1-3. a) Upla ailal ba wark ba nahki kaikisa ki? b) Wark ba dahra Baibil ba dia wisa, bara dia laki kaikbia ki?

NAIWA upla ailal mapara wark takaia ba ai waihla baku kaikisa. Yu bani wark tayat laik apia kum daukisa, bara kau sin wark taki awarka nani ba plapras baku kaikisa. Sakuna, ai rayaka aiska baku iwaia nit apia sa. Kan sip sa lan takaia ai warkka ra pain luki witin laik dukya kum baku sin kaikaia.

² Wark karna takaia ba dukyara, Baibil ba uba pain sa wisa. Bara sin wisa warkka taki wihki warkka wina dia saki ba blisin kum sa. Baha mita, Salaman naku ulban: “Yawan pibia, dibia, bara wan mihta warkka daukan nani ba kaikisa kaka, baha ba Gâd wankan sa” (Smasmalkra 3:13). Jehova latwan wan kaikisa, bara yawan ra yamni lukisa bamna wan warkka pain dauki taka yawan lilia taki, blisin sin kaikbia want sa. Gâd lâka kat tauki si, wark dukyara witin luki ba baku yawan sin lukisa kaka, ai latwanka laka ra ban kabia (Smasmalkra 2:24; 5:18).

³ Saptika na ra tanka walhwal laki kaikbia: 1) Karna wark taki yamnika ba nahki kaikaia sip sa? 2) Kristian kum ba dia sat warkka nani sip daukras? 3) Spirit laka warkka ba, wihki wark wala ba wal nahki aitani prais kat daukaia sip sa ki? bara 4) Ani warkka kau tara ba  yawan daukaia sa ki?. Sakuna taura lika, kaisa wark tatakra kau pain wal ba —wibia sa kaka, Jehova bara Jisas Kraist— dahra laki kaikaia.

4, 5. Jehova wark takaia laik ba dukyara Baibil ba dia wan wisa ki?

⁴ Wark Tatakra Kau Tara ba sika Jehova. Blasi sturka 1:1 bila: “Gâd kau diara wala nani sut paskras kan ba taura, kasbrika pura ba, bara tasba ba wal pas paskan”. Tasba ra diara nani sut paski dan takan ningkara “Gâd kaikan baha diara nani sut witin paskan ba, yamni pali kan” (Blasi sturka 1:31). Wibia sa kaka, ai mihta warkka laik kaikan. Param sa, Gâd liliakira sa bamna, ai warkka ra luki lilia saki kan (Lawana 104:31).

⁵ Jehova wark takaia laik ba mita ban diara daukaia brisa. Tasba na sut paski dan takan pyu ailal ningkara sin, Jisas naku win: “Naiwa kat, yang Aisiki ba bui wark takisa” (Jan 5:17, Lâ Raya Wauhkataya [LRW], 1974). Sakuna, dia warkka ban daukisa ki? Heven pura wina, upla ban main kaiki, ta brisa. Baha purkara, “paskanka raya kumi” —spirit wal bak sakan kristianka nani— Jisas wal heven ra king aimakbia wahbisa (2 Korint 5:17; [LRW], 1986). Tasba uplika nani dukyara ai lukanka ba —wibia sa kaka, witin ra latwan kaiki nani ba, tasba raya kum ra ban kaiara iwbia— dukyara ban wark takisa (Rom 6:23). Ai warkka wina ma nani saki ba mita Jehova uba lilia takisa kaia sa. Kan upla milian milian Gâd Kingka laka smalkanka ba wali, Jehova lamara bal ai latwanka laka ra ban kaia dukyara ai rayaka ba Gâd ra lakisa (Jan 6:44).

6, 7. Wark takaia ba dukyara, Jisas ba dia tanka painkira wankisa ki?

 ⁶ Pyu aihwa wina Jisas sin karna wark takaia laik ba marikan sa. Tasba ra kau balras kainara, Jisas mita Jehova ra help munan, kan witin “bak, Gâd mita diara nani kasbrika purara, bara tasba ra ba sut paskan” (Kolosi 1:15-17; Sins laka 8:22-31). Tasba ra balan taim, Jisas ban karna wark taki kan. Tuktan kan pyua wina, witin tat wal diara paskaia lan takan, bara upla mita “karpinta ba” maki kan (Mark 6:3). * Luki kais: Baha pyua ra, tat atki pliska apu kan, sâ, bara pawa yus muni masinka sut sin apu kan. Ai mihta ni baman diara paskan taka, karna wark taki lan kaia kan. Jisas ba unta ra wih, yakan dus kum dakbi, tat sakaia dukyara ai warkka dauki kan pliska ba kat dusa nani ba twilki kan ba luki kaikaia sip sma ki? Baku sin utla playa nani bapi, dur nani mangki, sir, tibil, bara nahamuna sut paski kan bara lukaia sip sma ki? Wark pain kum dauki, lilia wan saki ba witin selp kaiki kan ba param sa.

