Baibil ba wisa Setan ba “tasba aiskara kunin aisi ba”. (Param marikan 12:9.) Setan bara lasa nani ba want apia sa, yawan Gâd Bila ra dia wi bara luki bangwbia. Trai kaiki bangwisa upla nani ba lukbia, pruan nani ba spirit nani tasbaia ra raya bangwisa. Kaisa kaikaia nahki baha dauki bangwi ba.

Rilidian ailal ba smalki bangwisa upla sut ba solka kum brih bangwisa bara wîna tara ba pruya ningkara spirit nani tasbaia ra lui wisa. Witin nani bila, wîna tara ba pruisa, sakuna solka ba pruras sa wisa. Baha purkara, solka ba sip pruras, pruaikas sa lukanka ba karna bapi brih bangwisa.

Sakuna Gâd Bila ra baha ba smalkras sa. Baibil marikisa solka ba uplika ba pali sa, witin wîna bilara diara wala kum apia sa. Tanka kum ba Adam paskanka dukyara aisi bara, Baibil ba naku wisa: “Tâura poli kan uplika ba, Adam, sol rayakira takan. Ningka poli Adamka ba spirit kumi takan raya won saki ba”. (1 Korintra Blasi 15: 45; Dawan Bila Lâ Raya Wauhkataya [DBLRW] 1986.) Baku bamna Adam ra solka kum yabras kan; witin ba solka kum kan.

 Daîwan nani ra sin solka maki bangwisa. (Salmo 74:19; Salmo Lawana nani [SLN] 1960.)

Kan baibil bila aisanka “solka” tanka ba sika uplika ba pali sa, yawan sirang iwi bangwaia apia sa, solka nani ba prui bangwaia sip sa wan wibia sa kaka bara prui bangwisa sin. Kaiks Baibil ulbanka nani wi bara:

• “Wan solka wan wîna tara sin [...] tikaia sip ba.” (Matyu 10:28; DBLRW 1986.)

• “Bara [Jisas] witin nani ra win: ‘Solki ra sari pali ai daukisa, pruaia prais’.” (Matyu 26:38.)

• “Solka ba prura wina swaki sakbia.” (Jems 5:20.)

Baibil tikska wala nani ra sin marikisa solka nani ra sip ba sauhki tikaia (Apostel Storka 3:23; 2:27; DBLRW 1986), bara sord wal ikaia (Salmo 22:20; SLN 1960). Mariki ba baku, solka ba pruisa.

Man Baibil ba aisi kaiks ta wina tnata kat, bara aima kumira sin “solka ba pruaikas” bila ba sakma apia. Upla solka ba spirit kum apia sa. Solka pruaikas smalkanka ba baibil wina apia sa. Setan bara lasa nani smalkanka kum sa.  Rilidian nani kuninka ba Jehova sut misbara kaikisa. (Sins laka 6:16–19; 1 Timoti 4:1, 2.)

Setan ba spirit saura wal aisi uplika bakku sin upla nani ra mahwakisa. Spirit saura wal aisi uplika ba, spirit nani tasbaia wina, spirit saura bila baikra walaia sip ba uplika sa. Upla ailal, bara spirit saura wal aisi uplika ba kat sin, luki bangwisa naha bila aisanka nani ba pruan nani spiritka ba wina balisa. Sakuna, Baibil wan mariki ba baku, baha ba sip apia sa. (Smasmalkra 9:5, 6, 10.)

Baku sa kaka, ya nani wina balisa naha bila aisanka nani ba? Lasa nani wina balisa! Lasa nani ba upla kum raya pyua ra kaikaia sip sa; nahki aisi ba, mawan nahki ba, dia dauki ba bara dia nu ba. Baha mita, witin nani mapara, isi sa pruan uplika nani ba tnata luki daukaia. (1 Samyuil 28:3–19.)

Kunin kisika nani bakku sin Setan kunin laka ba bukisa pruan nani ba dukyara. Naha kisika nani ba mita upla nani ra pat pat tnayara sakisa Baibil tanka ba wina. (2 Timoti 4:4.)

