Gâd latwanka lâka sa, bara rilidian nani ba Gâd lâka nani ba alki brisa wisa, baku sa kaka ¿dîa muni diara saura ailal daukan sa? Tânka ba sika naha rilidianka nani ba kuninkira sa, witin nani dîa smalki bara dîa dauki ba wal Gâd nina ba sauhkisa, ¿nahki tnatka ra daukisa bara baha dukiara Gâd dîa lukisa? ¿Baha mapara Gâd dîa daukbia?

1. Rilidian kuninkira nani ba ai smalkanka saura nani wal, ¿nahki Gâd nina ba sauhkan sa?

Rilidian kuninkira nani ba “Gâd kasakka lâka ba kasak lukras, kunin lâka ni kulkan” (Roman 1:25). Naha luki kaiks, naha sât rilidianka nani na upla nani ra Gâd nina pali ba smalkras. Sakuna, Baibil wisa Gâd nina ba yus munaia sa (Roman 10:13, 14). Church tâ uplika kum kum bila upla pât tara brisa taim, Gâd kupia lâka sa wisa. Sakuna baha ba kunin sa. Diara saura taki ba Gâd wina apia sa (Job 34:12 aisi kaikma). Naha sât kuninka nani mita, upla ailal ba sip apia munisa Gâd ra latwan kaikaia, baha lika wan sarka paskisa.

2. Rilidian kuninkira nani ba ai daukanka saura nani ba wal, ¿nahki Gâd nina ba sauhkan sa?

Jehova upla nani ra yamni munisa, sakuna rilidian kuninkira nani ba upla nani ra saura munisa. Baibil bila, “ai saurka nani ba aipaswi taki, kasbrika purara ba kat alkan sa” (Param Marikan 18:5). Rilidian nani ba mani ailal wina pulitik bisniska ra dimisa, war aiklabanka nani bara upla ailal ikaia tâ baikan sa. Rilidian tâ uplika kum kum lalahkira takaia want sa bara ai churchka uplika nani ra lalah makabisa witin nani ra yabia. Baha wan marikisa witin nani ba Gâd tânka kakaira apia sa, baha mita ai raitka âpu sa Gâd nina ra smalkaia warkka ba daukaia (1 Jan 4:8 aisi kaikma).

3. ¿Rilidian kuninkira nani ba mapara Gâd dîa lukisa?

Rilidian kuninkira nani ba diara saura dauki ba man pain kaikras sma kaka, ¿Jehova nahki ai dara walisa lukisma? Witin upla ra latwan kaikisa, sakuna rilidian tâ uplika nani mapara ai kupia baiwisa, kan baha nani ba Gâd nina ba sauhkisa bara upla nani ra rau munisa. Gâd pramis muni, rilidian kuninkira nani mapara naku wisa “upla kumi sin kli mai kaikbia apia”, baha tânka sika rilidian kuninkira nani ra Gâd sauhki tikbia (Param Marikan 18:21). Tisku piua ra, Gâd mita rilidian kuninkira nani ra âpu daukbia (Param Marikan 18:8).

 KAU LAN TAKS

4. Gâd ba rilidian nani sut ba yamni kaikras

Upla ailal lukisa rilidian nani ba sim Gâdka ra wan brihwi yabalka sât sât baku sa. ¿Sakuna rait baku sa ki? Luk 13:24 aisi kaikma, bara naha dukiara aisi banhma:

• Baibil smalki ba baku, ¿raya ban kaia lâka durka ba nahki sa?

LILKA ba kaikma, bara naha dukiara aisi banhma.

• ¿Gâd ba rilidian ailal ra yamni kaikisa Baibil smalkisa ki?

 6. Gâd upla nani ra hilp munaia want sa rilidian kuninkira ba wina pri takbia

Param Marikan 18:4 aisi kaikma, a bara naha dukiara aisi banhma:

• Rilidian kuninkira nani ba upla ra kunin munisa, ba mita Gâd ba upla nani ra hilp munaia want sa baha wina pri sakaia. ¿Baha dukiara man dîa lukisma?

7. Gâd rait aihwa ba ra kakaira taki bas

Church kuninkira nani ba diara saura dauki ba mita, ¿man ba Gâd mapara saura lukma ki? Naha luki kaiks, luhpa kum bâra sa ai aisika bîla walras ba. Witin utla wina taki saurka lâka daukisa. Witin dîa dauki ba aisika mita pain kaikras. ¿Man lukisma, luhpia saurka lâka pâtka ba ai aisika ra yabaia pain sa ki?

• Church kuninkira nani saura dauki ba mita, ¿man lukisma aitani kabia Jehova ra pâtkira kulkaia, bara witin wina danh lan takaia apia?

 DÎA LAN TAKRAM

Rilidian kuninkira nani ba upla ra dîa smalki ba bara diara saura dauki ba wal, Gâd nina ba sauhkisa. Baha mita Gâd bui baha nani ra sauhki tikbia.

Wan kupia krawaia

• Rilidian kuninkira nani ba upla ra dîa smalki bara diara saura dauki ba dukiara, ¿man dîa lukisma?

• ¿Rilidian kuninkira nani ba mapara Jehova dîa lukisa?

• ¿Rilidian kuninkira nani ra Gâd mita dîa daukbia?