Jehova diara sut ba asla dauki lâ kat mangkisa (1 Korint 14:33). Baha mita ai uplika nani ba asla taki wark daukisa. ¿Kristian kangrigisan ba nahki asla taki wark daukisa? ¿Yawan nahki tâ baikaia sip sa diara sut ba pain takbia dukiara?

1. ¿Kristian kangrigisan ba ya tâ brisa?

Kraist sika kangrigisan “lal[ka] ba” (Epesus 5:23). Jisas ba heven wina, Jehova uplika nani warkka ba tâ brisa. Jisas bui “alba kasak sinskira ba” mangkan: witin nani sika almuk daknika kum sins lâka bri ba, Tâ Bri Daknika nina sin mâkisa (Matiu 24:45-47 aisi kaikma). Pas kristianka nani piua ra, Jerusalem ra apastil bara kangrigisan almukka nani dauki kan baku, naiwa piua ra sin Tâ Bri Daknika ba kangrigisan nani sut ra tâ brisa Tasba aiska ra (Sturka Nani 15:2). Sakuna baha waitnika nani ba wan kristian asla takanka tâ uplika apia sa. Witin nani ba Baibil ra plikisa Jehova kupia lâka ba, bara Jisas tâ bri lâka ra wilinkira bawisa bara nina blikisa.

2. ¿Kangrigisan almukka nani warkka ba ani sa?

Kangrigisan almukka nani ba kristian sinskira nani sa bara Baibil Ulbanka nani ba smalkisa, sepad baku kangrigisan ra hilp muni bara kupia bukisa. Witin nani ba ai warkka mana ba lalah tânka ra briras, Baibil ba witin nani ra wisa “wark ba lalah brin mai dauki pali baku lika daukpara, kuna upla dukia daukaia want pali baku dauks” (1 Pita 5:1, 2). Kangrigisan ra hilp mamunra nani ba kangrigisan almukka nani ra tâ baikisa, piua kum kum lubia ningkara Baibil wi ba kat alki daukisa kaka witin nani sin kangrigisan almukka nani takbia.

Tâ Bri Daknika ba, kangrigisan almukka kum kum ra wahbi sakisa kangrigisan nani ra impaki pura kaikbia dukiara. Naha almukka nani na kangrigisan nani ra wih, muihni bara lakri nani ra kupia kraukanka yabisa bara kupia bukisa. Baku sin witin nani, Baibil lâka bîla nani aisi ba kat almuk bara hilp mamunra nani mangkisa (1 Timoti 3:1-10, 12; Taitus 1:5-9).

3. ¿Kangrigisan ra Witnis bani dîa warkka daukisa?

Muihni bara lakri nani sut ba aidrubanka nani ra ai mihta buki aisi, aisanka yabi bara aiwanisa taim, Jehova “nina ba mayunbia”. Baku sin, Jehova ra mayunisa dîa sip ba kat smalkaia warkka daukisa taim (Lawana Nani 148:12, 13 aisi kaikma).

 KAU LAN TAKS

4. Jisas ba tâ brabrira kum wan karbanka nani ingni daukaia wankisa

Jisas ba paiwanka painkira kum wankisa. Matiu 11:28-30 aisi kaikma, bara naha dukiara aisi banhma:

• ¿Jisas ba nahki wan tâ brisa? ¿Bara witin nahki want sa wan dara walbia?

5. Kangrigisan almukka nani ba diara pain dauki wan smalkisa

1. Kangrigisan almukka nani ba Jehova wal asla pali sa, bara ai pamalika ra hilp munisa sim baku daukbia

2. Kangrigisan almukka nani ba kangrigisan uplika nani sut ra main kaikisa

3.   Kangrigisan almukka nani ba piua bani smalki taukisa

4. Kangrigisan almukka nani ba smasmalkra sa. Witin nani ba klin munisa bara wark wala sin daukisa

6. Kangrigisan almukka nani warkka ba tâ baikaia sa

Baibil ba tânka tara wan marikisa, kangrigisan almukka nani ra tâ baikaia dukiara. Hibru Nani 13:17 aisi kaikma, bara naha dukiara aisi banhma:

• ¿Dîa muni Baibil wan wisa almuk nani bîla wali bara rispik munaia sa? ¿Baku daukaia ba pain sa lukisma ki? ¿Dîa muni?

Luk 16:10 aisi kaikma, bara naha dukiara aisi banhma:

• ¿Dîa muni piua bani almuk nani bîla walaia sa, yawan mapara diara sirpi kabia sin?

 DÎA LAN TAKRAM

Jisas lika kristian kangrigisanka ba tâ brisa. Kangrigisan almukka nani ba Jisas karnika munhtara sa, bara yawan witin nani ra tâ baikisa, kan main wan kaikisa bara ai daukanka painkira nani wal wan smalkisa.

Wan kupia krawaia

• ¿Kangrigisan lalka ba ya?

• ¿Kangrigisan almukka nani ba nahki kangrigisan ra hilp munisa?

• ¿Jehova uplika nani ba kumi bani kangrigisan bilara dîa warkka nani brisa?