SMALKANKA 09
Pura sunra ba Gâd lamara wan brih wisa
¿Rayakam ra diara yamni upla mai smalkbia nit sma ki? ¿Diara kum kum tânkam briaia want sma? ¿Maisa nihkan lâka bara kupia bukaia lâka briaia nit sma ki? ¿Jehova wal kau asla kaia want sma ki? Baha sut nit sma ba briaia sip sma puram sunisma kaka. Sakuna, ¿nahki wan pura sunaia sa? ¿Upla sut ai pura suni ba ra Gâd mita walisa ki? ¿Man dîa daukaia sma puram sunisma ba ra Gâd mai walbia dukiara? Kaisa kaikaia.
1. ¿Yaura wan pura sunaia sa? ¿Dîa dukiara wan pura sunaia sa?
Jisas smalkan wan Aisa heven ra ba ra baman wan pura sunaia sa. Baha mita Jisas Jehova ra ai pura suni kan. Yu kum naku win: “Man nani naku puram suns: ‘Yawan Aisa kasbrika purara sma ba...’” (Matiu 6:9). Jehova ra wan pura sunisa taim, witin wal yawan kau asla takisa.
Diara sut mapara sip sa wan pura sunaia. Sakuna, Gâd wan pura sunra walbia dukiara, wan pura sunra ba witin kupia lâka kat kaia sa. Baibil wisa “witin ai kupia lâka kat dîa dîa makabuya ba wan walisa” (1 Jan 5:14). Jisas wan marikan yawan dîa makabaia sip sa wan pura sunisa taim (Matiu 6:9-13 aisi kaikma). Yawan dîa nit ba dukiara baman wan pura sunaia apia sa, Gâd ra tingki wiaia sa Gâd yamni wan munan ba mita, bara upla wala ra hilp munbia sin makabaia.
2. ¿Nahki wan pura sunaia sa?
Baibil ba naku wan pura sunaia wan wisa: “[Gâd] ra aisas puram sunra ni kupiam aiska luki kira” (Lawana Nani 62:8). Baha mita wan pura sunra ba wan kupia aiska ni kaia sa. Wan karma ni wan pura sunaia sip sa, apia kaka wan sinska ra, baku sin wan pura sunisa taim wan wîna tara nahki dauki ba Jehova ra rispik lâka marikaia sa. Piua bani bara plis sut ra wan pura sunaia sip sa.
3. ¿Wan pura suni makabi ba dukiara Jehova nahki hilp wan munisa?
Witin tnatka sât sât ra daukisa. Yawan dîa makabi wali ba witin Baibil bâk tânka ba wan marikisa. Baibil aisi kaiki “ai dahra yamni walras nani ba, sinskira daukisa” (Lawana Nani 19:7; Jems 1:5 aisi kaikma). Bara yawan trabil brisa taim Jehova laman lâka wankisa wan rayaka ra. Baku sin Jehova sip sa ai uplika nani ra tâ baikaia hilp wan munbia yawan diara nit piua ra.
KAU LAN TAKS
Kaisa kaikaia nahki wan kupia aiska ni wan pura suni ba Gâd yamni kaikisa, bara pura sunra nani ba nahki hilp wan munaia sip sa.
4. Wan pura sunra ba Gâd walbia dukiara yawan diara daukaia sa
¿Jehova wan pura sunra walbia dukiara yawan dîa daukaia sa? LILKA ba kaikma.
Jehova want sa witin ra baman wan pura sunbia. Lawana Nani 65:2 aisi kaikma, bara naha dukiara aisi banhma:
-
¿Gâd pura sunra nani wali ba want sa man sin witin ra puram sunma? ¿Dîa muni baku lukisma?
Gâd wan pura sunra walbia yawan want sa kaka, trai munaia sa wan rayaka ba witin lâka kat kaia. Miqueas 3:4 bara 1 Pita 3:12 aisi kaikma, bara naha dukiara aisi banhma:
-
¿Yawan dîa daukaia sa ki Gâd wan pura sunra ba walbia dukiara?
