SMALKANKA 44
¿Gâd ba liliaka yua nani sut yamni kaikisa ki?
Jehova want sa yawan wan rayaka ra lilia kabia, sam taim liliaka nani dauki. ¿Sakuna liliaka nani sut ba Jehova yamni kaikisa ki? ¿Yawan nahki marikaia sip sa witin ra latwan kaikisa, bara nahki ai dara wali ba ra tara kulkisa?
1. ¿Dîa muni Jehova ba liliaka ailal yamni kaikras?
Ban kra tâ iwma nu takaia, liliaka aihkika ba idan lâka wina bal takan sa, apia kaka Baibil ra ai plamaika briras. Liliaka kum kum ba rilidian kuninkira nani wina bal takan sa. Wala nani ba sukia lâka wal wilkan sa, apia kaka sulka ba pruras sa lukanka bribia tukbisa. Kum kum ba sirpi wina liliaka nani kulkbia lan daukan sa, bara liliaka wala nani ba lat (suerte) ra kulkanka yabisa (Aiseya 65:11). Jehova ai uplika nani ra naku maisa pakisa: “Dakwi taki bal taks [...] diara tâski ba kangbi banhpara” (2 Korint 6:17). a
2. ¿Jehova dîa lukisa liliaka kum kum upla nani ra uba mayuni ba dukiara?
Jehova wan wisa “upla nani ra kasak luk[aia]” apia, kan trampika kum sa (Jirimaya 17:5 aisi kaikma). Liliaka kum kum ba gabamint tâ bri uplika, kuntri ra kulkanka nina tara bri uplika bara plakin ra sin prana yabisa. Apia kaka ai kuntrika pri takan deka ba kulkisa (1 Jan 5:21). Baku sin pulitik ra tâ baiki liliaka nani bâra sa. Upla kum apia kaka asla takanka kum ra yawan uba mayunanka yabisa kaka, kau pali Gâd kupia lâka mapara sa kaka, ¿witin nahki ai dara walbia lukisma?
3. ¿Liliaka kum ra ani daukanka nani Jehova yamni kaikras?
Baibil ba “bla lâka”, “pata pira binka nani” bara “diranka kum ailal pali” ba saura pali kulkisa (1 Pita 4:3). Liliaka kum kum nani ra upla manis ba ai daukanka nani sip alki takaskras, bara rug lâka ra kauhisa. Yawan Jehova wal ban pâna kaia want sa kaka, baha daukanka saura nani wina sait ra kaia sa.
KAU LAN TAKS
Liliaka nani pain wahbi sâkma kaka, Jehova kupia lilia daukaia sip sma.
4. Jehova yamni kaikras liliaka nani wina sait ra kap
Epesus 5:10 aisi kaikma, bara naha dukiara aisi banhma:
-
¿Liliaka kum kau kulkras kainara, dîa tânka nani laki kaikaia nit sa?
-
¿Man iwisma pliska ra upla nani ba ani liliaka nani kulkisa?
-
¿Baha liliaka nani ra Jehova yamni kaikisa lukisma?
Aisuban yua liliaka dukiara wira luki kaiks. ¿Jehova baha liliaka nahki kaikisa lukisma? Baibil ra sturi kumi sin âpu sa, Jehova ra mayuni uplika kum aisuban yua liliaka kulkan ba. Aisuban yua liliaka sturka nani wâl takisa, kuna wâlsut ba Jehova ra mayunras uplika nani mita daukan kan. Blasi Sturka 40:20-22 bara Matiu 14:6-10 aisi kaikma. Ningkara naha dukiara aisi banhma:
-
¿Baha aisuban yua liliaka nani wâlsut ra dîa takan sa?
-
Aisuban yua liliaka dukiara Jehova dîa luki ba, ¿baha sturka nani dîa wan smalkisa?
Man lukisma “¿Yang aisubanka yua liliaka kulkisna, apia kaka Baibil ra plamaika briras liliaka kum ra wisna ba, rait pali Jehova mapara tânka tara brisa ki?”. Impakan Sturka 32:1-8 aisi kaikma. Ningkara LILKA ba kaikma, bara naha dukiara aisi banhma:
-
¿Jehova diaura yamni kaikisa sapa laki kaikaia ba dîa muni tânka tara brisa?
-
¿Nahki tnatka ra baha daukaia sip sa?
Liliaka kum Gâd yamni kaikisa sapa nahki nu takaia sip sa
-
¿Baibil smalkanka nani ra ai plamaika brisa ki? Baha nu takaia dukiara, ani wina bal takan tânka ba pliki kaiks.
