Yawan kumi bani ba bak saki briaia dukya kum brisa. Jehova dukya daukaia, apia kaka Setan bara ai lasika nani dukya daukaia. Yawan baha wal sut sip daukras. Upla sinskira nani ba Jehova dukya daukisa!

Yawan pat kaikan ba baku, lasa nani ba upla nani ra latwan yabi bara kunin munaia ba lihkisa. Sakuna Jehova ba baku apia sa. Aisa kum ai luhpia nani ra latwan kaiki ba baku witin upla nani ra latwan kaikisa. Witin ba “diara pain bara kasak nani ba” yabrira sa. (Jems 1:17.) Witin diara pain ba upla nani dukyara kumi sin alki takaskras, witin mapara mana tara kabia sin. (Epesus 2:4–7.)

Jisas Gâd luhpia ba, Tasba ra diara nani daukan bara luks. Witin bilas nani ra yaban aisan bara blain nani ra yaban kaikan. Liparkira bara skahwa nani ra rakan. Lasa nani ra kangbi sakan bara siknis satka sut rakan. Gâd karnika wal, Jisas pruan nani ra kat sin kli raya bukan. (Matyu 9:32–35; 15:30, 31; Luk 7:11–15.)

Gâd ba kunin wan munaia watlika ra, witin yu bani rait ba aisisa. Aima kumira sin upla kum ra kunin munras. (Kulki kaikan 23:19.)

Kukas kum anansi watla kum ra aiblakwi ba baku, upla milian nani ba sukia laka ra, kunin laka ra, pruan nani ra sibriaia laka ra bara lasa nani ra sibriaia laka ra aiblakwi bangwan sa. Bara baha purkara latubanka nani ra, wan kaina tanira pain bara saura takaia dukyara wan wi ba ra, sîka muni nani ra bara tub dukya nani ra uba kulkanka yabi bangwisa. Tnatka bara daukanka nani, Setan Debil kuninka ra ai plamaika bri ba ra, witin nani ra wilki brih bangwisa. Gâd napakanka nani ba naha dukya nani mita swin kunin munras.

Jehova ba kau karna sa Setan ba wal. Man Jehova dukya daukisma kaka, witin lasa nani ba wina kainam kahbia. (Jems 4:7.) Sukia daukanka nani ba saura mai munbia apia. Tanka kum ba, Nigeria kuntrika ra sukia karnakira yuhmpa bara kan ba mita, Jehova witniska kum ai taunka ra waia apia win bara sîka muni ikaia trai kaiki bangwan. Sîka munan ba sip alkras munan pyua ra, sukika kum ba sirang iwi Witniska ra wih, umpira kaikbia makaban.

Lasa nani ba trabil mai munisa kaka, man sip sma Jehova nina maki winaia bara witin kainam kahbia. (Sins laka 18:10.) Sakuna man Gâd kaina kahbanka ba briaia sma kaka, aiska pali dakwi takram kaia sa, spirit saura warkka daukanka nani ba wina bara lasa ra mayunanka nani yabi ba wina sin. Pyu luan ra Epesus taunka ra, Gâd ra ai pura suni mayuni nani kan ba, baku dauki bangwan. Sukia warkka lan takaia wauhkataya nani ba sut brih pauta ra angki bangwan. (Wark nani 19:19, 20.) Naiwa pyua ra Gâd napakanka nani ba sim baku daukaia sa. Diara nani swaki mai sakbia lukisma nani ba wina pri taki bangws, “kangbaia” dukya nani, tub nani, sukia laka bri bukka nani bara diara wala nani spirit saura warkka daukanka nani wal wilkanka bri nani ba wina sin.

Man Gâd yamni kaiki ba daukaia brinkam sa kaka, aitani apia sa, mayunanka kunin laka ra dauki ba bara saura dauki ba baman swiaia. Ban sakuna mayunanka sunu ba karna pali daukaia sma. Baibil ba marikisa dia daukaia ba:

Setan bara lasa nani ba Tasba ra ai uplika nani brisa, diara saura nani ba smalki bara dauki kaia dukyara. Sakuna Jehova sin ai uplika nani brisa. Baha ba Jehova witniska nani sa. (Aiseya 43:10.) Tasba aiskara 6 milian purkara Jehova Witniska nani bara sa. Witin nani sut ba traikaiki bangwisa wark yamni nani ba dauki bara upla nani ra kasak tanka ba smalkaia. Kuntri aihkika nani ra, man witin nani asla taki ba watla ra kaikaia sip sma bara baha ra witin nani liliakira yamni balram mai wibia.

Upla wala nani ra Gâd dukya daukaia help munaia ba witin nani warkka sa. Witin nani Baibil smalkanka ba wamtla kat maikbia, bara Jehova ra kasak tanka kat mayunaia ba, mai smalki bangwbia. Man witin nani dauki ba dukyara aibapaia apia sma. Jehova witniska nani ba, Jehova Gâd bara upla nani ra latwan kaiki ba mita lilia bangwisa kasak tanka ba smalkaia.