1. Kau pruras las tihmika ba ra, Jisas ba dia dukyara uba luki kan?

JISAS kau pruras las tihmika ba ra, ai uplika kaina pyua ra dia takai kan ba dukyara luki kan ba marikan. Kan witin nani dukyara ai Aisika ra ai pura suni win: “Naha tasba wina [witin nani ra] mahka sakma dukyara lika mamkabras, sakuna Debil ba wina dakbi sakma. Yang naha tasba wina apia sna ba baku, baha nani man aikram ba sin naha tasba wina apia sa” (Jan 17:15, 16). “Man nani lika naha tasba wina uplika apia sma” win ba sika, tanka tara kum brisa. Kan ai kupia aiskakira ni latwan laka tara brisi makaban (Jan 15:19). Latan sa! Jisas mapara ai uplika nani ba naha tasba wina saitra kabia ba nit pali kan!

2. “Tasba” win taim Jisas ba dia dukyara aisi kan ki?

² “Tasba” win taim Jisas ba dia dukyara aisi kan ki? Tanka ba sika Gâd wina laiura, Setan karnika munuhtara, tara papulra, praut spiritka bri uplika sut ba (Jan 14:30; Epesus 2:2; 1 Jan 5:19). Baku mika, “tasba ra latwan kaikaia laka ba lika, Gâd wal waihla takaia laka” sa (Jems 4:4). Bahamna, yawan naha tasba ra iwi bara, nahki muni tasba wina saitra Gâd latwanka laka ra ban kaia sip sa ki? Diara matsip mita wan munka daukbia: 1) Jisas mihta ra Gâd Kingka laka ba ra ban wapni, bara pulitik tila dimras kaia; 2) Naha tasba spiritka mapara bui kaia; 3) Wan kwalka dimra ba yamni bri kaia; 4) Wan nakra “pain” kum bri kaia; bara 5) Spirit laka ra aiklabaia dukya nani ba ridi bri kaia.

3. a) Jisas ba ai pyua ra pulitik laka ba nahki kaikan? b) Dia muni spirit hulikira ni bak sakan nani ra lengstar makisa ki? (Wahya mina ba kais.)

³ Witin pyua pulitikka ra dimaia watlika ra, Jisas ba Gâd Kingka laka —kaina pyua ra witin King baku aimakai kan gabamintka ba— dukyara smalki tauki kan (Danyal 7:13, 14; Luk 4:43; 17:20, 21). Baha mita, Rom Wihtka Pontius Pailet ra Jisas nan wisata: “Kingki laka ba naha tasba wina apia sa” (Jan 18:36). Bara yawan ai uplika ba, ban witin ra wapni, Kingka laka na maisapahki muni, witin daukan ba kat yawan sin daukisa (Matyu 24:14). Pâl win ba baku: “Kraist tnata mana yang nani lengstar baku wan blikan taukisni, [...] Kraist tawan yang nani mamkabisni, man nani Gâd wal kli uplika takma” (2 Korint 5:20, Lâ Raya Wauhkataya [LRW], 1986). *

4. Rait aihwa kristianka nani ba Gâd Kingka laka ra wapni bapi bui ba, nahki marikan sa ki? ( Wahya 52 ra ulban ba laki kais.)

⁴ Lengstar kum ba sika, king tringsar kum, apia kaka kuntri tringsar kum tawan aisi uplika kum sa. Baha taka mita, blikan kuntrika bisniska tilara dimras. Kau ni, gabamintka mita blikan bisniska tawan aisisa. Bara spirit hulikira ni bak sakan kristianka —“kasbrika purara ba suliarka nani sika”— sim baku lukisa (Pilipai 3:20). Tingki, kan lengstarka nani na Kingka laka ba takaskraskira smalki warkka dauki ba mita, Kraist “syîp[ka] wala” milian milian “Gâd wal kli uplika tak[bia]” dukyara help munisa (Jan 10:16; Matyu 25:31-40). Bak sakan Jisas muihnika nani ta  bri ba mina munuhtara, “syîp[ka] wala nani” na sin, bila twatwilkra baku wark takisa. Daknika wal sut ba, asla pali, syîp nani klar kumi ra baku Misaia Kingka laka bisniska tawan karna wark taki, naha tasba pulitikka bisniska tilara dimraskira wapni bapi buisa (Aiseya 2:2-4).

5. Patitara Israelka ba, kristian kangrigisanka wal dia satka wala brisa, bara baha taka mita kristian nani ra dia munisa ki?

