SMALKANKA 06
¿Rayaka sut ba nahki bal takan?
Gâd “man sika diara sut paskram” (Param Marikan 4:11). ¿Baha ba man kasak lukisma? Upla kum kum bila rayaka sut ba silp bal takan, witin nani lukisa diara sut papaskra ba âpu sa. Yawan sut wan rayaka ba silp bal takan kaka, ¿dîa mata naha tasba ra balan? Bahki baman, sakuna Jehova rayaka sut paskan kaka, diara yamni dukiara wan paskan tânka sa ¿rait apia? a Rayaka sut nahki bal takan Baibil aisi ba aisi kaiks bara kaikma nahki sins lâka brisa.
1. ¿Kasbrika pura bara tasba ba ya paskan?
Baibil wisa: “Kau diara wala nani sut paskras kan ba tâura, Gâd bui kasbrika pura ba bara tasba ba wal pas paskan” (Blasi Sturka 1:1). Sinskira uplika aihkika nani ba lukisa kasbrika pura, slilma nani bara tasba ba sin blasi pali piua wina bal takan. Sakuna, ¿Gâd ba kasbrika pura, slilma nani bara tasba na nahki paskan ki? Witin ba ai karnika pranakira yus munan, wibia kaka, ai spiritka holikira bâk witin diara sut paskan, galaxia nani ba, slilma nani bara planeta nani ba sin... (Blasi Sturka 1:2).
2. ¿Dîa muni Gâd Tasba ba paskan?
Jehova “Gâd bara wan Dawan ba, tasba ba dauki bara paskan ba [...] diara âpu kaia dukiara paskras kan, sakuna upla nani bâra iwi kaia” (Aiseya 45:18). Gâd ba tasba na painkira paskan, bara baku upla sut ba âuyapah lâka briaia sip sa, bara raya ban kaia lâka ba sin (Aiseya 40:28, bara 42:5 aisi kaikma). Upla sinskira nani bila Tasba na uba prana sa, bara planeta wala baku apia sa. Baha mita, planeta wala ra upla sip bâra iwras.
3. ¿Upla wihki daiwan nani ba wal nahki sât wala sa?
Jehova naha tasba na paskan ningkara, rayaka ba paskan. Pas tâura, dus bara daiwan nani paskan. Baha wina, “Gâd upla ba paskan piua ra, witin ai lilka talia ba kat paskan” (Blasi Sturka 1:27 aisi kaikma). ¿Dîa muni yawan upla ba daiwan nani ba wal sât wala sa? Gâd ai talia ba kat wan paskan bamna, ai daukanka bara ai lâka painkira nani ba yawan sin wira briaia sip sa, latwan lâka bara kasakka lâka baku. Witin wan paskan bîla raya yawan lan takaia, naha tasba na diara painkira bâra ba liliakira kaikaia dukiara, bara âuyapah wal lawana bara miusik ba sin walaia sip sa. Baku ba ra, yawan upla baman sip sa wan Papaskra ba ra mayunaia, daiwan nani ba lika sip apia.
KAU LAN TAKS
Rayaka sut ba nahki Gâd paskan ba, bara Gâd diara sut paskan sturka Baibil aisi ba nahara klir kaiks. Baku sin lan takaisa, nahki upla daukanka painkira nani ba Gâd wina diara yamni wan smalkisa.
4. Rayaka sut ba papaskra kum brisa
Upla nani ba Gâd diara paskan ba kaiki diara raya paski sakisa, baku dauki uplika nani ra upla ailal mita kulkanka yabisa. Sakuna Gâd diara sut paskan bamna, ¿witin ra kulkanka yabaia sa ki? LILKA ba kaikma, bara naha dukiara aisi banhma:
-
¿Upla nani ba Gâd diara paskan ba kaiki dîa raya nani paski sakisa?
Utla nani sut ba upla kum paski bara mâkisa. Sakuna, ¿naha tasba ra diara sut bâra ba ya paskan? Hibru Nani 3:4 aisi kaikma, bara naha dukiara aisi banhma:
-
¿Tasba paskanka ba ra diara sât sât bâra ba wina man mampara dîa kau painkira kaikisma?
-
¿Man kasak lukisma kasbrika pura, slilma nani bara tasba ba pain luki paskan sa? ¿Dîa muni?
¿Nu kapram ki?
