1-3. a) Jehova bui ani prisantka wankan sa, bara nahki muni saura yus munaia sip sa? b) Gâd latwanka laka ra ban kaia want sa kaka, wan twisa ba nahki yus munaia sa?

UPLIKAM kum ra yul kum prisant yabram. Sakuna uplika ba mita yula ba ra tatuski, upla wala nani ra sami latwan yaban swin waluma kaka, rait apia man uba sari damra walma?

² Jehova mita aisaia sip kaia laka ba prisant wankan. Witinka “diara pain bara kasak nani” Yayabra sa (Jems 1:17). Prisantka na sika, daiwan nani ra yabras, sakuna upla ba baman ai kupia luki dara wali ba aisi marikaia sip sa. Ban sakuna, prisantka na sin —taura yula tanka aisata ba baku— saura yus munaia sip sa. Au sika! Upla ailal ai kupia lukras wala nani ra saura munaia wisi wahra aisisa. Baha sut kaiki si, Jehova rait sari lukisa kaia sa!

³ Gâd latwanka laka ra ban kaia want sa kaka, Gâd want ba kat wan twisa yus munaia sa. Baha mapara diara yukukras Baibil ba naku wisa: “Sturi aisi bangwisma bara, uplikam mapara bila saura lika aisapara, sakuna help munaia bila ni aisas, dia witin want dukya ba yama bara baha wal pawbia, bara bahamuna bila aisaram wali uplika ba mapara helpka pali sa” (Epesus 4: 29). Yawan dia sat sturka aisaia apia sa, bara upla ta baikaia wisi nahki wan twisa yus munaia ba sin tisku laki kaikbia. Sakuna pas pali diakan wan twisa alki takaskaia nit sa tanka dahra kaisa laki kaikaia.

4, 5. Wan twisa karnika bri ba dukyara, Sins laka ra tiks kum kum ulban ba dia wisa?

⁴ Diakan yawan wan twisa alki takaskaia nit sa pas bapanka ba sika naha: Wan twisa ba karnika brisa. Bahamuna karnika ba dahra Sins laka 15:4 bila: “Latwan luki wan twisa tawa aisi ba, raya kaia dusa sa, kuna wahra aisi kaka, upla spiritka sauhkisa”. Li kauhla pain kum dih karnika wanki ba baku, twisa kum yamni aisi ba upla kupia kriwan bukaia sip sa. “Kuna wahra aisi” ba lika upla kupia batakisa. Kaikan baku, wan twisa ni upla kupia bukaia, apia kaka upla kupia mayara ikaia sip sa (Sins laka 18:21).

⁵ Wan twisa karnika tara bri ba dukyara latan aisi, Sins laka 12:18 ra sin naku wisa: “Upla tila nani aisi ba ispara wan sabi ba baku sa”. Aman lukras sturi bahki aisi tauki ba tawan, upla kupia insauhkisa, bara upla wal pana laka ba sin sauhkaia sip sa. Yu kum saura  mai aisan taka kupiam ra saban baku damra walram ki? Wel, tani wala ra sin, sim tikska ba naku wisa: “Sakuna sinskira nani aisanka ba lika help wankisa”. Ya ya Gâd sinska laka ni brih wapaia trai munisa kaka, aman luki yamni aisi upla kupia rakisa, bara ban upla panika takisa. Yu kum upla kum pain mai aisan taka kupiam bukan dukyara kupiam kraukisma ki? (Sins laka 16:24.) Wan twisa ni aisi ba, karnika tara bri ba dukyara wan auya tiwbiara. Baha mita, yarka upla ta baikaia dukyara yus munaia, kuna upla ra saura munaia dukyara lika apia.

