SMALKANKA 19
¿Jehova witniska nani ba rait aihwa kristianka nani sa?
Jehova witniska nani ba kristian rait aihwa sa. ¿Dîa muni baku sa ki? Kaisa laki kaikaia dîa smalki ba ani wina brisa, bara wan nina bri ba tânka ba sin, baha purkara kaikbia nahki pana pana latwan lâka brih banhwisa.
1. ¿Jehova witniska nani ba ani wina smalkanka nani ba brisa?
Jisas Gâd ra win: “Man smalkankam bîla ba sika diara kasak pali ba” (Jan 17:17). Yawan Jehova witniska nani ba Jisas daukan baku Baibil wina smalkanka nani sut ba sakisa. Luki kaiks wan sturka ba naiwa piua, mani 1879 ra Baibil stadi tatakra daknika kum ba Gâd Bîla ba tihu stadi muni kan. Smalkanka nani sut ba Baibil wina sakan, church nani ba diara wala smalki kan, sakuna witin nani ba Baibil wi ba kat smalkan. Ningkara, Baibil wina dîa lan taki kan ba upla wala nani ra smalki kan. a
2. ¿Dîa muni Jehova witnis wan mâkisa?
Jehova wisa witin ra mayuni uplika nani ba ai witniska sa, kan Jehova tânka kasak ba param aisisa (Hibru Nani 11:4–12:1). Naha luki kaiks, patitara piua ra Gâd bui ai uplika nani ra naku win: “Man nani ba yang witniski nani sma” (Aiseya 43:10 aisi kaikma). Baku sin “Jisas Kraist witnis kasakkira ba” nina brisa (Param Marikan 1:5). Mani 1931 ra yawan ba Jehova witniska nani nina ba brin. Yawan baha nina briaia ba dukiara tara kulkanka lâka brisa.
3. ¿Jehova witniska nani ba Jisas latwanka lâka ba nahki marikisa?
Jisas ba ai disaipilka nani ra kasak latwan kaiki kan bara ai pamali baku kulkan (Mark 3:35 aisi kaikma). Sim tnatka ra, Jehova witniska nani ba asla pali sa Tasba aiska pamalika baku. Baha mita, pana pana wan muihni bara wan lakri wisa (Pilimon 1, 2). Naha adarka na sin yawan walisa: “Wan muihni nani ra latwan kaiks” (1 Pita 2:17). Yawan Jehova witniska nani ba wan latwanka lâka ba tnatka manis ra marikisa wan muihni bara lakri nani sut ra. Tasba aiska ra witin nani trabil brisa taim, pana pana hilp munisa.
KAU LAN TAKS
Jehova witniska nani patitara sturka ba dukiara kau lan taks, bara tânka wala nani kaikma dîa muni witin nani ba kristian rait aihwa banhwisa.
Kristian rait aihwa nani ba ai smalkanka nani ba Baibil wina sakisa, bara upla wala nani ra baha dukiara smalkisa
4. Yawan dîa smalki ba Baibil wina sakisa
Jehova prapit nani dahra aisanka ra win Baibil tânka kasak ba kau klir takaia kan ba. Aiseya 11:9 aisi kaikma, bara naha dukiara aisi banhma:
-
Gâd uplika nani ba Baibil stadi munisa taim, ¿ani “lâka ni banhwan kabia”?
Kaiks nahki dakni kum Baibil tânka pliki kaiki kan, baha nani tilara Charles Russell bâra kan. LILKA ba kaikma, bara naha dukiara aisi banhma:
-
Lilka ra kaikan baku, ¿nahki muni Charles Russell bara stadi tatakra wala nani ba wal Gâd Bîla ba laki kaiki kan?
¿Nu kapram ki?
Aima kum kum, yawan dîa kasak luki kan ba chens munan sa. ¿Dîa muni? Yu lapta ba tawa tawa plis painkira kum ingwi ba baku, Gâd ba tawa tawa ai Bîla tânka ba ai piua kat klir wan munisa (Sins Lâka 4:18 aisi kaikma). Baibil ba chens takras, sakuna yawan Baibil tânka ba kau pain brisa taim, smalkanka nani ba kau yamni takisa.
