Setan saurka nani daukan aiska pali ba Jehova mita apu daukbia. Jehova Tasba aiska purara Jisas ra King mangkan. Witin gabamintka munuhtara, Tasba na paradais kum daukbia. (Danyal 7:13, 14; Luk 23:43.)

Naha nani ba Jehova pramis munisa:

• PLUN AILAL: “Tasba ba ai ma sakisa; wan Gâdka yamni wan munan sa!”. “Naha kuntrika ra plauar ma ailal bara kabia, il bahna nani ba sut plun pali man kabia!” (Lawana 67:6; 72:16.)

• WAR NANI APU KABIA: “Man nani bal kais, Dawan nahki pali, diara aihkakira daukan na naha tasba ra. Witin war nani apu daukan, tasba aiskara”. (Lawana 46:8, 9.)

• UPLA SAURA NANI APU KABIA: “Saura dadaukra nani ba klaki dakban kabia [...] Kau pyua wiria man, bara wataui ba apu kabia, man ai watla ra pliki kama, sakuna man witin ba kli sakma apia”. (Lawana 37:9, 10.)

•  SIKNIS, PRURA BARA LATWAN NANI BA APU KABIA: “Bara mika nakra prakan nani, nakra ba diara kaikbia, kyama prawan nani kyama ba sin walbia; bara mika skahwa nani ba sula srutwi pali baku srutwi kabia, bara baha nani sturi aisaras twisa nani ba sin, ai pura winbia”. (Aiseya 35:5, 6.)

  “Bara Gâd witin nani wal kabia, ai Gâdka kaia. Witin nani nakra laya ba sut dikbia, bara prura kau apu kabia, inanka, pura mata inaia laka, latwanka sin; kan diara almuk nani ba sut lui wan sa.” (Param marikan 21:3, 4.)

Setan bara ai lasika nani ba sat wala sa, Jehova aima kumira sin kunin aisaras. Witin diara nani sut pramis muni ba rait takisa. (Luk 1:36, 37.) Jehova man ra latwan mai kaikisa bara brinka sa witin paradais daukbia bara man iwma. Baha mita, Jehova witniska nani ba wal aisas Gâd Bila ra tanka kasak nani aihkakira pali bri ba kau lan takma dukyara. Man tanka kasak ba rayakam ra brih iwma sa kaka, kunin laka ba wina pri takma, sukia laka ra kulki ba, bara diara tanka kaikanka luha ba wina sin. Pyu lui bara, saurka bara prura ba wina kat sin pri mai sakbia. Jisas win ba baku: “Diara kasak tanka ba kaikma; bara kasak tanka ba mita sin pri mai sakbia”. (Jan 8:32.)