6. Diakan wan twisa alki takaskaia ba isi apia?

⁶ Ban sakuna, yawan kasak trai munan kabia kra sin, sam taim mistik aisabia. Bara baha ba mita, diakan wan twisa alki takaskaia nit sa bapanka wala ba sin takisa: Wibia sa kaka, yawan bilara saurka laka bui, wan twisa saura yus munaia ra wan tukbisa. Baku sa, kan yawan aisi ba wan kupia wina bal takisa, bara Baibil bila “upla kupia lukra ba, [...] saura ra baman luki ban sa” wisa (Blasi sturka 8:21; Luk 6:45; Jems 3:2-4). Wan twisa ba kasak pali prais kat sip alki takaskras kabia sakuna, yu bani kau yamni laka ra yus munaia dukyara lika trai munaia sa. Upla kum awala kum aubrika ba mapara yawi ba baku, yawan sin wan twisa mita saura ra wan aubi ba mapara aiklabaia sa.

7, 8. Yawan sturi aisi ba, Jehova bui dia prais kat wali kaikisa ki?

⁷ Diakan wan twisa alki takaskaia nit sa bapanka yuhmpika ba sika naha: Yawan sturi aisi ba Jehova bui wali kaikisa. Dia sat yawan aisi ba mita sip sa wan walka mapara, sakuna Jehova mapara sin pât ra wan dingkaia. Jems 1:26 ra nahki wi ba kais: “Upla kum wisa, witin kristian, sakuna ai twisa ba sip alki takaskras kaka, ai wîna ra kunin munisa, bara ai kristianka laka ba bahki  sa”. * Saptika luan ra kaikata ba baku, yawan dia sat aisi ba wihki Jehova ra mayunra yabi ba wal asla sa. Wan twisa yari sturi puisinkira aisi tauki upla kupia insauhkbia swibia kaka, Gâd warkka sut yawan dauki ba, Gâd bui bahki kulkbia. Rait apia aitani sa, yawan dia sat aisi ba aman laki kaikaia? (Jems 3:8-10.)

⁸ Diakan wan twisa alki takaskaia nit ba dukyara, bapanka yuhmpa pat laki kaikan sa. Sakuna nanara, dia sat sturka aisaia apia sa, bara upla ta baikaia wisi nahki wan twisa yus munaia ba tanka dahra sin kaisa laki kaikaia.

9, 10. a) Dia sat aisaia ba pura luan yu bani walisa ki? b) Dia muni sturi taski kas nani ba wina saitra kaia sa? (Wahya mina ba sin kais.)

⁹ Kas aisaia. Naiwa pyua ra, sturi taski kas nani ba pura luan yu bani takisa. Upla ailal bara sa, kau karna aisaia wisi, apia kaka ai bila pain aisaia lan apu ba mita, mahka bahamuna aisisa. Bara tilivisan ra sin upla kikbia wisi, yok aisasara nani ba kas laka ra sturi nani aisisa. Sakuna kikaia dukya apia sa. Kan pat 2.000 mani luan ra, Pâl bui Kolosi kangrigisanka ra ulbi win “saura aisaia ba” mahka swibia (Kolosi 3:8). Bara Epesus kangrigisanka ra param win: “Bila taski nani sin aisapara” (Epesus 5:3, 4).

¹⁰ Wan Aisa painkira ba, bila taski nani ra saura kaikisa. Baha mita yawan sin saura kaiki yus munras kaia sa. Pâl win “taski laka” ba, “wan wîna tara brinka warkka saura nani” dauki ba tilara sa. Bara kas aisaia ba, baha “taski[ka] laka” ra dimisa (Galesha 5:19-21). Pulaia dukya  apia sa! Ya ya kas nani param aisisa kaka, apia kaka tanka wal bri sturka taski nani ban aisi tauki kabia uplika ba ra, dia takbia ki? Taura, uplika ra smalki laui daukbia. Sakuna, ai kupia lukras ban wahra aisi taukisa kaka, kangrigisan ba wina kangbi sakan kabia. *

11, 12. a) Ahkia lika upla dahra aisaia ba saura sa? b) Yawan ba, dia muni upla nina sauhkaia apia sa?