5. Wan nina tânka ba kat daukisa
¿Dîa muni Jehova witniska nani yawan nina ba brin? LILKA ba kaikma, bara naha dukiara aisi banhma:
-
¿Dîa muni wan nina Jehova witniska nani briaia ba aitani sa?
¿Dîa muni Jehova bui upla nani wahbi sakisa ai witniska nani kabia dukiara? Upla ailal ba Gâd mapara kunin aisisa, baha mita witnis nani ba Jehova tânka kasak ba klir marikaia sa. Kaisa kaikaia nahki kunin wâl ba klir sakan sa.
Rilidian kum kum ba upla ra kunin muni smalkisa Gâd ra aidul wal mayunaia sa. Sakuna, ¿baha rait sa ki? Libait Lâka 26:1 aisi kaikma, bara naha dukiara aisi banhma:
-
¿Baha tikska aisi ba baku ani sa ki tânka kasak ba? ¿Jehova dîa lukisa aidul yus munaia dukiara?
Church tâ uplika kum kum smalkisa Jisas ba Gâd sa. ¿Baha rait sa ki? Jan 20:17 aisi kaikma, bara naha dukiara aisi banhma:
-
¿Tânka kasak ba ani sa ki? ¿Gâd ba Jisas sa ki?
-
Jehova bui ai witniska nani ra blikisa witin bara Jisas tânka kasak ba smalkaia, ¿baha dukiara man dîa lukisma?
6. Yawan ba pana pana latwan kaikisa
Baibil bila, kristian rait aihwa nani ba asla pali kaia sa sim wan wîna tara pîska nani asla ba baku. 1 Korint 12:25, 26 aisi kaikma, bara naha dukiara aisi banhma:
-
¿Kristian rait aihwa nani ba dîa daukaia sa kristian wala nani pât wahwisa taim?
-
¿Man kaikram sa ki nahki Jehova witniska nani ba pana pana latwan lâka mariki ba?
Plis kum ra Jehova witniska nani trabil brisa taim, Tasba pliska wala wina muihni bara lakri nani ba isti hilp munisa. Tânka kum kaikaia dukiara, LILKA ba kaikma. Ningkara naha dukiara aisi banhma:
-
¿Man lukisma Jehova witniska nani upla ra hilp munaia warkka ba latwan lâka sa? ¿Dîa muni?
Kristian rait aihwa nani ba upla hilp nit nani ra tâ baikisa
UPLA KUM KUM NAKU LUKISA: “Jehova witniska nani ba rilidian raya kum sa”.
-
¿Ahkia piua wina Jehova bui ai uplika nani ra “witnis nani” nina mâkan ki?
DÎA LAN TAKRAM
Jehova witniska nani ba kristian rait aihwa sa. Tasba aiska ra yawan ba pamali kum sa Gâd ra mayuni ba. Smalkanka nani ba Baibil wina sakisa, bara Jehova tânka kasak ba upla ra nu munisa.
Wan kupia krawaia
-
¿Dîa muni yawan ba wan nina mâkisa Jehova witniska nani?
-
¿Nahki pana pana yawan ba latwan lâka marikisa?
-
¿Man lukisma ki Jehova witniska nani ba kristian rait aihwa nani sa?
KAU PLIKI KAIKS
Yawan sturka ba kau tânka bris.
Kaiks nahki Jehova witniska nani ba church smalkanka kuninkira ba param sakisa.
Jehova witniska nani dukiara dîa makabi walisma ba tânka bris.
“Jehova witniska nani dukiara aima manis upla makabi wali ba” (jw.org ra kaiks)
Stephen ba upla ra misbara kaiki kan bamna rau muni lâ krikan. Tânka pliki kaiks, Jehova witniska nani ra witin dîa kaikan bara ai rayaka tnatka ba chens munan.
“Yang rayaki ba kau saura taki kan” (La Atalaya julio 1, 2015)
a Mani 1879 wina, Jehova uplika nani ba La Atalaya wauhkataya ba piua bani ulbi sakisa, Baibil dîa pali wi ba smalkaia dukiara.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
