Baibil stadi takaia ba hilp wan munisa. Sakuna sam taim isi apia sa, ban kra lukisma stadika ba piua bani brima sapa. ¿Aitani sa ki karna trai muni Baibil stadi munaia? ¿Trabil brima sin dîa hilp mai munbia ban Baibil stadi muni kaia?

1. ¿Dîa muni yamni sa Baibil stadi munaia?

“Gâd Bîla ba rayaka brisa bara karnika sin brisa” (Hibru Nani 4:12). Baibil ba buk tânka tara bri ba kum sa, kan Gâd kupia lâka ba dukiara aisisa, bara man dukiamra Gâd dîa lukisa sin. Baibil tânka kau brima, sakuna baha baman apia, rayakam ra diara yamni daukma hilp mai munbia bara naika piua ra diara yamni briaia bîla kaikma. Bara diara kau yamni ba sika, Baibil ba hilp mai munbia Jehova pânika takaia. Aima bani man Baibil stadi takisma ba, Baibil ba rayakam ra hilp mai munisa.

2. ¿Dîa muni nit sa ki Baibil dîa wan smalki ba tara kulkaia?

Baibil smalkanka nani ba gul manakira baku sa. Baha mihta Baibil naha daukaia wan paiwisa: “Kasak tânka ba bara sins lâka ba atki bris [...] ¡Atkrika wabiara!” (Sins Lâka 23:23). Baibil smalkanka tânka tara bri ba yawan kulkisa kaka, yawan Baibil ban stadi taki kabia trabil bâra kabia sin (Sins Lâka 2:4, 5 aisi kaikma).

3. ¿Nahki Jehova hilp mai munbia piua bani Baibil stadi taki kama dukiara?

Jehova wan Papaskra bara karnika sut bri ba Gâdka sa bara pâmnika sa, baha mihta witin nu sa dîa mai takisa bara hilp mai munaisa witin ra kau kakaira takma. “Gâd mita sika man nani ra brinka yamni nani ba maikisa, bara baku kat daukaia sin hilpka maikisa” (Pilipai 2:13 aisi kaikma). Baha mihta, man Baibil stadi munaia dukiara kupiam bukaia nit sa kaka Jehova hilp mai munaisa, baku sin man sip kama dîa lan takisma ba rayakam ra alki daukaia. Bara Gâd sin karnika maikbia trabil nani bara mapa buanka ba pura luaia. Yu bani makabi bas Jehova hilp mai munbia piua bani Baibil stadi takaia (1 Tesalonaika 5:17).

 KAU LAN TAKS

4. Trai kaiks Baibil stadi takisma ba kulkanka tara bribia rayakam ra

Sam taim diara ailal daukaia takisa, baha mihta taim âpu sa Baibil stadi takaia dukiara. ¿Dîa daukaia sip sa? Epesus 5:16 aisi kaikma, bara naha dukiara aisi banhma:

• Man dîa lukisma, ¿nahki sip sma “piua brisma na pain yus” munaia?

• ¿Dîa daukaia sip sma Baibil stadika ba kau kulki bara taim briaia stadi takaia dukiara?

1. Kap kum auhya ni banhki baha bilara walpa dingkaia trai munma kaka, walpaya nani ba sip dingkras kama.

2. Sakuna pas tâura walpaya nani dingkma kaka, sip kama auhya aihkika ba yakabi dingkaia. Sim baku, “piua brisma na pain yus” munma kaka, sip kama diara kau tara nani ba alki daukaia, baku sin kau taim brima diara wala daukaia dukiara.

Baibil stadi takisa taim, wan spiritka nitka nani wankisa, wibia sa kaka, Gâd ra kakaira taki mayunaia nitka nani ba. Matiu 5:3 aisi kaikma, bara naha dukiara aisi banhma:

• Baibil stadika ba wan rayaka ra tara kulkbia kaka, ¿dîa yamnika yawan bribia?

 5. Baibil stadika ba ban bris upla kum man mampara bubia sin

6. Jehova hilp mai munbia kasak luks

 DÎA LAN TAKRAM

Baibil stadi munaia isi apia kabia sin, raya ban kaia lâka ba maikbia. Jehova ra kasak lukisma kaka, witin yamni mai munbia.

Wan kupia krawaia

• ¿Man dîa muni Baibil smalkanka nani ba tara kulkisma?

• Diara ailal daukaia ba tilara dîa kau kulkanka tara bri ba nu takma taim, ¿nahki sip kama “piua brisma na pain yus” munaia?

• ¿Dîa muni makabaia sma Jehova hilp mai munbia ban Baibil stadi takaia?