¹¹ Upla dahra aisi, apia kaka nina sauhkaia. Upla aihkika ba, upla wala rayaka ba dahra ban aisisa. Upla dahra aisaia ba, ban saura sa ki? Help muni pain laka ra —dis ya bisi aihtabi takan, apia kaka ya spirit laka ra ta baikanka nit ba dukyara baku— aisisa kaka, trabil apu. Patitara kristianka nani ba sin, ai muihni-lakri nani yamnika ra uba luki ai dahra aisan (Epesus 6:21, 22; Kolosi 4:8, 9). Sakuna, upla tanka warban, apia kaka upla bisniska tila dimi dahra aisaia ba lika saura sa. Baha sat dahra aisaia ba sip sa diara kum kau saura pali ra wan brihwaia: Wibia sa kaka, upla nina sauhkaia. Nina sauhkaia ba dia sa ki? Miskitu diksiunariuka kum MECD mita ulbi sakan ba bila “kunin laka ra [upla ra] pâtkira kulkaia” tanka sa wisa. Baha laka ra Parisi nani mita Jisas nina ba sauhkaia wisi ai dahra kunin aisan (Matyu 9:32-34; 12:22-24). Upla nina sauhkaia ba blahwanka sin bukisa (Sins laka 26:20).

¹² Upla latubi, apia kaka tuski upla tilara unsaban buki tauki nani ra, Jehova bui nahki kaikisa? Witin mita baha uplika nani ra pain kaikras. Kau sin, muihni-lakri tilara unsaban buki nani ra misbara kaikisa  (Sins laka 6:16-19). Wan auya tikbiara Baibil ra “nina sasauhkra” aisi ba, Grîk bila kum di·aʹbo·los wi ba wina ulbi lakan sa. Bara Setan —baha Gâd nina sauhki ba— dukyara aisi taim, sim bila ba yus munisa (Param marikan [Reveleshan] 12:9, 10). Yawan kumi sin “debil” kum, wibia sa kaka nina sasauhkra kum takaia want apia sa. Kan nina sauhkan laka ba dukyara, bara “wan wîna tara brinka warkka saura nani” bali ba tila wina —“misbara kaikaia” bara “tar baiwan laka” baku ba— dukyara sin kangrigisan bilara plis apu pali sa (Galesha 5:19-21). Baha mita ya ya kabia dahra, dia dia kabia sin aisaras kainara aman selp luki kais: “Aisamna ba rait sa ki? Wala nani ra laki wimna kaka, latwan laka marikisna ki? Upla wala ba, sturka na walaia nit sa ki?” (1 Tesalonaika 4:11).

13, 14. a) Swira dauki praut aisaia ba upla ra nahki saura munisa ki? b) Upla swira dauki praut aisi nani ba sut, ani trabilka ra dimaia sip sa?

¹³ Upla swira dauki praut aisaia. Pat kaikan baku, wan twisa ni upla ra saura munaia sip sa. Wel au, sam taim yawan saura aisan taka sari lukisa. Ban sakuna, Baibil ba wan kupia kraukisa, kangrigisan ra, bara wan pamalika bilara yawan sip aisaras satka kum bara sa. Kristian nani ra Pâl naku win: “Kupiam tahplika nani sut ba mahka swis, brinka saura nani, kupiam baiwanka nani, bara upla ra pura wini swira daukaia laka nani” (Epesus 4:31). Ulbi lakanka wala nani ra “pura wini swira daukaia” bila ba dukyara “saura wiaia”, “praut aisaia”, bara “unsaban bila” sin mangkan sa. Baku aisaia ba —tilara upla ra nina saura mangkaia, taibi rau sauhki muni karna wiaia— satka sut ba, upla swira paski ai kupia mayara batakisa. Bara tuktan nani ba, ai tanka uya apu, swapni bangwi ba mita, baku sat aisaia kau pali latwan yabisa (Kolosi 3:21).

 ¹⁴ Baibil ba latan pali wisa, baha sat aisi nani ba trabil dimaia man sa. Kan ya praut aisi upla ra swira dauki saura wiaia laik ba ra, dia takaia sip sa? Taura lika, wapni takbia dukyara help yabia. Sakuna, bila walras sa kaka, kangrigisan ba wina kangbi sakan kabia. Bara tasba raya blisinka nani ul ba sin tiwaia sip sa (1 Korint 5:11-13; 6:9, 10). Bahamna param sa! Yawan Gâd latwanka laka ra ban kaia dukyara, kunin laka ba, praut aisaia laka ba, bara ani ani wan walka kupia bataki bila bahki nani sut ba lulki swiaia sa.