⁷ Smalki warkka ra sin, Jisas karna wark taki kan. Mani yuhmpa pura bakriki takaskraskira baha warkka ban dauki kan. Upla sut ra smalkan dauki kan bamna, ai taimka tikras kau tama puk bui, tihmia iwan ba kat smalki tauki kan (Luk 21:37, 38; Jan 3:2). “Jisas [ba] taun tara nani, bara taun sirpi nani ra sin impaki, Gâd Kingka laka sturka ba smalki kan.” (Luk 8:1.) Sturi yamni upla ra wih smalkaia wisi, kilamitra manis, pukpuka bri yabalka nani bak wapi tauki kan.

8, 9. Jisas ba karna wark takan ma ba, nahki tnatka ra kaikan ki?

⁸ Jisas ai warkka ma nani ba kaikan ki? Misar kaikan!  Spirit laka ra Gâd Kingka laka tanka kasak saumukka nani uya mangkan ba mita, dakaia nasla nani ailal ridi swin. Gâd warkka ba yaban kau dutki takan. Baha mita smalki plun piras tauki kaia ai kupia lukras kan (Jan 4:31-38). Tasba ra ai warkka ba tnata ra, Jisas ai Aisika ra naku win taim uba lilia kan kaia sa: “Yang mita naha tasba ra mamyunri, bara dia daukaia wisi ai blikram ba sin sut daukri” (Jan 17:4).

⁹ Jehova bara Jisas ba karna wark taki ma ba kaikaia tanka ba wal, wala kau tara kumi sin apu sa. Jehova ra latwan kaiki ba mita, “witin baku kaia” wan nikbisa (Epesus 5:1). Bara Jisas ra latwan kaiki ba mita, “ai mina wapanka nani nina blik[an]” wan daukisa (1 Pita 2:21). Sakuna kaisa nanara, karna wark taki ma saki ba nahki yus munaia sapa laki kaikaia.

10, 11. Warkka ba dahra pain lukaia dukyara, dia help wan munbia ki?

¹⁰ Kristian nani rayaka ra ai warkka takaia ba ai pliska kum brisa. Bara sip ba kat, warkka ba dauki lilia wan dara walaia want sa. Sakuna, warkka dauki ba yawan laik apia sa kaka, lilia kaia isi apia sa. Baku taim, karna wark takisma yamnika ba nahki kaikma ki?

¹¹ Warkka ba dahra pain luki. Ban kra, yawan dia dauki ba sip lakras, sakuna wan lukanka lika lakaia sip sa. Gâd diara kaiki ba baku yawan sin kaikaia ba, wark ba dahra pain lukaia help wan munisa. Naha tanka ra, pamali lalka kum sma kaka, warkka daukisma ba kau mayara baku kulki kabia sin, pamalikam nit ba yabaia help mai munisa. Bara nahamna Gâd nakra ra lika diara tara kum sa. Kan Baibil bila, ya ai uplika main kaikras ba “kasak lukras uplika wal, witin  ba kau saura sa” wisa (1 Timoti 5:8). Warkkam ba Gâd bila walaia sip mai munisa lukuma taim, upla wala sim warkka dauki ba wal man kau lilia warkka daukma.

12. Wan warkka pain wapni daukaia ba, dia muni bahki apia sa ki?

¹² Wan warkka ba wapni laka ra pain dauki. Kristian rait aihwa nani ba, wark tatakra bangwi kaia sa, bara warkka pain daukaia lan takaia sa. Baha sat bangwi si wan baska nani pain wan kaikbia isa (Sins laka 12:24; 22:29). Baku sin, wapni si, diara nani, lalah,  bara taimka sin implikras sa kaka, yamni wan munisa (Epesus 4:28). Bara saptika luan ra kaikata baku, sip sa wan baska nani bui kasak wan lukaia. Sakuna, yawan karna wark taki ba baska nani bui kaikras kabia sin, wan “kupi[a] dara walra na wapni pali bri”, Gâd lika yamni wan kaiki ba pain nu sa (Hibru nani 13:18; Kolosi 3:22-24).

13. Wan warkka ra wan daukanka yamni bri kaia ba taka dia takisa ki?

¹³ Wan daukanka Gâd ra prana yabaia sip ba ra luki. Wan daukanka wapni kaka, wala nani baha latan kaikisa. Baku ba mita, dia takisa? “Gâd wan Sasakra smalkanka ba, pain skahki [...] kabia.” (Taitus 2:9, 10, [LRW], 1986.) Au sika! Daukankam yamni bri kama ba, rilidian rait aihwa prana ba upla latan kaikbia yabisa. Daukankam yamni taka, warkkam panika kum, Baibil tanka kasak ba wali alki bribia kaka, nahki lilia damra walma! Bara diara kau tara na amya tiwbiara: Wan daukanka yamni ba mita, Jehova ra lilia saki, witin ra prana yabisa (Sins laka 27:11; 1 Pita 2:12).

