Jehova want sa witin ra kakaira takma. ¿Dîa muni? Kan witin daukanka painkira nani, ai kupia lâka bara diara nani nahki dauki ba man kau lan takma taim, witin pânika kaia want kama. Sakuna, ¿rait pali sip sa ki Jehova pânika kaia? (Lawana Nani 25:14 aisi kaikma). ¿Man Jehova pânika kaia dukiara dîa daukaia sma? Baha dukiara Baibil ba tânka wan marikisa, baku sin wan wisa dîa muni Jehova wal pâna kaia lâka ba diara kau tara sa, upla wala pânika kaia ba wal.

1. ¿Jehova dîa daukaia mai paiwisa ki?

“Gâd lamara man nani was bara witin lika man nani lamamra wabia” (Jems 4:8). ¿Baha bîla nani ba dîa tânka sa? Jehova mai paiwisa witin pânika kaia. Upla kum kum lukisa wan nakra ni sip kaikras uplika kum wal yawan pânika kaia sip apia, Gâd wal sin apia. Sakuna Gâd ai bîla ba wankan sa, baha sika Baibil ba, bahara yawan nu takisa witin lâka yamni nani ba, bara baku yawan sip sa witin lamara waia. Baibil ba aisi kaikisa taim Gâd smalkanka ba yawan lan takisa, baku tnatka ra witin wal yawan pâna takisa wan nakra ni witin ra kaikras kabia sin.

2. ¿Dîa muni Jehova wan pânika kau yamni sa ki?

Jehova ba lika kau latwan mai kaikisa. Witin want sa man lilia kama, bara piua bani hilp nit kama taim witin ra plikaia sip sma. Baha mita, “trabilkam taki lukisma ba sut Gâd mihta ra swis” kan witin lika man pali ra main mai kaikisa (1 Pita 5:7). Jehova ridi sa piua bani ai pânika nani ra tâ baikaia, maisa nihkaia bara ai trabilka ba walaia (Lawana Nani 94:18, 19 aisi kaikma).

3. ¿Jehova dîa want sa ai pânika nani daukbia?

Jehova upla sut ra latwan kaikisa, sakuna upla “pain nani ra ai kupia aiska kulkisa” (Sins Lâka 3:32). Jehova want sa ai pânika nani ba diara yamni ba daukbia witin lâka kat, bara diara saura nani ba daukbia apia. Upla kum kum lukisa Jehova dîa makabi ba kat yawan daukaia sip apia sa. Sakuna Jehova umpira wan kaikisa, baha mita ani uplika witin ra latwan kaiki bara ai kupia lâka bîla walaia trai muni ba witin yamni brisa (Lawana Nani 147:11; Apastil Nani Sturka 10:34, 35).

 KAU LAN TAKS

4. Ebraham Jehova pânika kan

Ebraham dukiara Baibil sturka aisi ba, (baku sin witin ra Ebram nina mâki kan) wan marikisa nahki sip sa Gâd pânika kaia. Blasi Sturka 12:1-4 ba ra Ebraham dukiara aisi kaikma, bara naha dukiara aisi banhma:

• ¿Jehova mita Ebraham ra dîa makaban?

• ¿Jehova Ebraham ra dîa pramis munan?

• ¿Ebraham ba Jehova adarka nani brin ningkara dîa daukan?

5. Jehova ai pânika nani ra dîa makabi ba

Yawan want sa wan pânika nani ba diara kum kum daukbia.

• ¿Man dîa want sma pâmnika nani daukbia?

1 Jan 5:3 aisi kaikma, bara naha dukiara aisi banhma:

• ¿Jehova dîa want sa ai pânika nani daukbia?

Jehova bîla walaia dukiara yawan dîa dauki ba chens munaia sa, bara wan rayaka tnatka ba sin. Aiseya 48:17, 18 aisi kaikma, bara naha dukiara aisi banhma:

• ¿Dîa muni Jehova ai pânika nani ra makabisa saura dauki ba chens munbia?

 6. Jehova nahki ai pânika nani ra hilp munisa

 DÎA LAN TAKRAM

Jehova pâmnika kaia want sa bara hilp mai munbia witin wal asla kama dukiara.

Wan kupia krawaia

• ¿Jehova ai pânika nani ra nahki hilp munisa?

• ¿Dîa muni Jehova ai pânika nani ra wisa saura dauki ba chens munbia?

• ¿Man lukisma Jehova ai pânika nani ra dîa makabi ba uba karna sa daukaia? ¿Dîa muni baku lukisma?