ULBANKA TAKA
Cómo vencer la masturbación
Wan wîna sirpika wal pulaia ba, wan spiritka laka sauhki taskika kum sa. Kan wan sinska ba sakwani ra laki, wan wîna ra baman lukaia munisa. Ya naha dauki ba, wala nani ba ai brinka daskaia dukyara pulaika kum baku kaikbia daukaia sip sa. Ai wîna sirpika wal puli uplika ba, upla ra latwan kaikaia laka ba tnayara swisisi, waitna kum mairin kum wal brih yapi laka ba, dis minitka ra ai kupia brinka laptika ba daskaia dukya kum prais kulkisa. Sakuna, minitka ra man daskisa. Kan ai wîna sirpika wal puli yaba, rug laka, bara taski laka brinka sut ba sip daskras; kau ni brinka ba bukisa (Kolosi 3:5).
Apastil Pâl naku ulban: “Laitwankira nani, [...] wan wîna, bara wan spiritka sut ba taski apu klin bri kap; Gâd sibrin[ka] ra yawan na aiska hulikira takaia sa” (2 Korint 7:1). Upla kum kum mapara, baku klin kaia paiwi ba, karna aiklabaia tanka sa. Sakuna Jehova “wan pâtka nani swih tiki”, ai helpka sin wankaia ridi sa bamna, yarka wan swapbiara (Lawana 86:5; Luk 11:9-13). Ban kra, upla ai mina pruki kauhbia kaia sa, sakuna ai kupia ra sari ai dara wali taskika na pura luaia trai munisa marikisa kaka, upla saura apia sa. Bara wan auya tikbiara “Gâd ba wan kupia wal kau tara sa, bara witin sin diara sut kaikisa” (1 Jan 3:20). Witin wan kaikisa taim, yawan saurka dauki ba baman kaikras, sakuna wan daukanka sut lika kaikisa. Witin wan iwanka sut pain pali kakaira sa bamna, umpira wan kaikbia yawan bik taki makabuya taim, witin mahka umpira wan kaikisa. Baha mita, tuktan kum ai aisika ra wih help makabi baku, bauikira wan kupia aiska ni ban bik taki makabi kap. Au! Jehova ba, wan kupia dara walra ba klin daukaia sip sa (Lawana 51:1-12, 17; Aiseya 1:18). Sakuna, wan pura sunaia baman apia sa. Yawan makabi ba kat warkka daukaia sa: Wibia sa kaka, rug laka marikanka satka sut, bara wan panika saura bri ba wina sin saitra kaia sa. *
Ban minam pruki kauhwisma kaka, aisikam (apia kaka yaptikam) kristian wal, apia kaka yamnikam ra luki spirit tanka bri muihni-lakri kum wal aisas (Sins laka 1:8, 9; 1 Tesalonaika 5:14; Taitus 2:3-5). *
^ baiki.s 2 Lilka saura kaikbia apia wisi, pamali sut kaikaia sip pliska kum ra komputadora ba mangkaia aitani kabia. Baku sin, lilka saura komputadora ra dimbia yabras sat dukya nani mangkaia sip sa. Sakuna ban aihwaki kaia sa.
^ baiki.s 3 Wînam sirpika wal pulisma ba swiaia dukyara, bapanka nani na daukma help mai munbia: Lukankam ba diara wala lukbia yas (Pilipai 4:8). Brinka saura buki dukya wina saitra taks (Lawana 119:37). “Karnika tara aihwa ba” briaia puram suni makabi bas (2 Korint 4:7, Lâ Raya Wauhkataya, 1986). Gâd warkka ailal daukaia bri bas (1 Korint 15:58).