14-16. Wark pliki taim, dia tanka wal wan kupia ra aman lukaia sa ki?

¹⁴ Yawan ani warkka takaia, bara ani takaia apia pali ba, Baibil ra wan wiras sa. Ban sakuna, wark inipis takaia sip sa tanka lika apia sa. Baibil bak, wapni, yus bri, bara kau sin Gâd kupia sauhkras warkka kum pliki sakaia help wan munisa (Sins laka 2:6). Wark kum mapara Gâd saura lukisa sapa, nahki nu takaia sip sa? Diara wal ra luki kaikaia sa.

¹⁵ Warkka na dukyara Baibil ba saura wisa ki? Implikaia, kunin aisaia, bara aidul nani paskaia ba  dukyara, Baibil ba saura pali kulkisa (Impakan sturka 20:4; Wark nani 15:29; Epesus 4:28; Param marikan [Reveleshan] 21:8). Baha mita, ani warkka nahamuna daukaia wan platukbi ba yawan daukras. Jehova ra latwan kaikisa bamna, ai lâka krikaia wan tuski warkka nani ba daukras pali sa (1 Jan 5:3).

¹⁶ Warkka na taki diara saura upla dauki ba ta baiki kamna ki? Luki kais: Apis kum ra wark maikisa. Man  dis telepon ku upla wal aisaia sma. Bara telepon ra upla una kahbaia ba diara saura apia. Sakuna, warkka maiki apiska ba ra, luhpa iki sakisa kaka? Wel au, mihtam pali ni bibi swap lupia iki sakma apia. Ban sakuna, man ban baha warkka takma sa kaka, rait apia apis kum Gâd lâka kriki warkka kum dauki ba ta baiki kama? (Impakan sturka 21:22-24.) Jehova ra uya latwan kaiki ba mita, dia dia Baibil ra saura wi ba aiblakwaia want apia sa.

17. a) Sins bri wark sakaia dukyara, ani bapanka nani aman laki kaikaia aitani kabia ki? ( Wahya 177 ra ulban ba kais.) b) Wan kupia dara walra ba Gâd dia pain kaiki ba kat daukaia help wan munbia dukyara, dia daukaia sa ki?

¹⁷ Sins laka kat wark kum sakaia wisi, baiki sakanka 15 bara 16 ra makabi walanka wal taki ba pain luki kaikan kaka aitani sa. Sakuna, bapanka wala nani sin  aman laki kaikaia bara sa. * Alba kasak yamni ba mita, diara sut mapara lâ kum mangkbia apia. Baku taim, yawan selp aman luki kaikaia sa. Saptika 2 ra kaikan baku, Baibil bakku wan kupia ra lan dauki, yu bani nahki brih wapaia luki kaia sa. Baku lika, “aitani pawan” uplika baku wan “dara walaia lan” takisi, wan kupia help wan munbia Gâd dia pain kaiki ba dauki ban ai latwanka laka ra kaia (Hibru nani 5:14).

18. Dia muni kristianka laka ba ai pitka kat bri kaia isi apia sa ki?

¹⁸ “Tnata yua [...] karna nani” na ra, wan kristianka laka ba ai pitka kat bri kaia isi apia sa (2 Timoti 3:1). Wark kum saki muni ban bri kaia ba karna pali sa. Bara pain nu sa wan pamali nitka ba yabaia wan twilkanka sa. Sakuna, aihwakras kaka, wark wan taibi ba, apia kaka tasba dukya nani latwan kaikaia ba, wan kupia ra dimi spirit laka mapara wan batakbia (1 Timoti 6:9, 10). Dia help wan munbia aitani prais kat wark ra luki, “diara yamni” ba kau pali plikaia? Kaisa baha dahra kau aisaia (Pilipai 1:10).

19. a) Dia muni wan kupia aiskakira ni Jehova ra kasak lukaia aitani sa ki? b) Jehova main wan kaiki ba ra kasak lukisa kaka, diaura wan mina prukras kabia?