Aiklaklabra dakni wâl ba kumi bani Gâd ra ai pura sunisa war aiklabanka win takaia dukiara, sakuna ¿Jehova dakni wâlsut ba ra hilp munbia ki?
5. Wan pura sunra ba wan kupia aiska ni kaia sa
Upla ailal lan takan sa kli kli sim bîla nani aisi ai pura sunaia. Sakuna, ¿baha sât pura sunra nani ba Gâd yamni kaikisa ki? Matiu 6:7 aisi kaikma, bara naha dukiara aisi banhma:
-
¿Wan pura sunisa taim yawan dîa daukaia sip sa bîla bahki nani kli kli aisaia apia dukiara?
¿Sip sma yu bani wira lukaia rayakam ra dîa painkira brisma ba, bara baha dukiara Gâd ra tingki wiaia? Wik kum tilara baha daukma kaka, las kat diara 7 sât sât ba dukiara puram suni kama, bara kli kli sim dukia wima apia.
Aisa yamni kum want sa ai luhpia ai kupia aiska ni witin ra aisabia. Sim baku Jehova want sa pura sunra nani ba param pali wan kupia aiska ni daukbia.
6. Pura sunra ba Gâd prisantka kum sa
¿Wan rayaka ra yawan trabil brisa taim, nahki sip sa pura sunra ba karnika wankaia? LILKA ba kaikma.
Baibil ba pramis munisa pura sunra ba kasak pali laman lâka ba wankbia wan rayaka ra. Pilipai 4:6, 7 aisi kaikma, bara naha dukiara aisi banhma:
-
Pura sunra ba wan trabilka nani sut ba wapni mangkras kabia sin, ¿nahki tnatka ra lika hilp wan munisa?
-
¿Dîa dukiara man want sma puram sunaia?
¿Nu kapram ki?
Bîla amén wi ba, tânka ba sika “baku kabia” apia kaka “kasak takbia”. Baibil marikisa patitara piua ba wina upla ba ai pura sunisi las kat “amén” wisa (1 Kronikas 16:36).
7. Wan pura sunaia wan âuya tikaia apia sa
Sam taim yawan wark ailal brisa bara taim âpu wan pura sunaia. ¿Jisas ba nahki pura sunra ba tara kulkan? Matiu 14:23 bara Mark 1:35 aisi kaikma, bara naha dukiara aisi banhma:
-
¿Jisas ba nahki taim sakan ai pura sunaia dukiara?
-
Bara man, ¿nahki sip sma taimkam sakaia puram sunma dukiara?
UPLA KUM KUM NAKU LUKISA: “Pura sunra ba wal lika wan taimka bahki tikisa, Gâd wan walras”.
-
¿Man dîa lukisma?
DÎA LAN TAKRAM
Wan kupia aiska ni wan pura sunisa taim, Gâd wal kau asla takisa. Baku sin wan rayaka ra laman lâka bara karnika lâka wankisa Jehova kupia lâka daukaia dukiara.
Wan kupia krawaia
-
¿Yaura wan pura sunaia sa?
-
¿Nahki tnatka ra wan pura sunaia sa?
-
¿Nahki pali pura sunra ba hilp wan munisa?
KAU PLIKI KAIKS
Upla ailal pura sunra dukiara dîa makabi wali ba nahara tânka pliki sâks.
“Pura sunra ba dukiara tânka 7 bâra sa” (La Atalaya octubre 1, 2010)
Aisi kaiks dîa muni diara tara sa man puram sunma ba, bara nahki sip sma puram sunisma ba kau yamni daukaia.
“¿Dîa muni kulkanka tara brisa wan pura sunaia?” (jw.org ra kaiks)
Yaura wan pura sunaia Baibil smalki ba nahara kaiks.
“¿Holi uplika nani pruan ba ra wan pura sunaia pain sa ki?” (jw.org ra kaiks)
Miusik lilkika na kaiks bara lan takma anira bara dîa taim wan pura sunaia ba pain sa.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