Internet ra jw.org ba ra lilka nani bara ulbanka nani naha tânka dukiara aisi ba pliki sâkma. Nahara pliki sâks “¿Ya bui pain luki paskan?” baku sin “Rayaka sut ba ani wina bal takan ba dukiara upla dîa lukisa”.
“Utla bani ba upla kum mâkan kaia sa; sakuna Gâd sika diara nani sut paskan ba”
5. Gâd diara sut paskan sturka Baibil aisi ba kasak lukaia sip sa
Baibil ra Blasi Sturka sapta 1 ba tânka wan marikisa Tasba bara rayaka sut tasba ra bâra ba nahki bal takan. ¿Baha sturka ba kasak sa ki, apia kaka kunin kum sa ki? LILKA ba kaikma, bara naha dukiara aisi banhma:
-
¿Baibil smalkisa ki naha Tasba na bara rayaka sut tasba ra bâra ba, 6 yua nani 24 awarka bri ba bilkara Gâd paskan?
-
¿Man lukisma Gâd diara sut paskan sturka Baibil aisi ba rait takan, bara sins lâka brisa? ¿Dîa muni?
Blasi Sturka 1:1 aisi kaikma, bara naha dukiara aisi banhma:
-
Upla sinskira aihkika nani bila kasbrika pura, slilma nani bara tasba ba piu kum aipaswi bal takan. ¿Witin nani dîa luki, bara bisiura Baibil ra dîa aisi kaikram ba wal asla sa ki?
Upla kum kum lukisa Gâd ba rayaka sirpi kum paskan, bara ningkara witin yakan swin naha rayaka na silp sât wala takbia, kau sinskira bara kau tara. Blasi Sturka 1:21, 25, 27 aisi kaikma, bara naha dukiara aisi banhma:
-
¿Baibil smalkisa ki Gâd ba rayaka sirpi kum paskan, bara ningkara witin yakan swin naha rayaka na silp sât wala takbia kau sinskira bara kau tara? ¿Inska nani, daiwan tara nani bara upla nani ba baku bal takan? ¿Apia kaka Gâd bui rayaka “sâtka sut ba” paskan ki? b
6. Upla nani ba sât wala sa Gâd diara wala paskan ba wal
Yawan upla nani ba sât wala sa daiwan nani ba wal. Blasi Sturka 1:26 aisi kaikma, bara naha dukiara aisi banhma:
-
Upla nani ba sip sa latwan lâka bara umpira kaikan lâka ba briaia, Gâd ba ai talia ba kat wan paskan bamna. ¿Jehova daukanka painkira nani bri ba wina man dîa lan takisma?
UPLA KUM KUM NAKU LUKISA: “Gâd diara sut paskan sturka Baibil aisi ba kisi baman sa”.
-
¿Man dîa lukisma? ¿Dîa muni?
DÎA LAN TAKRAM
Jehova kasbrika pura, slilma nani, tasba bara rayaka sut witin paskan.
Wan kupia krawaia
-
¿Tasba, kasbrika pura bara slilma nani nahki bal takan ba dukiara Baibil ba dîa smalkisa?
-
¿Rait pali Gâd ba rayaka sirpi kum paskan ba wina baha rayaka ba silp chens taki kau sinskira bara kau tara takan ki, apia kaka, Gâd bui rayaka sâtka sut paskan?
-
¿Nahki yawan upla nani ba pranakira tnatka ra sât wala sa ki?
KAU PLIKI KAIKS
Paskanka ba tilara diara kum kum marikisa Gâd bui diara sut ba pain luki paskan.
“¿Paskanka ba dîa wan smalkisa?” (¡Despertad!, septiembre 2006)
Kaiks nahki aisa kum ai luhpia ra Baibil wal smalkisa Gâd diara sut paskan sturka ba.
Evolución (rayaka sut silp bal takan wi ba) Baibil dîa smalki ba wal praki kaiks sim dukia sa sapa.
Tânka na pliki kaiks, patitara piua ra daiwan bara upla pruan dusa nani ba laki kaiki dîa marikisa: rayaka sut silp bal takan, apia kaka Gâd bui rayaka sâtka sut paskan.
Rayaka ba nahki bal takan. Tânka 5 laki kaikaia sip ba (folleto)
a Smalkanka 25 marikisa Gâd kupia lâka ba upla nani dukiara.
b Baibil ba sâtka sut dukiara aisisa taim, rayaka sâtka ailal ba dukiara aisisa; sakuna upla sinskira nani ba naha bîla na tnatka wala ra ai tânka brisa.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