 ⁵ Sakuna Kraist ra wapni kaia purkara, diara wala mita sin, rait aihwa kristianka nani ba pulitik tila dimras sa. Patitara Israel uplika sut ra Gâd mita kuntrika kum yaban ba ra iwan. Sakuna naiwa wan asla takanka ba lika tasba aiskara yakawisa (Matyu 28:19; 1 Pita 2:9). Baku bara, yawan pulitik daknika kum ta baikan kan kata, nahki kabia ki? Wan kristianka laka asla ba mapara, bara upla sut ra diara yukukras pri smalki tauki ba mapara sin ambuk munaia sip sa (1 Korint 1:10). Bara war pyua ra, wan muihni-lakri yawan latwan kaiki kaia adar wankan ba mapara war aiklabi kabia (Jan 13:34, 35; 1 Jan 3:10-12). Baha taka mita Jisas adar munan ba kat ai disaipelka nani ba war aiklabraskira sa, kau ni ai waihla nani ra latwan kaikisa (Matyu 5:44; 26:52; “ Tila Dimras Sna ki?” ulban ba kais).

6. Gâd ra wan rayaka yaban ba mita “Sisar” ba wal yawan nahki kabia ki?

⁶ Baha sut purkara, rait aihwa kristianka nani ba ai rayaka Gâd ra yaban. Upla kum ra, asla takanka kum ra, apia kaka kuntri kum ra lika apia. 1 Korint 6:19, 20 bila: “Man nani lika man nani dawanka [...] apia sma. Gâd mita mana kum ni mai atkan sa”. “Sisar” ra ai dukya ba —wibia sa kaka, lal mana ba, kulkan laka, bara aitani pitka kat bila walan laka ba— yabisa. Sakuna “Gâd ra sin diara nani Gâd dukya ba” kau pali yabisa (Mark 12:17, [LRW], 1986; Rom 13:1-7). “Diara nani Gâd dukya ba” dia wiaia want sa? Tanka ba sika, wan mayunra ba, kupia aiskakira wan latwanka laka ba, wapni laka ba, bila walan laka ba, bara nit pali sa kaka, wan rayaka kat sin yabaia (Luk 4:8; 10:27; Wark nani 5:29; Rom 14:8).

7, 8. “Na tasba spiritka” ba dia sa ki, bara upla kum ra nahki “ta bri[sa]”?

⁷ Tasba na wina saitra kaia tnatka wala ba sika, ai spiritka  saura mapara buaia ba. Pâl ba naku win: “Yawan na tasba spiritka briras sa; yawan lika Gâd mita blikan spiritka ba brin sa” (1 Korint 2:12). Bara Epesus kristianka nani ra nan wisata: “Pyua luan ra, man nani naha tasba daukanka saura nani ba nina bliki bangwi katma, bara spirit pasa purara karnika bri ba bila wali dauki katma, baha spiritka sika, Gâd bila wali daukras nani ta bri ba” (Epesus 2:2, 3).

⁸ Tasba ra baha “pasa”, spiritka ba dia sa ki? Baha ba sika, sip kaikras karnika kum, upla ba Gâd bila lulkbia maisa kapi, bara “wan wîna tara brinka saura nani ba, wan nakra diara pain kaiki bani brin dauki ba” tanka sa (1 Jan 2:16; 1 Timoti 6:9, 10). Spiritka na mita dia muni tasba uplika purara “karnika” brisa ki? Kan wan wîna brinka nani bukisa. Bara pasa ba baku, latan pali takras, kuna ban upla ra diara munisa. Bara upla kum ra nahki “ta bri[sa]” ki? Kan tawa tawa idan daukanka nani —gridi laka, tara pulan laka, kyamapara, bara praut laka ba sin— upla rayaka ra pawbia yabisa. Bila prahni ra wibia sa kaka, spiritka na mita daukisa tawa tawa Debil daukanka satka nani ba upla kupia ra dimi wabia (Jan 8:44; Wark nani 13:10; 1 Jan 3:8, 10).

