Wan uplika kum pruisa taim yawan latwan wahwisa bara sari takisa. Baha mita Baibil wisa prura ba waihla kum sa (1 Korint 15:26). Smalkanka 27 ra, man lan takram Jehova bui baha waihla ba sauhki tikbia. ¿Sakuna pat pruan uplika nani ra dîa takbia? Naha smalkanka ra, man lan takma Jehova pramiska pranakira wala wanki ba: upla milian milian nani ba kli raya takbia bara lilia ban kaia ra iwbia. ¡Jehova mita pruan wina kli bukbia! ¿Rait pali baha takaia sip sa? ¿Baha uplika nani ba heven ra, apia kaka Tasba ra buan kabia?

1. ¿Wan uplika latwankira pruan nani ba dukiara Jehova dîa daukaia want sa?

Jehova want pali sa upla pruan nani ba kli raya takbia. Job kasak lukan lâka bri kan bamna kasak nu kan Gâd mita raiti wina kli bukaia sip kan ba. Witin Gâd ra win: “Man ai winma kaka, yang mita sin pana mai aisamna” (Job 14:13-15 aisi kaikma).

2. ¿Yawan nahki nu sa pruan nani ba kli buaia sip sa?

Jisas Tasba ra kan taim, Gâd bui witin ra karnika yaban upla pruan nani bukaia. Baha mita Jisas ba tuktan mairin kum 12 mani bri pruan ba ra kli bukan, bara piarka mairin luhpia pruan ba sin bukan (Mark 5:41, 42; Luk 7:12-15). Ningkara, ai pânika Lasarus ba pruan. Witin pat yu walhwal bri kan bikan ba, sakuna Jisas mita witin ra bukan. Jisas ba Gâd ra ai pura suni karna wini Lasarus ra win: “¡Lasarus, baha wina bal taks!” Bara “pruan kata ba bal takan” ¡Lasarus ba kli raya takan! (Jan 11:43, 44). ¡Luki kaiks Lasarus pamalika bara pânika nani ba nahki lilia takan witin ra kli kaikan taim!

3. ¿Man uplikam nani pruan ba kli kaikaia bîla kaikisma ki?

Baibil pramis munisa: “pruan nani ba kli buaia sa” (Sturka Nani 24:15). Baha nani Jisas mita pruan wina kli bukan ba heven ra waras kan (Jan 3:13). Witin nani ba lilia kan kli naha Tasba ra raya kaia. Baha piua ra Jisas daukan baku, tisku piua ra witin kli upla milian pura milian pruan ba, raiti wina buki kabia naha Tasba paradaiska ra ban kaia ra lilia iwaia dukiara. Witin win baha uplika nani sut Gâd ai auya ra bri ba raiti wina buan kabia, yawan kakaira apia uplika nani ba kat sin (Jan 5:28, 29).

 KAU LAN TAKS

4. Jisas klir marikan upla pruan nani ra kli bukaia sip sa

Kau lan taks nahki Jisas ai pânika Lasarus dukiara diara daukan ba. Jan 11:14, 38-44 aisi kaikma, bara naha dukiara aisi banhma:

• ¿Yawan nahki nu sa Lasarus ba rait pali pruan ba? (bors 39 ba kaiks).

• Lasarus ba rait pali heven ra wan kaka, ¿man lukisma Jisas witin ra kli bri balaia nit kan naha Tasba ra?

LILKA ba kaikma.

5. ¡Upla ailal pruan ba raiti wina buan kabia!

Lawana Nani 37:29 aisi kaikma, bara naha dukiara aisi banhma:

• ¿Upla milian pura milian pruan ba raiti wina bubia taim anira iwbia ki?

Jisas bui Jehova ra mayuni uplika nani ra baman raiti wina bukbia apia, upla kau ailal ra bukbia. Sturka Nani 24:15 aisi kaikma, bara naha dukiara aisi banhma:

• ¿Kli buanka lâka piua ba balbia taim yaura kli kaikan mai daukisa?

• Pruan wina kli buanka lâka ba, ¿nahki muni Phelicity aisika nani ra maisa nihki bara kupia bukan sa?

 DÎA LAN TAKRAM

Baibil pramis munisa upla milian milian pruan ba kli buan kabia. Jehova want pali sa pruan nani ba kli raya takbia, bara Jisas ra karnika yaban upla pruan ba kli bukaia.

Wan kupia krawaia

• ¿Yawan nahki nu sa Jehova Jisas wal, upla pruan nani ra kli bukaia want sa?

• Upla pruan milian milian nani ba, ¿anira buan kabia: heven ra, apia kaka Tasba ra? ¿Dîa muni baku wisma?

• ¿Dîa muni man kasak lukisma uplikam pruan nani ba kli raya takbia?