Setan bara lasa nani ba upla nani ra kau pyu wihka ra kunin munbia apia. Jehova mita heven wina pat mayara lulkan. (Param marikan 12:9.) Kaina tanira Gâd kli Setan bara lasa nani mapara aiklabia. Apastil Jan ba Gâd wina kaikanka kum brin bara, naku win: “Yang insal wala kum kasbrika pura ba wina bal iwuya kan kaikri, ai mihta ra tihu tara kî ba brih, bara sen tara sin kum. Naha insalka na dragunka ba alkan, baha pyutka almuk ba, witin ka debil bara Setan ba, bara witin ba priskan mani 1,000 prais kat. Tihu tara ra lulkan, bara bahara durka praki baha pura ra sîl mangkan, bara baku nisan nani ra kau kunin munbia apia dukyara, mani 1,000 ba lubia kat”. (Param marikan 20:1–3.) Kaina tanira, Debil bara ai lasika nani ba ban kaiara sauhki tikan kabia. (Param marikan 20:10.)

Upla saura nani ra sin sauhki tikan kabia Tasba na wina. (Lawana 37:9, 10; Luk 13:5.)

Setan bara lasa nani ba upla kaina wina tnayara lakbia ningkara, Jehova mita upla ra blisin nani ailal yabia. Nu bas pruan nani ba rayakas bara apu bangwi ba. Jisas, prura ba upla kum yapisa wal baku prakan...yapan tara kum ra yapi yaprisauhkan kaikras ba baku. (Jan 11:11–14.) Witin baha ba aisan, kan nu kan pruan ra yapi nani sut ba kli raya bukaia pyua ba aimakbia. Naku aisan: “Pyua ba aimakbia, bara pruan nani sut [...] raiti wina buan kabia”. (Jan 5:28, 29; praki kaiks Wark nani 24:15 ba wal.)

Witin nani ra kli naha Tasba ra raya bukbia. Upla kum pruya pyua ra maisapahkanka nani dauki ba watlika ra, pruan wina kli bukbia ba, maisapahkaia liliaka bara kabia! Lilia kabia wan latwankirka nani raiti wina kli balbia bara yamni balram wiaia!