9. Dia tnatka ra tasba spiritka ba wan sinska bara wan kupia ra dimaia sip sa ki?

⁹ Tasba spiritka ba sinskam bara kupiam kat dimaia sip sa ki? Au, sakuna aihwakras sma kaka lika (Sins laka 4:23). Taura lika baha spiritka muni ba, wan dara walras dimisa. Ban kra yawan pana pain talia kum brisa, kuna raitka pali, panika ba Jehova ra latwan kaikras (Sins laka 13:20; 1 Korint 15:33). Ban kra sin tanis wauhkataya, internet ku rug laka lilkika, bara Jehova Witniska mapara bui uplika nani wal prawaia, baku sin lilia kaia wisi diara wahra, apia kaka ris muni pulanka nani mita sin, spiritka saura na wan alkaia sip sa. Wibia sa kaka, dia dia Setan bara ai tasbaia luki ba kat wan blakaia sip ba wina sa.

10. Nahki muni tasba spiritka mapara bapi bubia ki?

 ¹⁰ Nahki muni tasba spiritka puisinkira mapara bapi bui Gâd latwanka laka ra ban kabia ki? Jehova mita wan spiritka laka bukaia wisi diara wanki ba yawan brih ai spiritka hulikira bik taki makabisa kaka lika sip sa. Kan Jehova sika pura luan kau tara sa Setan bara ai tasbaia ba wal (1 Jan 4:4). Baha mita wan pura suni Jehova lamara kaia ba misar nit pali sa!

11. Tasba spiritka ba kwala dimaia laka ba nahki sauhkan sa ki?

¹¹ Upla kum ai insaitka ra dia sat spiritka bri ba sika, tnatka sat sat ra latan takisa. Tila wina ai kwalka dimra, bara ai wîna tara klinka laka ba. Sari sa, kan plis ailal ra kwala dimra satka ba mayara pali takan sa. Dia pitka kat mayara takan aisi muni tilivisan aisasara kum bila, tisku rug mairin nani ba kwala kau tanis dimaia sip sakras kabia. Bara tuktan mairin nani kau tyara takras ba kat sin kwalka satka dimi ba dahra aisi muni, piriudiku kum bila tuktika nani na “ai taya marikisa, ai swira lika yukukisa” wisa. Wala nani sin inipis kwalka dimi, kyamapara ai wîna ra kulkras sa marikisa.

12, 13. Wan kwalka dimbia taim diaura luki kaia sa ki?

¹² Jehova suliarka baku, wan kwalka yamni, klin, bara ta munbia kat sin dimisa. “Gâd ra pliki” waitna-mairin nani laka ba kat, yawan “sinska yamni bri [...] tankira” wan kwalka dimra, wihki “wark yamni nani” sin marikaia sa. Kasak sika! Yawan kwalhwaia want apia sa, sakuna “Gâd latwanka laka ra ban [kaia]” lika want sa (1 Timoti 2:9, 10; Judas 21). Kasak pali! Wan skahkanka kau pranakira yawan kaiki ba sika wan “[kupia] bilara kaia sa; [...] baha ba Gâd mawanra kau tara pali sa” (1 Pita 3:3, 4).

¹³ Amya tiwbiara, wan kwalka dimra satka ba mita, rait aihwa rilidianka ba dukyara wala nani ba pain, saura sapa lukbia. Grîk bila wina “tankira” ulbi lakan ba sika, upla kum —yamni dauki laka ra— upla wala nani ra kulki, ai dara walra ra sin luki daukisa tanka sa. Baha mita aitani pali sa yawan ani raitka brisa luki ba watlika ra, wala nani kupia dara walra ra lukaia sa. Yawan mapara kau tara ba sika naha: Jehova ra, bara ai uplika ra sin kulkanka yabi, Gâd napakanka kum baku iwi, “[diara] sut ba Gâd prana  dukyara dauki” kaia (1 Korint 4:9; 10:31; 2 Korint 6:3, 4; 7:1).

14. Wan kwalka, bara wan klinka laka dahra sin, dia ba selp lukaia sa ki?

¹⁴ Smalkaia mata, apia kaka aidrubanka nani ra wisa taim, kau ni wan kwalka yamni klin dimaia sa. Selp luki kais: “Yang kwailka satka, bara taski taukisna ba mita wala nani aihka ai kaikisa ki? Wala nani ra swira paskisna ki? Kangrigisan ra wark takaia dukyara aitani ridi kaia ba watlika ra, yang raitki brisna kau lukisna ki?” (Pilipai 4:5; 1 Pita 5:6).

