1-3. a) Dia muni yapti nani ba ai luhpia nani ba pat aihtaban, kwala klin diman sapa aihwakisa ki? b) Jehova mita dia muni ai uplika ba klin kabia want sa ki, bara dia wan nikbisa yawan klin kaia?

TUKTAN ba ai watla wina takras kainara, pat aihtaban, bara kwala klin pain diman sapa yaptika mita aihwakisa. Dia muni ki? Kan nu sa klin sa kaka siknis takras kabia, baku sin nu sa upla wala ai luhpia nani kaiki aisika-yaptika dahra pain, apia kaka saura lukbia.

² Wan Aisa painkira ba sin want sa ai uplika ba klin kabia. Baibil bila “taski apu uplika wal”, witin sin taski apu kabia (Lawana 18:26, [SLN], 1960). * Jehova latwan wan kaikisa,  bara nu sa klin kaia ba wan yamnika dukyara sa. Gâd sin bila kaikisa upla wala mita ai Witniska nani kaikisi, witin dahra pain aisabia. Rait apia Gâd ra, bara ai nina hulikira ba sin sauhkaia yawan want apia sa? Apia pali! Kau ni prana yabaia want sa. Baha mita, wan kwalka, bara wan daukanka ba sin klin bri kaia sa (Isikiel 36:22; 1 Pita 2:12).

³ Diaura luki ban klin kaia trai munbia ki? Taura, Gâd mita upla klin nani ra latwan kaiki ba ra lukbia. Baha purkara sin, yawan Jehova ra uba latwan kaiki ba mita, wan iwanka satka ni ai prana yabaia want sa. Bara baku sin, yawan ai latwanka laka ra ban kaia want sa. Bahamna, kaisa tanka yuhmpa laki kaikaia: 1) Dia muni yawan klin kaia nit sa ki? 2) Klin kaia dia tanka sa ki? bara 3) Nahki muni ban klin kaia sip sa ki?. Naha laki kaikaia ba help wan munbia yawan ani wapni mangkaia nit ba kaikaia.

4, 5. a) Ani pas bapanka ba mita yawan klin kaia sa ki? b) Jehova sunuka laka ba nahki tnatka ra ai paskanka ra marikan sa ki?

⁴ Jehova lan wan daukaia dukyara tnatka kum yus muni ba sika, witin bui ai tanka pali mangki ba. Kan Baibil bila: “Gâd [...] baku kaia trai kais” (Epesus 5:1). Tikska na ra sika, dia muni yawan klin kaia pas bapanka ba marikisa: Yawan mayuni Gâdka ba, tanka sut mapara klin, huli, bara sunu pali sa (Libait laka 11:44, 45).

⁵ Jehova sunuka laka ba, ai satka bara ai daukanka ba sin, ai paskanka yawan kaikaia sip ba ra param sa (Rom 1:20). Tasba ba wan watla klin kabia dukyara paskan sa. Kan tasba paskanka ra lâ kum kum bara ba, li, pasa ba sin selp klin takbia dukyara mangkan sa. Yula sirpi nani, klin munaia wark tatakra nani baku dipasta saura ba pih klin ra lakbia dukyara paskan. Bara ai warkka uba pain dauki ba taka, kabu ra lat siksa ni taski daukan ba, bara upla gridika laka mita tasba ra taski wala nani sin dauki ba klin  munaia wisi, tasba sinska lan uplika bui naha yula sirpi papira nani na yus munisa. “Dawan, ai karnika ni tasba paskan” ba, klin laka ra uba luki ba latan sa (Jirimaia 10:12). Rait apia yawan sim sat lukikira kaia sa?

6, 7. Jehova uplika ba klin kaia sa tanka ba, Moses Lâka ra nahki marikan sa ki?

