Pâna kum prisant maikisa taim, ¿man nahki damra walisma? Ban kra, man kasak lilia sma bara pâmnika ra marikaia want sma nahki prisantka ba yamni kulkisma. Jehova Jisas wal prisant kau kulkanka tara bri ba wankan. ¿Ani sa ki baha prisantka ba? ¿Bara baha prisantka dukiara yawan tingki luki ba nahki marikaia sip sa?

1. Jehova bara Jisas yawan dukiara dîa daukan ba, ¿nahki tnatka ra yawan tara kulkaia sip sa?

Baibil pramis munisa “ani uplika [Jisas] ra kasak lukbia ba” raya ban kaia lâka ba bribia (Jan 3:16). ¿Wan kasak lukanka lâka ba yawan nahki marikaia sip sa? Yawan kasak luki ba wiaia baman aitani apia sa, kau ni yawan dîa luki bara dîa dauki ba wal wan kasak lukanka lâka marikaia sa (Jems 2:17). Baku daukbia kaka, Jisas bara Jehova wal yawan kau pânika takisa (Jan 14:21 aisi kaikma).

2. ¿Ani piua ra chans tara takisa Jehova bara Jisas ra wan tingkika lâka marikaia?

Jisas kau pruras tihmika ra, ai nina blablikra nani ra win nahki sip sa tingki lâka marikaia ai sakripaiska dukiara. Witin nani ra win asla aidrubia yua pranakira kum tara kulkaia dukiara. Baha yua ba Baibil mita naha nina mâkisa Dawan tutnika pata, baku sin Jisas pruan kupia kraukanka ba nina mâkisa (1 Korint 11:20). Jisas ba baha yua tara kulkaia bapi mangkan, bara ai apastilka nani ra tara kulkbia win, baku sin naika ra kristian rait aihwa nani ba sin baha yua ba kulkan kaia kan, baku wan kupia kraukbia nahki witin ai rayaka ba yaban upla sut dukiara. Baha yua pranakira ba dukiara Jisas naha adarka yaban: “Naha na yang ra luki, dauki bas” (Luk 22:19). Jisas pruan kupia kraukanka aidrubanka ra man dimisma taim, tingki lâka marikisma Jehova bara Jisas latwan tara wan kaiki ba dukiara.

 KAU LAN TAKS

3. ¿Yawan tingki luki ba nahki marikaia sip sa?

Wira luki kaiks ban kra awala kum ra dimi pât ra sma, kan man yawi lan âpu, sakuna upla kum swaki mai sakisa. ¿Baha uplika man dukiamra dîa daukan ba âmya tikma ki? ¿Apia kaka tnatka plikma nahki witin ra tingki lâka marikaia?

Jehova ai kupia pihni lâka ba mita raya ban kaia lâka yawan briaia sip sa. 1 Jan 4:8-10 aisi kaikma, bara naha dukiara aisi banhma:

• ¿Dîa muni Jisas sakripaiska ba prisant pranakira kum sa?

• Jehova bara Jisas man dukiamra dîa daukan ba lukisma taim, ¿man nahki damra walisma?

Jehova bara Jisas yawan dukiara dîa daukan ba luki, ¿man nahki sip sma tara kulkan lâka marikaia? 2 Korint 5:15 bara 1 Jan 4:11; 5:3 aisi kaikma. Tiks bani aisi kaikma ningkara, naha dukiara aisi banhma:

• Baha tikska nani aisi ba baku, ¿yawan nahki sip sa tingki lâka ba marikaia?

4. Jisas daukan baku yawan daukisa

Yawan tingki luki ba tnatka wala ra marikisa. 1 Pita 2:21 aisi kaikma, bara naha dukiara aisi banhma:

• ¿Nahki pali man sip sma Jisas daukanka nani nina blikaia?

• ¿Jisas pruan kupia kraukanka piua ra dîa takisa?

 DÎA LAN TAKRAM

Jisas dîa daukan ba dukiara yawan tingki lukisa kaka, witin ra kasak luki ba wan daukanka ni marikaia sa, baku sin Jisas pruan kupia kraukanka aidrubanka ra dimaia sa.

Wan kupia krawaia

• ¿Nahki pali upla kum marikisa Jisas ra kasak luki ba?

• Jehova bara Jisas man dukiamra dîa daukan ba lukisma taim, ¿man nahki tnatka ra tingki lâka ba marikaia want sma?

• ¿Dîa muni diara tara sa Jisas pruan kupia kraukanka ra asla aidrubaia?