-
¿Upla nani, asla takanka nani apia kaka kuntri plakinka nani ra uba prana yabisa ki? Diara sut purkara yawan ba Jehova ra prana yabisa. Baku sin kasak lukisa naha tasba trabilka nani ba witin mita wapnika mangkbia.
-
¿Baha liliaka nani ra dîa dauki ba Baibil smalkanka wal asla sa ki? Yawan lukanka bara daukanka klin ban bri kaia sa.
5. Upla wala nani ra hilp munaia sip sma diaura kasak lukisma ba tânka bribia
Jehova yamni kaikras liliaka kum kulkma upla wala nani mita taibi mai munisa taim, “apia” wiaia isi apia sa. Wihka bîla kaikan lâka bara rispik lâka wal, dîa daukaia lukisma ba tânka marikaia sip sma. Upla kum nahki tnatka ra baku daukan ba nu takaia dukiara LILKA ba kaikma.
Matiu 7:12 aisi kaikma, bara naha dukiara aisi banhma:
-
Naha borska ra luki, ¿man pamalikam kristian apia ba ra wiaia sma ki witin nani liliaka kum kulki ba danh swiaia sa?
-
Liliaka kum aikuki kulkras kabia kra sin, ¿pamalikam ra tara kulki latwan kaikisma ba nahki tnatka ra marikaia sip sma?
6. Jehova want sa yawan lilia kabia
Jehova want sa yawan wan pamalika bara pânika nani wal piua lilia lubia. Smasmalkra 8:15 aisi kaikma, bara naha dukiara aisi banhma:
-
¿Naha borska ba nahki marikisa yawan lilia kabia Jehova brinka sa?
Jehova want sa ai uplika nani ba aikuki taim pain lui lilia kabia. Jehova witniska nani kuntri ailal aidrubanka kau tara nani ra baha kaikaia sip sa. LILKA ba kaikma.
Galesha 6:10 aisi kaikma, bara naha dukiara aisi banhma:
-
Upla wala nani ra “diara pain nani dauk[aia]” dukiara, ¿liliaka kum kum upla nani kulki ba yawan sin kulkaia sa ki?
-
¿Dîa sât prisantka yabaia want sma: liliaka yua ba mita taiban lâka ni yabisma ba, apia kaka kupiam wina yabisma ba?
-
Jehova witniska manis ba ai luhpia nani ra diara painkira daukaia wisi, sam taim liliaka nani daukisa. Bara prisant nani sin yabisa. Man luhpa brisma kaka, dîa dukia painkira nani daukaia sip sma?
UPLA KUM KUM NAKU LUKISA: “Liliaka nani ani wina bal takan sa sapa lukaia nit apia sa. Kau tânka tara bri ba sika pamali bara pâna nani wal taim pain kum luaia”.
-
¿Man dîa wima?
DÎA LAN TAKRAM
Yawan wan pamalika bara pânika nani wal piua lilia lubia Jehova want sa. Kuna want apia sa witin yamni kaikras liliaka nani yawan kulkbia.
Wan kupia krawaia
-
Liliaka kum Jehova yamni kaikisa sapa nu takaia dukiara, ¿ani tânka nani laki kaikaia nit sa?
-
Liliaka nani dukiara yawan dîa luki ba wan pamalika bara pânika nani tânka bribia dukiara, ¿witin nani ra nahki hilp munaia sip sa?
-
¿Nahki nu sa Jehova want sa yawan lilia kabia?
KAU PLIKI KAIKS
Kaiks kristian nani ba ani liliaka nani kulkras sa.
“¿Dîa muni Jehova witniska nani ba liliaka yua kum kum kulkras sa?”(jw.org ra kaiks)
Tânka walhwal kaiks, dîa muni aisubanka yua liliaka ra Gâd yamni kaikras sa.
“¿Dîa muni Jehova witniska nani ba aisubanka yua liliaka daukras sa?” (jw.org ra kaiks)
Naha tasba liliaka nani tilara, Jehova ra latwan kaiki tuktika nani ba nahki Gâd kupia lilia dauki ba kaiks.
Kristian nani manis ba krismis kulkras. ¿Witin nani nahki ai dara wali banhwisa?
“Diara kau pain nani pliki saki banhwan” (La Atalaya, diciembre 1, 2012)
a Liliaka kum kum wal dîa daukaia sa sapa kau nu takaia want sma kaka, ulbanka tâka 5 ba kaiks.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