⁶ Dia muni yawan klin kaia bapanka wala ba sika naha: Jehova wan Wihta Kau Tara ba makabisa ai uplika ba klin kabia. Naha tanka ra, Israel uplika ra lâka yaban ba marikan mayunaia ba, sunu kaia ba wal asla wilkan sa. Baha mita prîst wihta tara ba Pâtka Swih Tikaia Yua ra, aima kumi lika apia, sakuna aima wal aihtabia adar munan (Libait laka 16:4, 23, 24). Baku sin win prîst nani sut ba, Jehova ra sakripaiska nani brisi yabras kainara, ai mihta, ai mina sin sikban kaia kan (Impakan sturka 30:17-21; 2 Kronikas 4:6). Lâka ba tilara sin, diara 70 taka Israel uplika kum ai wîna tara mapara, apia kaka mayunaia ba mapara taski takan dukyara aisi kan. Taski kaka, mayunaia sip apia kan win. Bara bila walras kan kaka, prura mihta ra kahbaia sip kan (Libait laka 15:31). Lâ kat kli sunu takan kabia wisi, uplika ba ai kwalka tuskaia bara li ni aihtabaia kan. Apia kaka “kyamka ba tila wina dakbi sakan kabia”, wibia sa kaka uplika ra iki tikaia kan (Kulki kaikan 19:17-20).

⁷ Wel au, yawan Moses Lâka munuhtara apia sa. Sakuna lâka nani na help wan munisa Gâd nahki luki ba kaikaia. Mayuni uplika ba klin kabia Jehova makabi ba param sa. Bara witin aihka sat wala takras (Malakai 3:6). Patitara baku naiwa kat sin mayunra “klin, bara taski apu ba” baman yamni kaikisa (Jems 1:27). Bahamna, klin kaia tanka laki kaikaia ba nit pali sa.

8. Jehova mita dia sat klinka laka yawan bribia want sa ki?

⁸ Baibil ra klin laka aisi ba, wan wîna tara mapara baman  aisaras. Sakuna Gâd mawanra rait klin kaia ba dukyara tanka sut mapara lika —spirit laka ra, wan daukanka laka ra, wan sinska laka ra, bara wan wîna tara laka ra sin— yawan klin kaia sa. Kumi bani dia tanka brisa sapa kaisa kaikaia.

9, 10. Spirit laka ra klin kaia ba dia tanka sa ki, bara rait aihwa kristianka nani ba dia tilara dimras sa?

⁹ Spirit laka ra klin kaia. Tanka ba sika rilidian rait aihwa ba kuninkira ba wal blakaia apia sa. Israel uplika Babilun ra alba baku brin nani ba, Jerusalem mata taki waia kan taim, kaina manas Jehova witin nani ra dia adar munan ba kupiam kraukisma ki? Naku win: “Bal taks, bal taks, [...] diara sakwani ba kangpara, [...] sunu taks” (Aiseya 52:11). Jehova ra kli mayunaia dukyara ai tasbaia ra kli taui bali kan kaka, ai mayunra ba diara taski —Babilun rilidianka ra smalkanka, daukanka, bara lukanka satka ba— swiaia kan.

¹⁰ Naiwa, yawan sin rait aihwa kristianka nani baku rilidian kuninkira ba taski wan munbia apia dukyara aman kaiki kaia sa (1 Korint 10:21). Aihwaki kaia nit pali sa, kan rilidian kuninkira laka ba kir wan kutbisa. Plis ailal ra upla luki, bara liliaka nani dauki ba sin smalkanka kuninkira —upla insaitka ra solka pruaikas kum bri ba baku— wina bal takisa (Smasmalkra 9:5, 6, 10). Sakuna yawan rait aihwa kristianka nani ba rilidian kuninkira smalkanka wina bal taki liliaka nani wal prawaia want apia sa. * Upla wala yamni wan kaikbia wisi mayunra lâka sunu ba yawan krikaia lukras (Wark nani 5:29).