15. Dia sat bila aisanka ba upla ta baikisa ki?

¹⁵ Dia sat yawan aisabia Jehova want sa ki? Baibil bila, “bahamuna [...] uplika ba mapara helpka” yabi ba aisaia sa wisa (Epesus 4:29). Yawan upla ta baiki kupia buki bila aisaia trai muni bara, Jehova yamni kaikisa. Ban sakuna, “bila tankira” kumi bani aisai ba dukyara lika Baibil ra ulbi wankras (Taitus 2:8). Sturi kum aisuma ba yus brisa sapa nu takaia wisi diara yuhmpa —klin, rait, bara kupia yamni laka ba— bri kaia sa. Bapanka tara yuhmpa na ra luki, kaisa tanka kum kum laki kaikaia. (“ Aisisna Satka ba Upla Kupia Bukisa ki?” ulban ba kais.)

16, 17. a) Dia muni mayuni bila nani wala nani ra wiaia aitani sa ki? b) Kangrigisan ra, bara wan watla bilara sin, dia sat mayuni bila nani wiaia sip sa ki?

¹⁶ Upla mayuni bila nani. Jehova ba, bara Jisas sin nu sa, upla ba nit sa pain dauki ba mita lilia sa wibia (Matyu 3:17; 25:19-23; Jan 1:47). Bara yawan kristian nani ba kau pali baha sat aisaia sa. Dia muni ki? Kan “pana aisaia bila pali ba walaia lilia wan sakisa, sakuna nahki prais kau lilia sa [ai] pyua pali kat walaia” (Sins laka 15:23). Luki kais: Diara pain daukram taka  upla kum mamyunisa taim, nahki damra walisma? Rait apia, kupiam buki lilia takisma? Misar lilia takisma! Kan mamrikisa upla kum man ra luki dia daukisma ba kaikisa. Bara kau karna wark daukaia dukyara sin tam baikisa. Man ra mamyuni bila mai wibia uba tingki lukisma kaka, rait apia man sin upla wala ra mayuni bila nani wiaia sma? (Matyu 7:12.)

¹⁷ Upla dia pain dauki ba kau pali kaikaia trai munbia sa kaka, upla ra mayuni bila nani wiaia ba kau isi kabia. Kangrigisan bilara, dia pain kaikaia sip sma ki? Upla kum aisanka pain kum yaban ba kais. Apia kaka, wahma-tyara kum kangrigisan ra kau wark daukaia trai muni ba kais. Baku sin pat almuk muihni-lakri kum uba siknis, sakuna asla aidrubanka ba dakbras ba kaikaia sip sma. Mayuni bila lupia kum ni sip sa ai kupia alki bukaia. Bara wan watla bilara? Maîa kumi bani ba sin nit sa ai kupia buki bila nani walaia (Sins laka 31:10, 28). Luhpa nani ba sin nit sa upla witin nani ra luki lilia kaiki ba ai dara walaia. Dus kum li, bara lapta sin nit ba baku, tuktan nani ba sin, mayuni bila kum walaia nit sa. Aisa-yapti nani! Luhpiam nani dia pain dauki ba dukyara aihwaki ta baiki bila nani wi bangws. Baku dauki muni, witin nani kupia buki wapni kat wapbia dukyara ta baikisma.

18, 19. Dia muni wan muihni-lakri nani maisanihkaia trai munaia sa ki, bara nahki muni daukaia sip sa?

¹⁸ Maisanihki bila nani. “Upla kupia kriwan ai spiritka umpira luki ba” dukyara, Jehova bui uba lukisa (Aiseya 57:15). Bara sut ra wan wisa: “Pana pana tam baiki [...] swapnikira nani ba help muni bangw[s]” (1 Tesalonaika 5:11, 14). Kasak sika! Kupia kriwan nani ra maisanihkaia wisi yawan dia dauki ba sut Gâd bui uba yamni kaikisa.

