Apastil Pâl ba 1 Korint 6:1-8 ra muihni-lakri tilara unsaban takan nani dahra ulban. Taura laui aisi win diakan Korint ra kristian kum kum ba pana pana “sibrin apu wihta idan nani ra wih lâ dimbia” pliki kan (burska 1). Baha wina win, kanra kau yamni sa unsabanka nani na kangrigisan ba kat wapnika mangkbia, lâ wihta watla ra wih muni lika apia. Dia muni baku win sapa dukyara bapanka karna kum kum yaban ba, bara ahkia lika lâ wihta kat waia sip sa kra ni kaisa laki kaikaia.

Jehova want sa lalah bisniska tawan blahwanka takuya taim, witin luki ba kat wapnika mangkbia, yawan luki ba kat lika apia (Sins laka 14:12). Jisas smalkan baku, unsaban kau tara takras kainara isti muni aihni wapnika mangkbia aitani sa (Matyu 5:23-26). Uba sari kuna kristian kum kum lika, pana pana unsaban kau tara buki las kat lâ watla sut ra sin diman sa. Pâl bui win: “Pana pana [...] unsaban brisma ba latan marikisa bara, aiska pali kauhwram sa”. Dia muni ki? Kan baku dauki muni kau pali wan Gâdka nina huli ba wihki kangrigisan ra upla kulki ba sut sin sauhkaia sip sa. Baku yarka takbiara wisi, Pâl naku win ba kat daukaia sa: “Kau pain kabia, yarka wataui mai munaia ba?” (Burska 7).

Pâl sin smalki win blahwanka ailal wapnika mangkaia dukyara Gâd bui tnatka kum —kangrigisan almukka nani ba— wankan sa. Baibil stadi taki ba tingki witin nani sins laka sut alkan sa. Kasak sika! Pâl win baku “yu bani bri bisniska nani dukyara” almuk nani mita “upla ai muihni wal unsaban bri ba lâka daukaia” sip sa (burska 3-5). Baku sin Jisas win, saurka kau tara —wan nina sauhkan, apia kaka kunin muni implikan laka sat pâtka nani— tawan blahwanka wapnika mangkaia wisi, diara yuhmpa daukaia sa: Pas pali saitra walkam ba wal kupia kumi takaia. Diara takras sa kaka, witnis aisabia dukyara upla kumi apia kaka wal  bakahnu kli asla aidrubi bangwaia. Ba’kat sin diara takras sa kaka, las baku kangrigisan tawan aisasara nani ra —wibia sa kaka, almuk nani ra— waia sa (Matyu 18:15-17).

Wel au, almuk kaia ba, dis lâ uplika, apia kaka lalah bisniska pura kakaira baku pulaia raitka yabras. Bara muihni-lakri tilara lalah tawan blahwanka kum nahki wapnika mangkaia lâka bapras. Kau ni ai warkka sa, kristian wal sut ba, Baibil lâka kat dauki kupia kumi takbia help munaia. Trabilka ba isi apia sa kaka, Impaki Pura Kakaira ra, apia kaka Jehova Witniska nani apiska tara ra aisabia. Ban sakuna, tanka kum kum mapara, ban kra Pâl win ba kat sip daukras. Kaisa bahamuna kum kum kaikaia.

Upla lâ dingkaia ba ban saura apia sa. Sam taim lâ tanka kat baku makabisa, apia kaka upla wal kupia kumi takaia wisi nit pali sa. Naha tanka mapara ban kra man diburs takaia ba, luhpia pakma raitka briaia ba, plun mana maikbia adarka sakaia ba, aksidint mana makabaia ba, kampani kum ra lâ paskaia ba, apia kaka pahni kum lâ kat briaia dukyara sut sin lâ dingkaia nit kabia. Bara kau sin, sip sa muihni-lakri kum ra lâ ra dingkan taka, panaura ai kaina kahbaia wisi upla lâ ra dingkaia nit ai dara walaia. *

Nahamuna mapara kristian kum unsaban bukaia lukraskira lâ watla ra wisa kaka, spirit hulikira bak Pâl tanka ulban mapara apia sa. * Wan auya tiwbiara kristian kum diaura kau luki ba: Jehova nina ba huli kulkan kabia, wihki kangrigisan ba kupia kumi takbia. Kraist kulmara taukisa bamna, diara sut purkara, wan latwanka laka ba sika param kaia sa. Bara bahamuna “ai dukya pali plikras” latwanka sa (1 Korint 13:4, 5, Lâ Raya Wauhkataya, 1986; Jan 13:34, 35).