11. Wan daukanka klinka laka ba dia tanka sa ki, bara naha laka ra dia muni yawan klin kabia uba nit pali sa?

¹¹ Wan daukanka klinka laka. Naha sat klin kaia wisi, rug laka sat sat bara ba wina laiura kaia sa (Epesus 5:5, Lâ Raya Wauhkataya [LRW], 1986). Gâd latwanka laka ra ban kaia dukyara naha sat klinka laka uba nit pali sa.  Saptika aula ba ra wi ba baku, upla kristian ba ‘rug laka wina plapaia sa’. Kan baha saurka ra kauhwi ai kupia lakras nani ba, alai pali “Gâd king aimaki ba tasbaia sip ai dukya bribia apia”. Jehova mapara “taski laka baman dauki nani ba” tilara kabia. Bara ai swakwanka ba dikras kaka, “prura wala ba” bribia wisa (1 Korint 6:9, 10, 18, [LRW], 1986; Param marikan [Reveleshan] 21:8).

12, 13. Wan lukanka mita wan daukanka ra dia munisa ki, bara nahki wan sinska klin bri kaia sip sa?

¹² Wan sinska klinka laka. Yawan dia kli kli luki ba, las kat daukisa. Baha mita, diara taski wan sinska, bara wan kupia sin prak alkbia yaban kaka, wan dara walras saurka ra kauhbia (Matyu 5:28; 15:18-20). Sakuna diara yamni klin wal wan kupia bangkbia sa kaka, wapni ra wan platukbia (Pilipai 4:8). Bara nahki muni wan sinska klin bribia ki? Taura, lilia takaia wisi ani dukya wan sinska taski daukaia sip ba wina laiura kaia sa. * Baha purkara, pat pat Baibil stadi taki muni diara yamni wan sinska ra dingkaia (Lawana 19:8, 9).

¹³ Kasak sika! Gâd latwanka laka ra ban kaia dukyara, spirit laka ra, wan daukanka laka ra, bara wan sinska laka ra sin klin kaia sa. Naha yuhmpa sut ba, naha bukka saptika wala nani ra sin laki kaikisa. Sakuna nanara baha yuhmpa wira tnayara mangki, kaisa wala kum —wan wîna tara klinka laka ba— laki kaikaia.

14. Wîna tara klinka laka mapara dia muni upla wala wan tila dimbia apia sip wiras? Tanka mariks.

¹⁴ Wan wîna tara ba, bara wan kir ra sin klin kabia ba nit pali sa. Bahamuna klinka laka ba upla kumi bani bisniska,  wala nani tila dimras kaia sa ki? Kristian kum mapara lika baku sip apia pali sa. Kan bisiura aisata baku, Jehova mita yawan klin kaia sa wi taim, wan yamnika dukyara baman apia sa, sakuna yawan ai nina twilki ba mita sin. Ta krikan ra tuktika dahra aisan ba ra luki kais: Tuktika ba ban taski, kwala rangkara diman kaka, rait apia aisika-yaptika mapara aihka saura lukma? Sim baku, wan rayaka ra, apia kaka wan kwalka dimra satka ba wahra sa kaka, rait apia wan Aisa painkira ra, bara smalki warkka ra sin swira paskbia? Amya tikpara Baibil ra naku wi ba: “Yang nani mita kupia turbanka laka upla kumira sin munras, baku mika upla kumi mita yang nani warkki ba dukyara saura sip aisaras. Sakuna, brin wan daukisa, diara sut bak marikaia, yang nani na Gâd dukya dadaukra” (2 Korint 6:3, 4). Bahamna, dia laka ra wan wîna tara mapara klin kabia ki?

15, 16. Wan taya klin, bara wan kwalka yamni kabia wisi yawan dia daukaia sip sa ki?

