Tasba aiska ra upla nani ba rum diaia dukiara diara sât sât lukisa. Upla kum kum ba ai pânika nani aikuki asla sa taim rum dîsa. Wala nani ba rum diaia laik apia sa. Bara wala nani ba uba rum ailal di ba mita bla takisa. ¿Rum diaia dukiara Baibil ba dîa smalkisa?

1. ¿Rum diaia ba saura sa ki?

Baibil ba wiras rum diaia ba saura sa. Kau ni Baibil wisa “wain ba upla rayaka ra lilia yabisa” bara baha ba Jehova wina prisant kum (Lawana Nani 104:14, 15). Baibil aisisa waitna bara mairin kasakkira nani ba sin, wain dih banhwi kan (1 Timoti 5:23).

2. ¿Rum diaia luki uplika nani ra Baibil dîa smalkisa?

Jehova saura pali kaikisa uba rum ailal diaia ba, bara bla takaia ba sin (Galesha 5:21). Baibil ba wisa: “Wain dadira nani tilara kapara” (Sins Lâka 23:20). Baha mita yawan yakan, apia kaka upla wala wal rum dih banhwisa kaka, wan kupia kraukaia sa wan sinska klir kaia, dîa aisi ba pain wiaia, bara wan daukanka ba sin yamni kaia sa. Baku sin yawan aman kaikaia sa, rum uba diaia ba wan wîna tara yamnika sauhkisa. Yawan sip alki takaskras ba mita uba rum dîsa kaka, kau pain kabia rum diaia apia.

3. ¿Rum diaia dukiara upla dîa luki ba yawan nahki sip sa rispik munaia?

Upla bani diara daukbia ba wahbi sakaia sa rum diaia, apia kaka dibia apia ba. Upla kum wiria rum diaia want kaka yawan saura lukaia apia sa, bara upla kum rum diaia want apia kaka, yawan taibi munaia apia sa dibia dukiara (Roman 14:10). Bara yawan rum di ba upla wala nani wan kaiki saura ai dara walbia kaka, kau pain sa diaia apia (Roman 14:21 aisi kaikma). Kristian “bani ai hilpka plikaia apia sa, sakuna upla wala nani hilpka lika” (1 Korint 10:23, 24 aisi kaikma).

 KAU LAN TAKS

4. Rum diaia, apia kaka dima apia ba laki kaiki wahbi sâks

¿Rum diaia dukiara Jisas ba dîa luki kan? Baha tânka briaia dukiara laki kaiks, Jisas pas sain tara kum daukan ba. Jan 2:1-11 aisi kaikma, bara naha dukiara aisi banhma:

• Naha tikska ra aisi ba baku, ¿Jisas ba rum dukiara, bara rum di uplika nani dukiara dîa luki kan?

• Jisas ba rum diaia dukiara saura kulkras kan ba mita, ¿upla kum rum dih ba ra yawan kaiki dîa lukaia sa ki?

Kristian nani ba rum diaia sip sa, sakuna piua bani diaia ba tânka apia sa, kan tânkira lâka ba marikras. Sins Lâka 22:3 aisi kaikma, bara ningkara laki kaiks baha piua nani ra rum diaia pain sa sapa:

• Truk wakaisma, apia kaka masin tara kum wal wark takma taim.

• Mairin kum kwihra sa taim.

• Daktar kum mai win rum diaia apia sma.

• Uba rum diaia trabilka ba brisma kaka.

• Gabamint lâka nani ba ra wisa rum diaia apia sma.

• Man upla kum rum diaia want apia ba wal asla sma, witin pas piua ra uba rum di kan ba mita.

¿Marit takan liliaka kum ra, apia kaka liliaka wala ra upla ra rum diaia yabaia pain sa ki? Baku daukaia lukisma kaka naha laki kaiks, LILKA ba kaikma.

Roman 13:13 bara 1 Korint 10:31, 32 aisi kaikma. Aisi kaikma ningkara, tikska bani naha tânka dukiara aisi banhma:

• ¿Jehova kupia lilia dauki wahbi sakanka kum daukaia dukiara, naha smalkanka ba nahki hilp mai munaia sip sa?

 5. Wahbi sâks dîa pitka kat diaisma

Rum diaia lukisma kaka, kupiam krauks, rum diaia ba Jehova saura kaikras sa, kuna saura kaikisa ailal dih bla takaia ba. ¿Dîa muni? Oseas 4:11, 17, 18 aisi kaikma, bara naha dukiara aisi banhma:

• ¿Upla kum uba rum dîsa kaka, dîa takaia sip sa?

¿Dîa hilp wan munaia sip sa rum uba diaia apia dukiara? Yawan lukaia apia sa rum uba dibia kra sin diara takbia apia. Kau ni nu kaia sa wan pitka nani ba. Sins Lâka 11:2 aisi kaikma, bara naha dukiara aisi banhma:

• ¿Dîa muni lukanka pain kum sa rum diaisa taim pitka kum mangkaia?

6. Rum diaia trabilka wina pri takri

 DÎA LAN TAKRAM

Rum ba Jehova wina prisant kum sa. Kuna Jehova laik apia sa bla takaia bara ban pura lui diaia ba.

Wan kupia krawaia

• ¿Rum diaia dukiara Baibil ba dîa wisa?

• ¿Dîa saura wan takaia sip sa uba rum dîsa kaka?

• ¿Upla wala nani rum diaia dukiara dîa luki dauki ba ra nahki rispik lâka marikaia sip sa?