 Aprika tasbaia ra kisi ailal walisa upla nani pruan kan kli raya sa kaikan ba dukyara. Diara kum aihka ba sika, uplika iwi kan pliska ba wina witin ra laiura kaikaia. Ban sakuna, mamkabi wals: ‘Upla kum pruan nani tila wina kli balaia sip sa kaka, aitani sa ki lukaia ai pamalika bara ai panika nani wina plis laiura waia?’.

Baha purkara, sip apia kaia sa uplika kaikan ba, pruan ba wal ai talia kaia? Tanka kum bara ba sika, kristian wal plis wihka kum ra smalki bangwi kan, bara witin nani waitna almuk pali kum awar kum kum bilara ai nina bliki kan kaikan. Dia muni ai nina bliki kan ba dukyara makabi walan taim, nu taki bangwan kan waitnika ba luki kan kristianka nani kum ba, ai muihka pat pruan mani ailal bri kan ba luki kan. Au, witin ba mistik takan kan, sakuna witin mistik takan ba kasak lukaia want apia kan. Ningkara damia ba nahki ai panika bara ai lama uplika nani ra aisi win bara luki kaiks!

Bankra upla diara aihka nani kaikan, walan bara yaprisauhkanku kaikan ba dukyara man nu sma kaia sa. Tanka ba, ya naha dukya kaiki nani ra si rang ikisa. Marein, Aprika tasbaia muna tanira iwi kan ba, pat pat ai kukika pruan kan ba bila baikra tihmia witin ra wini kan wali kan. Sirang iwi, witin ai karma kalki kan bara ai pamalika sut ra buki kan. Pyu nani luan bara, witin krisi baku takan.

Baku bamna, pruan nani ba rait raya bangwisa kaka, aitani sa ki ai latwankirka nani ra sirang ikaia? Apia. Baha bila baikra saura munaia lukanka bri nani ba lasa nani wina balisa.

Sakuna dia wiaia sip sa bila baikra nani wan maisanihki, help wan muni talia baku nani ba dukyara? Tanka kum ba Gbassay, Sierra Leona wina mairka kum ba siknis kan. Yaprisauhkan kum kaikan bara ai aisika pruan kan ba takan. Aisika ba mita win dus kum ba kat wih, wahya kum dakbi brih, li wal klami bara klamanka ba dibia. Sakuna kau baha daukras kainara upla kumi wal aisabia apia win. Bara witin baha ba daukan bara rawan.

Mairin wala kum sin aisan ai maîa waitna pruan kan ba tihmia kum witin ra takan. Witin aisan ai maîa waitna ba uba pain pali kan bara kwala sin pain dimi kan kaikan.

Baha bila aisanka nani bara diara kaikanka nani ba pain talia sa. Sakuna Gâd wina balisa ki? Apia;  witin wina balras. Jehova sika “kasak tanka Gâdka sa”. (Salmo 31:5; SLN 1960.) Aima kumira sin kunin wan munbia apia. Lasa nani ba baman baha daukisa.

Ban sakuna lasa pain nani bara sa ki? Apia. Bankra aima kum kum ra help munisa talia kabia, sakuna witin nani sut ba saura bangwisa. Debil ba Iv ra aisan pyua ra, pana painkira kum talia kan. (Blasi sturka 3:1) Sakuna Setan win ba wali daukan ningkara witin ra dia takan? Pruan.

Man nu sma upla saura kum, upla wala nani ra kunin muni diara kum mihta dakbai pyua ra pana painkira kum baku takisa. Miskitu bila aisanka kum ra wi ba baku: “Mawan ba pain sa, sakuna kupia ba kaikras sa”. Bara Gâd bila ba naku wisa: “Kan Setan pali sin ingni insal baku takisa”. (2 Korint nani 11:14.)

Gâd yaprisauhkan nani, diara kaikanka nani bara bila baikra nani bakku Tasba uplika nani aikuki spirit nani tasbaia wina dan aisaras. Witin Baibil bakku upla nani ra ta brih smalkisa, bara naha ba sip sa upla nani ba yarka “pain lan kabia bara ridi sin pain daukan kabia, wark yamni satka nani sut daukaia dukyara”. (2 Timoti 3:17.)

Baku, Jehova latwan wan kaiki ba mita Debil kuninka nani wina wan maisapahkisa. Witin nu sa lasa nani ba pât ra wan dingkaia sip ba.