Sakuna dia muni Setan bara lasa nani ba upla nani ra kunin munaia dukyara uba lukisa? Kan witin nani mapara buanka dauki bara, yawan asla prawbia want sa. Wan pura suni mayunbia want bangwisa. Yawan ai kuninka nani ra rait luki diara nani Jehova brinka apia ba daukbia want sa. Naha daukanka nani ailal ba pruan nani ra kulkanka yabi ba tnatka laka wal dingki brisa.

Wan latwankirka kum pruya pyua ra, sari tara wan daukisa bara aitani sa latwanka ba marikaia. Ai panika Lasarus pruan ningkara, “Jisas mahka inan”. (Jan 11:35.)

Tnatka daukanka ailal ba pruan nani wal prakan sa, bara naha nani ba tasba aiskara sat sat ra daukisa. Ailal ba baibil lâka nani mapara apia sa. Ban sakuna, daukanka kum kum ba, pruan nani ba kau raya sa bara upla raya nani ra kaikaia sip sa lukanka ra bapanka brisa. “Nain naitka” daukaia ba, sarka tara bri kaia ba bara bikaia pyua ra priaska dauki nani ba, pruan spiritka nani ra sibri kupia sauhkaia apia lukanka ra ai plamaika brisa. Kan pruan nani ba “diara tanka sin briras”, ba mita ya naha dukya dauki nani ba Setan kuninka laka ba purara bukisa. (Smasmalkra 9:5.)

 Tnatka daukanka nani, apia kaka lilia pulanka wala nani ba, pruan nani ba raya iwi nani ba wina helpka nit sa, bara naha nani ba daskras sa kaka saura munbia lukanka ba wina takisa. Kuntri kum kum ra upla kum pruya ningkara plun pih lilia brih yu nani 40 apia kaka mani kum kat sakripais dauki bangwisa. Witin nani lukisa naha ba pruan uplika ra help munisa spirit nani tasbaia ra ‘luaia’. Daukanka kau ailal dauki ba sika plun bara diaia dukya nani pruan nani dukyara swi ba.

Naha daukanka nani ba aitani apia sa, kan Setan kunin laka pruan nani dukyara dauki ba purara bukisa. Tnatka kum ra, yawan lasa smalkanka bara daukanka nani ra ai plamaika bri ba wal asla prawbia sa kaka Jehova yamni kaikbia ki? Aima kumira sin apia! (2 Korint nani 6:14–18.)

Rait aingwa Gâdka napakanka nani ba, Setan kuninka nani ra tabaiki bangwras. Baha watlika ra, latwan laka wal kau raya iwi nani ra maisanihki, help munisa. Kan nu bangwisa, upla kum pruya pyua ra Jehova baman witin ra help munaia sip ba. (Job 14:14, 15.)

Upla kum kum ba ai wîna pali kat lasa nani aikuki aisisa apia kaka spirit nani wal aisi uplika bakku. Naha ba spirit saura warkka daukanka nina makisa. Sukia laka ba, yumu yabakaia ba, mihta bila aisi kaikanka nani bara pruan nani ra makabi walanka dauki ba, spirit saura nani warkka daukanka tnatka kum kum sa.

Baibil ba naha daukanka nani ra latubi naku wisa: “Man nani wina kumi sin [...] dahra pliki saki warkka sin daukpara, kainara dia takaia ba aisi wipara, sukia warkka sin daukpara, yabaki kaiki uplika wal, dahra saki aisi uplika, bara yapi kaiki spiritka uplika wal sin tankam pliki kaikpara, pruan nani spiritka aikuki sin apia. Naha dukya dauki uplika nani ra Dawan mita saura kaikisa”. (Kli smalkan 18:10–12.)

Jehova naha daukanka nani mapara karna pali laui wan aisisa. Dia muni?

 Yawan wan painka dukyara, Jehova pali laui wan munisa, spirit saura warkka nani satka sut dauki ba mapara. Witin latwankira ba mita upla nani ra lukisa, bara nu sa ya nani lasa warkka dauki ba panis takan ra dimi ba.

Baha uplika kum ba Nilda kan, witin ba Brasil kuntrika ra spirit saura nani wal aisi uplika kum kan. Lasa nani ba ai rayaka ra uba panis muni kan. Bara witin bila: “Spirit nani ba . . . ai dimi, taibi ai bri, daira wali, bara daira walras ra ai brikan, baha mita upla krisi nani watla ra brisi ai dingkan. Kan lasa nani uba saura ai muni kan ba mita sringkira ai daukan. Pain takaia dukyara sika diri, sakuna mani ailal ra sigarit bara laya tahpla ba dih ta krikri”.

Ningkara, Jehova Witniska nani helpka wal, Nilda ba lasa nani karnika munuhta wina pri takan, bara nanara rayaka kum sunu bara tankira wal iwisa. Baha mita witin wisa: “Upla sut ra maisapahkisna aima kumira apia kaka pyu kunhku ra sin, spirit [saurakira] nani tanka ba pliki kaikbia apia”.