SMALKANKA 17
¿Ani sa ki Jisas daukanka painkira nani ba?
Naha Tasba ra Jisas dîa aisan bara dîa daukan lan taki auma taim, ai daukanka painkira nani yawan kau tânka brisa, baha mita witin bara ai Aisika Jehova wal yawan kau asla takisa. ¿Ani sa ki witin daukanka painkira kum kum ba? ¿Bara nahki sip sa witin daukan baku yawan sin daukaia?
1. ¿Nahki tnatka ra Jisas ba ai Aisika wal talia sa?
Heven ra, Jisas ba mani milian pura milian ai Aisa latwankira daukan ba wina lan takan sa. Baha mita Jisas ba ai Aisika baku lukisa, sim baku ai dara walisa bara sim dukia nani daukisa (Jan 5:19 aisi kaikma). Kasak pali, Jisas ba ai Aisika baku sa, ba mita naku win: “Ani uplika yang ai kaiki ba, Aisiki ra sin kaikisa” (Jan 14:9). Jisas ra kau kakaira taki wama taim, Jehova ra kau kakaira pali takma. Naha luki kaiks, Jisas nahki upla ra hilp muni main kaikan baku, Jehova sim sât main mai kaikisa.
2. ¿Jisas nahki marikan ai Aisa Jehova ra latwan kaiki ba?
Jisas win: “Yang Aisa ra latwan kaikisna bara witin mita daukamna win ba kat daukisna” (Jan 14:31). Jisas Tasba ra kan taim, isi apia kan sakuna ai Aisika bîla walan, bara baku witin ra marikan ai latwanka lâka tara ba. Baku sin, ai Aisika ra uba latwan kaiki kan ba mita ai tânka ba dukiara smalkan, bara upla ra hilp munan Jehova wal asla kaia (Jan 14:23).
3. ¿Jisas bui nahki marikan upla nani ra latwan kaiki kan ba?
Baibil bila Jisas ba upla ra luki naku win: “¡Yang lilia daira walri upla paskan ba dukiara!” (Sins Lâka 8:31). Witin ba latwan lâka tara marikan upla nani ra hilp muni bara kupia bukan taim, bara baha dauki mana briaia lukras kan. Sain pranakira daukan ai karnika tara marikaia baman apia, sakuna upla ra umpira kaikan ba mita sin (Mark 1:40-42). Witin ba upla sâtka sut ra pain kulkan bara yamni munan. Turi aisi kan taim upla nani ra maisa nihki kan, bara bawikira nani ra ai smalkanka wali kan ba diara yamni bîla kaikanka yaban. Jisas ba Tasba uplika nani sut ra latwan kaiki kan ba mita pruaia wilin kan. Sakuna witin kau latwan kaikisa baha nani ra ai smalkanka bîla wali nani ba (Jan 15:13, 14 aisi kaikma).
KAU LAN TAKS
Jisas daukanka painkira nani ba kau kakaira taks, bara lan taks witin daukan baku man sin latwan lâka bara kupia pihni lâka ba marikaia.
4. Jisas ba ai Aisika ra latwan kaikisa
Jisas dîa daukan ba wal wan marikan nahki Gâd ra latwan kaikaia. Luk 6:12 bara Jan 15:10; 17:26 aisi kaikma. Baha tikska bani aisi kaikma ningkara, naha dukiara aisi banhma:
-
¿Jisas daukan baku yawan nahki sip sa sim sât daukaia, bara baku Jehova ra wan latwanka lâka ba marikaia?
Jisas ai Aisa heven ra ba latwan kaiki kan bara piua bani ai pura sunan.
5. Hilp nit kan uplika nani ra luki Jisas tâ baikan
Jisas ba upla nitka nani ba dukiara kau lukan, silp ai rayaka nitka ba wal. Witin swapan sakuna, piua bani ai taimka bara ai karnika wal upla nani ra hilp munan. Mark 6:30-44 aisi kaikma, bara naha dukiara aisi banhma:
-
Naha sturka aisi ba baku, ¿nahki tnatka ra Jisas ba upla trabilka ba dukiara lukan? (bors 31, 34, 41, bara 42 ba kaiks).
-
¿Dîa muni Jisas baha uplika nani ra hilp munan? (bors 34 ba kaiks).
-
Piua bani Jisas ba ai Aisika baku dauki kan bamna, ¿baha sut dîa mai smalkisa Jehova daukanka painkira ba wina?
-
¿Nahki tnatka ra yawan sip sa upla trabilka nani ra lukaia Jisas dauki kan baku?
6. Jisas ba kupia pihni sa
Jisas ba lalah lainka ra diara uya briras kan, ban sakuna dîa lika bri kan ba wala nani ra sir munan, bara yawan sim sât daukaia wan paiwisa. Sturka Nani 20:35 aisi kaikma, bara naha dukiara aisi banhma:
-
Jisas win ba baku, ¿dîa ba lilia wan sakisa?
LILKA ba kaikma, bara naha dukiara aisi banhma:
-
¿Dîa lika yawan sip sa prisant yabaia lalah lainka ra diara uya briras kabia kra sin?
¿Nu kapram ki?
Baibil ba smalkisa wan pura sunisa taim, Jisas nina ra Jehova ra aisaia sa (Jan 16:23, 24 aisi kaikma). Yawan baku daukbia kaka, Jisas ra kulkanka yabisa, kan witin ba diara tara daukan sa yawan Jehova pânika kaia dukiara.
UPLA KUM KUM NAKU LUKISA: “Gâd ba upla trabilka nani ra lukras”.
-
Jisas ba ai Aisika daukanka painkira nani brih sakripais daukan bamna, ¿baha nahki marikisa Jehova bui wan trabilka nani ra luki ba?
DÎA LAN TAKRAM
Jisas ba Jehova ra latwan kaikisa bara upla nani ra sin. Jisas ba ai Aisika baku sa, baku bamna Jisas ra kau kakaira takma taim, Jehova ra sin kau kakaira takma.
Wan kupia krawaia
-
¿Jisas daukan baku, yawan nahki sip sa sim tnatka ra Jehova ra latwan kaikaia?
-
¿Jisas daukan baku, yawan nahki sip sa sim tnatka ra upla nani ra latwan kaikaia?
-
¿Jisas daukanka painkira nani ba tilara ani kau laik sma ki?
KAU PLIKI KAIKS
Jisas daukanka painkira kum kum ra luki, man sim baku dauks.
“Jisas daukan baku yawan sin daukaia sa”. (Jesús: el camino, la verdad y la vida, wahia 317)
Lan taks, dîa muni yawan ba Jisas nina ra wan pura sunaia sa.
“¿Dîa muni yawan ba Jisas nina ra wan pura sunaia sa?” (La Atalaya febrero 1, 2008)
¿Baibil dîa wisa Jisas wîna tara ba dukiara?
¿Jisas nahki mairin nani ra yamni munan ba wina yawan dîa lan takaia sip sa?
“Gâd ba mairin nani ra kulki bara rispik munisa” (La Atalaya septiembre 1, 2012)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