15. Dia muni wan kwalka, bara wan wîna tara klin yamni bri kaia dukyara Baibil ra sitnika kat aisaras?

¹⁵ Kumi bani wan kwalka, bara wan wîna tara klin yamni briaia dukyara Baibil ra sitnika kat aisaras. Dia muni ki? Kan Jehova mita want apia sa wan sinska, wan prika laka sin kaina dakbaia. Kau ni want sa yawan kumi bani aitani pitka kat spirit laka ra pawi, Baibil tanka pain brih, wan “dara walaia lan, bara pat kaikisa wiaia: Naha na pain bara naha na saura sa” (Hibru nani 5:14). Gâd ra, wan walkara sin latwan kaiki ba mita yawan diara daukbia want sa (Mark 12:30, 31). Gâd lâka bila wali bara, kwala dimra skahkanka prana sat sat sin bara sa. Jehova Witniska nani aidrubanka tara kum ra wama wal baku kwala kalatka painkira sat sat pain diman ba kaikma.

16. Tasba spiritka ba dia tnatka ra Jisas smalkan ba mapara sa ki, bara yawan selp dia luki kaikaia sa?

¹⁶ Naha tasba spiritka mita upla ra mawahkisa. Kan upla ba lilia takaia wisi lalah, bara tasba dukya nani sin plikbia munisa. Ban sakuna, Jisas win: “Upla rayaka ba lika diara ailal bri ba mita raya apia [sa]” (Luk 12:15). Jisas wiras kan yawan diara pain kum sip briras. Sakuna win “solka dukya brin dauki nani ba”, bara nakra “pain” kum bri nani ba —wibia sa kaka, Gâd wal asla spirit dukya nani kau pali pliki uplika nani ba— baman, lilia laka, bara swak takan laka kasak ba bribia (Matyu 5:3; 6:22, 23). Baha mita, selp luki kais: “Jisas smalkan ba rait pali kasak lukisna ki, apia kaka “kunin aisika” ba mita laila blakan sa? (Jan 8:44). Iwisna satka ba mita, aisisna ba mita, bara kainira daukaia lukisna  ba mita sin dia marikisna ki?” (Luk 6:45; 21:34-36; 2 Jan 6.)

17. Nakra “pain” kum bri ba tawan blisinka saki ba dahra aisas.

¹⁷ Jisas bila “sinska laka ba ai daukanka nani bak latan [takisa]” win (Matyu 11:19). Wel, diara tara plikras nani ba mita yamnika kum kum saki ba luki kais: Gâd Kingka laka warkka dauki, auyapah kat iwisa (Matyu 11:29, 30). Ai kupia bara ai sinska turbanka ailal wina tnayara tauisa (1 Timoti 6:9, 10). Diara tara nani plikras ba mita, ai pamalika, bara kristian muihni-lakri nani wal kau taim lui kau asla sa. Baha taka mita kau pain yapisa kaia sa (Smasmalkra 5:12). Ai taimka bara ai mihta ra dia bri ba ai walka wal yui ba mita sin kau lilia iwisa (Wark nani 20:35). Bara baha sut purkara “yamni ailal briaia [...] bila kaikanka sin” ai insaitka ra kupia kumi auyapah laka brisa (Rom 15:13; Matyu 6:31, 32). Dupali aihwa! Blisinka nani na lalah ni sip atki sakras!

18. Waihla nani wan mapara aiklabi ba, bara yawan dia sat aiklabi ba dukyara sin, Baibil ba dia wisa ki?

¹⁸ Setan want sa raya ban kaia laka ba yawan lus tiwbia. Sakuna, Gâd latwanka laka ra ban sa kaka, Setan mapara spirit laka ra wan kaina kahban kabia (1 Pita 5:8). Pâl win: “Yawan aiklabi ba lika, upla aihwa, wîna tara bara dusa nani sin bri ba satka mapara apia sa, sakuna spirit saura nani ai karnika bri ba mapara; kasbrika purara, bara tasba ra sin karnika bri ba, bara wihta kaia karnika alki ba, naha tasbaia tihmika ra ba mapara sin karnika alki ba” (Epesus 6:12). Grîk bila wina “aiklabi ba” ulbi lakan ba sika, laih wina —unta kum salhki dimi ba baku— aiklabi ba laka ra aisaras, sakuna mawan mawan kat aiklabi ba laka ra lika. Baha nani “karnika bri”, “wihta kaia karnika alki ba” dukyara aisi taim marikisa, wan mapara aiklabi  lasa smatkira nani ba mita, nahki wan batakaia dukyara luki ridi takisa.