 ¹⁹ Bahamna, kupia mayara alahban kristianka kum ra dia wiaia sip sa? Taura, ai kupia bukbia bila kum wis. Wel au, ai trabilka nani wapni mangkras kabia sin, sakuna nu munisma yakan apia sa, kan upla witin ra lukisa. Bara sin, uplika ba wal wan pura sunaia sip sa. Baku taim pain sa Jehova ra bik taki makabaia muihni-lakri ba tanka bribia, wala nani, bara Gâd sin witin ra latwan kaikisa (Jems 5:14, 15). Uplika ra param wis kangrigisan ba witin ra uba lukisa, kan witin ra nit pali sa (1 Korint 12:12-26). Jehova witin ra lukisa wibia tikska kum aisi kaikaia ba sin, help tara kabia (Lawana 34:18; Matyu 10:29-31). Nit ba kat wan taimka yabi, wan kupia munuhta wina “bila yamni” kum ai kyama ra wibia sa kaka, upla witin ra luki ba kaikbia, bara ai spiritka bukan kabia (Sins laka 12:25).

20, 21. Ani bapanka yuhmpa mita munisa kau pain lâ smalkaia?

²⁰ Lâ smalkanka yamni. Mistik taki uplika bangwisa mita, sam taim lâ wan smalkbia nit sa. Baibil bila: “Lâ tanka mai smalki ya ba wals, bara kupia krauki ya ba alki bris, baha mita man almuk takma bara sinskira kama” (Sins laka 19:20). Sam taim kangrigisan almukka nani ba wan smalkisa. Sakuna wala nani sin wan smalkaia sip sa. Aisa-yapti ba, ai luhpia nani ra lâ smalkaia  sa (Epesus 6:4). Kau tanka bri mairin nani ba, tyara nani ra lâ smalkaia wilin kaia sa (Taitus 2:3-5). Nahki kabia kra ni, wala nani ra latwan kaiki ba mita, lâ smalkuya taim, yarka wala ba taibi brisma baku ai dara walbiara. Nahki muni upla ra pain smalkma? Kaisa bapanka yuhmpa laki kaikaia: 1) Wan kupia ra pain luki smalkaia, 2) Baibil dia wi ba kat smalkaia, bara 3) Kupia pain tnatka ra aisaia.

²¹ Taura, smalkai uplika kupia ra pain luki smalkaia sa. Dia mita munisa, wan smalki ba wilinkira bila walaia? Rait apia, upla man yamnikam ra rait luki, mai tumras kaka, mai smalkbia ba, daukaia isi sa? Bahamna, yawan lâ smalkuya taim, baha sat daukaia sa. Baku sin, lâ smalkanka yamni pali playa ba sika, Baibil ra bapan kaia sa (2 Timoti 3:16). Baibil aisi kaiki kabia, aisi kaikras kabia sin, smalkai tanka sut ba Baibil wina sakan kabia. Baha mita, almuk nani ba aman kaikisa, selp ai lukanka kat aisaras, apia kaka ai lukanka ta baikbia wisi, Baibil tikska nani tanka sin warbras. Bara las baku, pain tnatka ra aisi smalkisa kaka, kau pain sin takisa. Upla ra kulki praut apu, kupia pain laka ra aisi taim, smalkanka ba alki bribia ba kau isi sa (Kolosi 4:6).

22. Wan twisa nahki yus munbia ki?

²² Kasak pali sa! Jehova mita aisaia sip kaia wan paskan ba sika, prisantka painkira kum sa. Bara wan Aisa painkira ra uba latwan kaikisa mita, prisantka na yawan pain yus munaia want sa. Wan twisa ni upla kupia bukaia, apia kaka upla kupia insauhkaia sip ba dukyara wan auya tiwbiara. Kau ni, Jehova want ba kat —upla ta baikaia dukyara— yus munpi. Baku lika, wan twisa ba, wan lama uplika ba dukyara blisin tara kabia, bara Gâd latwanka laka ra ban kaia dukyara sin help wan munbia.