Diara saura takisa taim, upla manis naku makabi walisa “¿dîa muni baha takan?”. Sakuna ¡Yawan lilia sa kan baha dukiara Baibil ba diara kasak smalkisa!

1. ¿Sitan nahki saura lâka ba Tasba ra dingkan?

Sitan ba Gâd mapara buan. Sitan want kan upla sut kingka kaia, baha mita pas upla Adam bara Iv ra traika kaikan Gâd mapara bubia dukiara. Baha daukan Iv ra kunin aisan taim (Blasi Sturka 3:1-5). Witin ra kunin munan taim, Iv lukan Gâd mita diara yamni kumi sin upla ra yabras bara Gâd saura daukisa lukan. Sitan want kan upla lukbia kau liliakira kabia Gâd bîla walras kaka. Sitan bui Iv ra kunin muni win, witin ba pruaia apia kan, baha sika kunin lâka pas takan ba. Baha mita Baibil bila Sitan ba “lika kuninkira pali sa bara sin kunin aisika sa” (Jan 8:44).

2. ¿Adam Iv wal dîa daukan ki?

Jehova lika kupia pihni lâka kasak marikan Adam bara Iv ra. Witin nani ra win Eden giadinka ra dus mâ sâtka sut ba piaia sip kan, kumi baman lika piaia apia kan (Blasi Sturka 2:15-17). Ban sakuna witin nani lukan dusa mâ ba ban piaia. Baibil bila Iv “mâ ba wina brin, bara pin. Baha ningkara ai maya ra sin yan, bara witin sin wal baku brih pin” (Blasi Sturka 3:6). Witin nani ba Gâd bîla walras kan. Adam Iv wal diara sut mapara kasak kan, baha mita sip kan isi Gâd bîla walaia. Sakuna witin nani lukan Gâd bîla walaia nit apia. Baha daukan taim, saura dadaukra taki banhwan bara want apia kan Gâd mita dîa pain ba bara dîa saura ba wibia (Blasi Sturka 3:16-19).

3. Adam Iv wal daukan ba, ¿nahki saura wan munan sa?

Adam Iv wal saurka lâka daukan taim, diara sut mapara ai wîna tara bara ai rayaka ba kasak apia takan bara ai kiamka sakan taim baha nani sut sim sât takan. Adam mapara Baibil bila: “Saurka ba upla kumi tâka ba mita upla sut ra luan, bamna saurka ba mita prura balan bara prura ba upla sut ra alkan sa” (Roman 5:12).

Bara, ¿dîa muni yawan sut pât wahwisa? Sam taim diara pain apia ba yawan daukisa. Baku sin upla wala saura daukisa taim ambuk wan munisa. Anira kabia ahkia kabia kra sin, aima kum kum ban wina bîla kaikras kan diara saura kum wan takaia sip sa (Smasmalkra 9:11 aisi kaikma).

 KAU LAN TAKS

4. ¿Yawan pât wahwi ba ya pâtka sa ki?

Upla ailal lukisa Gâd mita upla nani sut ba ai karnika mununhtara brisa. ¿Sakuna baha ba rait sa ki? LILKA ba kaikma.

Job 34:12 bara 1 Jan 5:19 aisi kaikma, bara naha dukiara aisi banhma:

• ¿Saura lâka bara pât wahwanka ba Gâd wina balisa?

5. ¿Sitan Tasba na ai karnika mununhtara bri ba mita, dîa takisa?

1. Adam bara Iv diara sut mapara kasak kan, bara Paradais ra iwi kan. Sakuna Sitan bîla walan bara Gâd mapara buan

2.   Witin nani Gâd mapara buan taim, upla nani ba saurka lâka alkan, panis bara prura sin

3. Jehova mita saurka lâka tikbia bara prura sin. Kli upla nani ba diara sut mapara kasak kabia bara Paradais ra iwbia

6. Jehova sari sa yawan pât wahwi ba mita

Yawan panis wahwisa taim, ¿Gâd sari takisa? Laki kaiks king Debit bara apastil Pita dîa ulban. Lawana Nani 31:7 bara 1 Pita 5:7 aisi kaikma, bara naha dukiara aisi banhma:

• Yawan panis wahwisa taim Jehova sari takisa bara wan lukisa, baha man nu takisma taim, ¿nahki damra walisma?

 DÎA LAN TAKRAM

Sitan, Adam bara Iv Gâd bîla walras kan ba mita tasba ra saurka lâka balan. Yawan pât wahwisa taim Jehova sari takisa, bara naika piua baila ba ra pât wahwanka ba witin âpu daukbia.

Wan kupia krawaia

• ¿Sitan ba Iv ra dîa kuninka win?

• Adam Iv wal Gâd mapara buan ba mita, ¿nahki upla sut ra saura munisa?

• ¿Yawan nahki nu sa upla pât wahwi ba Gâd kaikisa taim witin sari taki ba?