). * Baha uplika wan taya, apia kaka wan panika painkira sa kaka, saitra kaia uba karna sa. Sakuna, wapni bapi bubia sa kaka, Jehova ra, bara ai lâka sin kau tara kulki ba marikisa. Baku bara, yawan dia daukbia? Uplika wina saitra kabia ki? Wan auya tikbiara upla wapni bila wali nani ra Jehova bui tara pali kulkisa.

20, 21. a) Kangrigisan wina upla kangbi saki ba, Jehova latwan wan kaiki ba nahki marikisa? b) Dia muni wan panika nani pain wahbi briaia sa ki?

²⁰ Raitka pali ba sika, kangrigisan wina upla kangbi saki ba, Jehova latwan wan kaiki ba mita sa. Dia muni? Pas baku, upla kum ra kangbi saki taim, Gâd nina hulikira ba, tanka sut mapara latwan kaiki ba marikisa (1 Pita 1:15, 16). Baku sin, diara saura wina kangrigisan ra kaina kahbisa. Ya ai kupia lakaia want apia i ba wina, muihni-lakri wapni nani ra main kaiki brisa. Baku lika, tasba saura na ra, kangrigisan ba Gâd dukya dauki kaia yukuwaia pliska kum takisa (1 Korint 5:7; Hibru nani 12:15, 16). Bara yuhmpa baku, saurka daukan nani ra latwan kaiki ba marikisa. Kan kangbi sakuya taim, saura dadaukra kupia nikban kabia, bara ai kupia laki muni, Jehova ra kli taubia kaia sa (Hibru nani 12:11).

²¹ Au sika! Wan panika nani mita pain ku, apia kaka saura ku wan brihwisa. Baha mita aman wahbi briaia sa. Jehova panika nani wal pana taki, witin yaura latwan kaiki ba ra yawan sin latwan kaikbia sa kaka, pana kau pain nani ba wan lamara bri kabia. Bara baku mika, witin nani wina diara pain kum brih, Gâd kupia laka kat iwaia help wan munbia.