 ¹⁵ Wan taya klin, bara wan kwalka yamni laka. Kuntri banira upla ba daukanka sat sat brisa. Sakuna, upla aihkika ba anira iwbia kra sin, sup bara li sin brisa, baha mita yawan bara wan luhpia nani sin pat pat aihtabaia sa. Plun piras, bara plun kangbras kainara, tailit diman kaka, apia kaka bibi napkinka daiki wala mangkan ningkara sin, wan mihta sikbaia sa. Wan mihta sikbi siknis saura —byara sakaia baku— yula nani yaba takbia apia, bara upla prubia apia sin isa. Patitara Israelka ra baku, yawan iwi tanira sin tailit apu kaka, kanka ba bikaia sa (Kli smalkan 23:12, 13).

¹⁶ Wan kwalka ba yamni, bara klin kabia wisi, uba mana skahkankira, apia kaka raya kabia nit apia sa, sakuna pat pat tuskan kaia sa (1 Timoti 2:9, 10). Ani anira kabia sin, yawan want sa wan taya klin, bara wan kwalka yamni ba mita “Gâd wan Sasakra smalkanka ba painkira sa wibia” (Taitus 2:10).

17. Dia muni wan watla bara wan dukya nani ba klin bara asla daukan kaia sa?

¹⁷ Wan watla, bara wan dukya nani. Wan watla ba uba prana skahkankira apia kabia sin, klin bara asla daukan kaia sa. Rait pali wan dukya nani sut ba —wauhtaya twilkaika ba sin— yawan asla aidrubi, bara smalki tauki taim yus munisa kaka, kau pali klin bri kaia sa. Baku lika witnis pain kum aisisa. Kan upla ra smalkisa Jehova ba klin sa mita “tasba sauhki uplika nani ra sauhki tik[bia]” bara ai Kingka laka bak tasba ba paradais kum ra lakan kabia (Param marikan 11:18; Luk 23:43). Wan watla wihki diara wala nani ba sin klin asla dauki bri ba mita, upla wala ba kaikbia paradais tasbaia ra iwaia dukyara yawan ridi takisa.

18. Nahki muni mayunaia watla nani ba kulki ba marikisa?

¹⁸ Mayunaia watla. Wan Aisa painkira ra mayuni pliska ba uba tara kulkisa. Yawan want sa uba klin pali kabia, bara upla raya aula nani ba pranakira kaikbia. Pain paski bri kabia  dukyara pat pat klin dauki main kaiki kaia sa. Naha sut dauki ta baikisa kaka, mayunaia watla rait tara kulki ba marikisa. Kasak sika! Yawan mayuni watla ba klin muni main kaikaia ba diara tara kum sa (2 Kronikas 34:10). Bara aidrubanka tara nani dukyara pliska nani ba dahra sim baku lukisa.

19. Wan wîna tara mapara klin kaia dukyara dia ba daukaia apia sa, bara Baibil ba nahki help wan munisa?

¹⁹ Wan wîna tara mapara klin kaia dukyara diara nani taski wan saki ba —baha tilara sigarit diaia, rum uba diaia, bara daktar adar wankras si, druga sat sat diaia— wina sin saitra kaia sa. Naiwa pyua ra, diara taski sut upla dauki ba nina kumi bani ba Baibil mita wiras. Sakuna Jehova mapara dia muni saura taski kaikisa sapa, wan tanka briaia dukyara smalkanka kum kum wankisa. Jehova ra latwan kaiki ba mita, bara witin yamni wan kaikbia dukyara sin kaisa tila wina smalkanka matsip kaikaia.

20, 21. Jehova ba yawan dia daukbia want apia sa, bara dia muni yawan bila walaia sa?

²⁰ “Naha diara nani pat wankaia win kan, laitwankira nani, yawan wan wîna taskika, wan spiritka taskika sin sikbi saki klin takpi, Gâd sibrinka ra sin huli laka aiska puk dauki kap” (2 Korint 7:1, [LRW], 1986). Kaiki ba baku, Jehova want sa wan wîna ra, apia kaka wan spiritka —wibia sa kaka, wan sinska ta bri ba ra— dia dia taski dauki ba wina saitra kabia. Baha mita, alba wan bri taskika nani, wan sinska bara wan wîna tara yamnika laka sauhkaia sip ba yawan daukras.

