SMALKANKA 50
Pamalikam ba lilia kaia sip sa (pîska 2)
Luhpa nani ba Jehova prisantka kum sa. Witin want sa aisa yapti nani baha prisantka ba pain main kaikbia. Ba mita smalkanka pain nani yabisa baha daukbia dukiara. Baku sin luhpa nani ra smalkanka nani yabisa ai pamalika aikuki pain kabia dukiara.
1. ¿Jehova mita aisa yapti nani ra dîa smalkanka nani yabisa?
Jehova aisa yapti nani ra bîla kaikisa ai luhpia nani ra latwan kaikaia, bara sip ba kat aikuki taim luaia. Baku sin witin want sa trabil nani sut wina kaina kahbi kabia, bara Baibil smalkanka nani wal lan dauki bri kabia (Sins Lâka 1:8). Luhpa nani dukiara Gâd ba pamali lalka nani ra naku wisa: “Dawan [Jehova] latwan lâka ra witin nani ra smalki paks, lâ kat wapni tauki kaia” (Epesus 6:4 aisi kaikma). Jehova laik sa kaikaia aisa yapti nani ai luhpia nani ra witin ai lâka nani kat smalki paki ba. Witin nani swiras baha wihrika ai pahpaya ra bri ba upla wala nani daukbia.
2. ¿Jehova mita luhpa nani ra dîa smalkanka nani yabisa?
Jehova luhpa nani ra makabisa ai “aisi[ka] nani bîla wali dauki” kabia (Kolosi 3:20 aisi kaikma). Luhpa kum ba ai aisika yaptika ra rispik muni bîla walisa kaka, ai aisika yaptika bara Jehova sin lilia takbia (Sins Lâka 23:22-25). Jisas ba tuktan pain kum kan. Witin ba sunu kan, kuna ai aisika bara yaptika ra ban bîla wali rispik muni kan, witin nani ba mistikkira kan kuna (Luk 2:51, 52).
3. ¿Jehova lamara kaia dukiara pamali uplika kumi bani ba dîa daukaia sa?
Luhpa nani brisma kaka, kasak pali brin mai daukisa Jehova ra latwan kaiki banhbia, sim man daukisma baku. ¿Baha nahki daukaia sip sa? Naha Baibil smalkanka ba nina bliki: “Luhpiam nani ra ban smalki bas, wamtla ra kama, yabal ra kama sin baha dukiara aisi bas” (Kli Smalkanka 6:7). Ban smalki bas tânka ba, piua bani ra ban smalki kaia. Man pat nu sma kaia sa, aima ailal ra kli kli tuktan nani ra aisaia ba nit sa, ai auya tiwbia apia dukiara. Baku bamna, naha tikska wiaia want ba, Jehova dukiara luhpiam nani ra aisaia sanska piua bani pliki sakaia sma. Baha purkara, wik bani pamali baku aikuki Baibil stadi taki, Jehova ra mayunaia ba pain sa. Luhpiam nani âpu kama sin, wik bani Gâd Bîla stadi takaia ba uba hilp mai munbia.
KAU LAN TAKS
Smalkanka kum kum laki kaikbia, yu bani alki dauki, pamali nani ba lilia bara âuyapah kabia dukiara.
4. Latwan lâka wal luhpiam nani ra lan dauki bas
Luhpa kum ra lan daukaia ba isi apia sa. ¿Baibil ba nahki hilp mai munbia? Jems 1:19, 20 aisi kaikma bara naha dukiara aisi banhma:
-
Aisa yapti nani ba ai luhpia nani wal aisisa taim, ¿latwan lâka ba nahki marikaia sip sa ki?
-
¿Dîa muni aisa kum ba ai luhpia kum ra wapnika mangkaia piua ra, ai kupia baikaia apia sa ki? a
5. Luhpiam nani ra kaina kahs
Luhpiam nani ra kaina kahbaia dukiara nit pali sa, upla wal yapaia lâka dukiara kumi bani wal aisama. Âu, baha daukaia pain wan dara walras. LILKA ba kaikma bara naha dukiara aisi banhma:
-
¿Dîa muni aisa yapti kum kum karna munisa upla wal yapaia lâka dukiara ai luhpia nani wal aisaia?