¹⁹ Kupiam aiska ni Jehova ra kasak luks (Sins laka 3:5, 6). Witin ra kasak lukbia aitani sa, rait apia? Misar! Kan witin latwan, bara main sin wan kaikisa (1 Pita 5:7). Yawan dia nit ba witin kau pain nu sa, bara ai mihta ban param sa (Lawana 37:25). Baha mita, wan auya tiwbiara Baibil nan wi ba: “Man nani lalah ra  latwan kaikpara; [...] dia brisma ba wal liliam bas, kan Gâd mita naku aisisata: ‘Yang sip ban mai swimna apia, mahka lulki sin mai swimna apia’” (Hibru nani 13:5). Muihni-lakri manis pyu aiska Gâd warkka dauki bangwi ba latan wisa, ai rayaka ra dia nit ba sut Gâd bui yabisa. Jehova main wan kaikbia yawan kasak lukisa kaka, wan pamali nitka ba mapara ban wan kupia  turban dimbia apia (Matyu 6:25-32). Smalki warkka ba, asla aidrubanka nani ba, bara spirit laka ra sut sin, wan warkka tawan aima kumira sin swibiara (Matyu 24:14; Hibru nani 10:24, 25).

20. Wan nakra pain bri kaia ba dia tanka sa ki, bara nahki muni baku kaia sip sa?

²⁰ “Namkra nani ba pain [bris].” (Matyu 6:22, 23.) Isi ra wibia sa kaka, rayakam ra trabil plikpara. Kristian nani nakra ba diara kum ra baman kaiki kaia sa: Gâd kupia laka ba daukaia. Spirit laka ra wan nakra ba pain bapan sa kaka, lalah bara diara tara briaia sin lukbia apia. Baku sin, markit ra dia dia raya nani sut yawan atkaia nit sa wisi pliki kabia apia. Dia wala help wan munisa wan nakra pain kum briaia? Yawan nit apia dukya nani wal tras dimaia apia sa. Uba wari wan muni wan taimka tiki dukya kuki bribiara. Baibil wi ba baku, “yawan na plun bara kwala sin brisa kaka” lilia kaia sa (1 Timoti 6:8). Prahni ra wibia sa kaka, sip ba kat wan rayaka ba isi ra lakbia.

21. Dia muni yawan dia daukbia ba aman luki kaikaia sa ki, bara dia ba taura plikaia sa?

²¹ Spirit laka dukya nani ba taura plikaia. Pyua ba kunhku sa mita, diaura kau lukai ba aman kaikaia sa. Baku apia sa kaka, wan taimka manakira ba, diara bahki ra tiwbia, bara diara kau tara ba lika tnayara swibia. Bara baha diara tara ba dia sa ki? Upla ailal ba, kul tara dimaia, ai warkka ra kulkanka tara briaia ba sin, diara kau tara baku kulkisa. Ban sakuna, Jisas ai disaipelka nani kupia bukan “taura [Gâd] King Aimaki ba laka” plikaia (Matyu 6:33, [LRW], 1986). Au sika! Yawan kristian rait aihwa nani ba, diara sut tila wina Gâd Kingka laka ba pas plikisa. Wan iwanka sut ra —wibia sa kaka, wan lukanka,  yawan dia daukbia ba, bara wan warkka— marikisa yawan mapara lalah briaia ba tasba dukya nani ba wal, Gâd Kingka laka, bara ai kupia laka daukaia ba lika kau tara pali sa.

22, 23. a) Ani ba wan warkka pali sa, bara baha warkka ba yawan kau tara kulkisa sapa nahki marikisa ki? ( Wahya 180 ra ulban ba kais.) b) Wark tanka mapara, ani ba wan lukanka kaia sa ki?

²² Gâd uplika ba pain nu sa tnata pyua ra iwisa. Baha mita, ai warkka kum kau pali dauki bangwisa: Wibia sa kaka, Gâd Kingka laka smalki, disaipel nani daukaia ba (Matyu 24:14; 28:19, 20). Jisas Kraist daukan baku, upla swaki saki warkka ba dauki bangwisa. Nahki muni warkka na taura kahbisa ki? Aihkika nani ba, Smalki Tataukra baku ai kupia aiska ni smalkisa. Wala nani ba Taura Smasmalkra, bara Misiun Uplika baku wark takisa. Bara aisa-yapti ailal ba, ai luhpia nani Gâd warkka daukbia ba tara sa luki, ai luhpia nani pyu aiska smalki warkka ba daukbia dukyara kupia bukisa. Kristian rait aihwa nani sut ba takaskraskira ai kupia aiska ni smalki tauki ba mita, ai “warkka ma nani ba” kaikisa wiaia sip sa ki? Sip sa sika! Kan wan solka aiska ni Jehova warkka dauki si, blisin, lilia, bara auyapah man takisa! (Sins laka 10:22.)

²³ Yawan aihkika ba, wan pamali nitka ba yabaia dukyara, awar ailal wark takaia sa. Baku kabia sin, Jehova want ba kat wan “warkka ma nani ba” kaikaia sip sa. Gâd luki ba kat brih iwisa kaka, wan warkka ra lilia kabia. Ban sakuna, Gâd Kingka laka sturka smalkaia dukyara yarka diara kumi sin mai takaskbiara. Baku lika, Jehova ra latwan kaiki ai latwanka laka ra ban kaia want sma sin param marikan kabia.