²¹ “Wan wîna taskika, [bara] wan spiritka taskika sin sikbi saki klin” briaia ba dukyara, tikska na ra kasak wan kupia bukisa. Kan 2 Korint 7:1 ba taura wisa: “Naha diara nani pat wankaia win kan”. Dia wankaia win kan ki? Kanra naku wisata: “Bara mika yang mita mai brimna, bara yang  baman man nani Aisikam kamna” (2 Korint 6:17, 18). Dupali painkira sa! Aisa kum ai luhpia nani ra main kaiki ba baku, Jehova main wan kaikbia wisa. Sakuna “yawan wan wîna taskika, wan spiritka taskika sin sikbi saki klin” takbia kaka lika, daukbia. Rait apia sinskas dukya kum sa, diara kum Jehova taski kaiki ba yawan dauki kaia dukyara witin panika laka ba tikaia?

22-25. Ani smalkanka nani help wan munbia diara taski nani ba wina laiura kaia?

²² “Dawan Gâdkam ra latwan kaikma, kupiam aiskakira, solkam aiskakira, sinskam aiskakira ni sin” (Matyu 22:37). Jisas bui win lâka nani sut tilara naha ba kau tara sa (Matyu 22:38). Kasak sika! Kan wan kupia, wan solka, bara wan sinska aiskakira ni Jehova ra latwan kaikaia ba aitani pali sa. Sakuna baku daukaia wisi, dia dia wan sinska blaki, wan rayaka tiki ba tila sin dimras pali kaia sa.

²³ “[Jehova] mita [...] upla sut ra rayaka yabisa, pasa, diara wala nani sin sut” (Wark nani 17:24, 25). Wan rayaka ba sika, Gâd prisantka kum sa. Prisantka Yayabra na ra latwan kaiki ba mita, prisantka ba tara kulkisa. Baha mita, dia dia wan wîna tara sauhkaia sip ba daukras. Kan yawan pain nu sa baha daukisa kaka, raya kaia prisantka ba mayara kulkisa (Lawana 36:9).

²⁴ “Man wînam baku uplikam ra sin latwan kais” (Matyu 22:39). Diara taski daukaia laik uplika ba, ai wîna ra baman sauhkras, sakuna ai kir ra uplika ra sin. Sigarit di uplika ba tanka kum sa. Kan kyasma lulki ba witin ra, bara sigarit diras nani wîna ra sin sauhkisa. Ya ya baku dauki ba, ai walka ra latwan kaikaia lâka ba krikisa, bara Gâd ra sin rait pali latwan kaikras ba marikisa (1 Jan 4:20, 21).

²⁵ “Ta bri nani, bara wihta nani ra sin baubia” (Taitus 3:1). Plis ailal ra druga diaia, bara wan mihta ra sin druga briaia ba lâ krikanka tara kum sa bamna, rait aihwa kristianka baku yawan druga bisniska wal prawras (Rom 13:1).

26. a) Gâd latwanka laka ra ban kaia dukyara, dia daukaia sa ki? b) Dia muni Gâd nakra ra rayaka klin kum brih wapaia ba kau lilia wan sakisa?

 ²⁶ Gâd latwanka laka ra ban kaia wisi, diara kum kum mapara klin kaia, kuna wala nani ra lika taski kaia ba bahki sa. Tanka sut mapara wan rayaka klin kaia sa! Wel au, daukanka taski nani ba swisisi, kli mina prukaia apia ba karna kabia kaia sa. Sakuna, sip sa! * Amya tikpara, rayaka klin kum brih wapaia lilia wan saki ba baku, diara wala apu sa. Bara Jehova baku makabisa kaka, wan yamnika dukyara sa (Aiseya 48:17). Baha purkara sin, wan kupia ra lilia sakisa, kan nu sa wan Gâdka wal pana pana latwan kaiki ba tawan witnis pain aisi ba marikisa.