19. Kristian nani spirit laka ra aiklabaia dukya kumi bani ba wis.

¹⁹ Yawan ba karnika sut apu, swapni bangwisa. Ban sakuna, aiklabi pura luaia sip sa. Nahki muni? “Gâd bui war aiklabaia dukya nani wanki ba” bribia kaka lika (Epesus 6:13). Baha aiklabaia dukya nani ba Epesus 6:14-18 ra wan mariki nan wisa: “Bahamna ban bapi bui bangwi bas, kasakka laka kwalka ba ni dims, bara wapni laka ni kainam suni bas. Man nani pyu bani ridi bas kupia kumi sturka ba smalkaia waia. Baha sut purkara, kasak lukan laka ba kainam kahbaika baku buki bris, Setan trisbaika nani sin pauta klauhwi baku ba sut daskaia dukyara. Swaki sakan laka ba sin lal pura bikaia baku lamla ra baps, spirit hulikira mita wanki sord[ka] ba sin bris, baha sika Gâd bila. Man nani puram sunisma ba swipara, pyu bani Gâd ra bik taki makabi bas, spirit man nani tam briaia”.

20. Tasba suldawika nani wal, yawan ba nahki sat wala sa ki?

²⁰ Spirit laka ra aiklabaia dukya nani na rait pali wan kaina kahbisa, kan Gâd prisantka kum sa. Sakuna pyu bani yawan yus muni kaia sa. Dia muni ki? Luki kais: War apu taim, tasba suldawika nani ba ris takisa. Kuna yawan kristian nani ba lika, ris apu takaskraskira war kum tilara diman sa. Gâd mita Setan tasbaia ra sauhki tiki, lasa nani ra tihu tara ra lulkbia kat, aiklabanka na dan takbia (Param marikan 12:17; 20:1-3). Baku bara, na minit man swakwankam, brinkam saura nani mapara aiklabisma kaka, swapi kauhpara. Jehova ra ban kasak kaia dukyara, yawan sut ba wan wîna ra wipi baku kaia sa (1 Korint 9:27). Sakuna, yawan aiklabras sa kaka, dupali aman lukaia sa!

21. Spirit laka aiklabanka ra, yawan dia dauki baman pura luaia sip sa?

²¹ Latan sa, wan karnika wal baman yawan sip pura luras  kabia. Baha taka, Pâl mita wan kupia kraukisa, wan ta bribia dukyara “pyu bani Gâd ra bik taki makabi [kabia]”. Baku sin, Gâd bila baikra ba walaia sa. Nahki muni? Ai Bila, Baibil ba aisi kaiki, yawan aikuki aiklabi panika nani wal ban aidrubi kaia sa (Pailimon 2; Hibru nani 10:24, 25). Naha sut ban alki daukisa kaka, aiklabi pura lubia. Bara upla kum wan kristianka laka latubia taim, yawan mita tawan aisaia ridi kabia.

22, 23. a) Wan kristianka laka tawan aisaia dukyara dia muni yawan ridi kaia sa, bara diaura selp luki kaia sa ki? b) Saptika aula ba ra dia laki kaikbia?

²² Jisas param naku win: “Naha tasba uplika nani mita misbara mai kaiki[sa], kan nanara man nani lika naha tasba wina uplika apia sma” (Jan 15:19). Bahamna, wan kristianka laka tawan bauikira rispik laka ni aisaia dukyara ridi kaia sa (1 Pita 3:15). Baha mita, yawan kumi bani selp luki kaia sa: “Jehova Witniska nani ba dia muni upla aihkika dauki ba kat daukras ba dukyara tainka pain brisna ki? Bara lâka kum alki briaia sna taim, Baibil ba wihki Alba Kasak Sinskira wi ba ra kasak lukisna ki? (Matyu 24:45; Jan 17:17). Bara Gâd tawan aisisna taim, yang sat wala kaia ridi sna ba, bara baku kaia swiri paskras sa marikisna ki?” (Lawana 34:2; Matyu 10:32, 33.)

²³ Wan batakaia wisi, Setan ba traika kaikanka smatkira sat sat yus munisa. Bara pat win ba baku tnatka kum kum yus muni ba sika: Lilia kaia wisi diara tanis nani, lilka saura nani, bara bahamuna satka dukya nani ba. Sakuna lilia wan saki, wan kupia buki, bara pain wan dara walbia dukya nani ba nahki muni pliki sakbia ki? Saptika aula ba ra, baha dukyara laki kaikbia.