-
¿Aisa yapti kum kum ra dîa hilp munan sa ai luhpia nani wal naha dukiara aisaia?
Baibil aisi ba baku, Sitan tasbaya ba piua bani kau saura takisa. 2 Timoti 3:1, 13 aisi kaikma bara naha dukiara aisi banhma:
-
Upla saura kum kum dukiara naha borska 13 ra aisi ba tilara sa, tuktan nani ra alki saura muni nani ba. Bara, ¿dîa muni aitani sa aisa yapti nani ba ai luhpia nani ra upla wal yapaia lâka dukiara smalkaia? ¿Bara alki saura munbia wina kaina kahbaia dukiara dîa daukaia sip sa?
¿Nu kapram ki?
Jehova witniska nani ba wauhkataya bara lilka nani ailal sakisa. Aisa yapti nani ra kasak hilp munisa, ai luhpia nani ra upla wal yapaia lâka tânka smalkaia dukiara, bara upla mita alki saura munbia apia dukiara kaina kahbisa. Naha nani ba tila wina kum kum sa:
6. Aisikam yaptikam nani ra kulks
Wahma tiara nani bara tuktan nani ba ai aisika yaptika ra kulkaia sa. Bara baha kulkaia lâka ba nahki tnatka ra aisi ba wal marikisa. LILKA ba kaikma bara naha dukiara aisi banhma:
-
¿Dîa muni wahma bara tiara nani mapara ai aisika bara ai yaptika ra rispik lâka wal aisaia ba pain sa ki?
-
¿Wahma bara tiara nani ba ai aisika bara ai yaptika ra nahki rispik lâka marikaia sip sa?
Sins Lâka 1:8 aisi kaikma bara naha dukiara aisi banhma:
-
Ai aisika bara ai yaptika mita diara kum daukbia wisa taim, ¿wahma bara tiara nani ba nahki ai dara walaia sa?
7. Pamali baku Jehova ra mayuni banhs
Jehova witniska nani ba wik bilara piua kum wahbi sakisa, pamali aikuki asla Gâd ra mayunaia dukiara. ¿Baha mayunra ba nahki daukisa? LILKA ba kaikma bara naha dukiara aisi banhma:
-
¿Wik bani pamali mayunra daukaia dukiara dîa ba hilp munbia?
-
¿Nahki aisa yapti nani ba pamali mayunra ba daukaia sip sa, isi bara sut lilia kabia dukiara? (Naha smalkanka pas lilkika ba kaiks).
-
Man mampara, ¿diara kum bâra sa ki kainam praki ba pamali aikuki sip stadi takras sma? ¿Ani kabia?
Patitara piua ra, Israel pamalika nani ra Jehova bîla kaiki kan, pamali nani sut ba Gâd Bîla dukiara aisaia tnatka ba bri banhwi kabia. Kli Smalkanka 6:6, 7 aisi kaikma bara naha dukiara aisi banhma:
-
¿Man naha smalkanka ba nahki alki daukaia sip sma?
Pamalikam aikuki mayunra dukiara lukanka nani:
-
Kangrigisan ra aidrubanka nani dukiara ridi taki banhs.
-
Baibil sturka kum pamalikam laik kaiki ba aisi kaiki, ningkara baha dahra aisi banhs.
-
Luhpa sirpi nani brisma kaka, jw.org wina tuktan nani dukiara dîa bâra ba lahbi kaiki banhs.
-
Wahma tiara nani brisma kaka, jw.org ra wahma tiara nani dukiara ulbanka kum wahbi bris.
-
Pamalikam wal asla taki, Baibil pulanka nani dauki banhs.
-
jw.org ra lilka kum kaiki, pana pana aisi banhs.
UPLA KUM KUM NAKU LUKISA: “Tuktan nani mapara Baibil ba uba karna sa”.
-
¿Man dîa lukisma?
sDÎA LAN TAKRAM
Jehova ai brinka sa aisa yapti nani ba ai luhpia nani ra latwan kaikbia, smalki bara kaina kahbi kabia, luhpa nani ba ai aisika yaptika nani ra kulki bîla wali kabia, bara pamali aikuki kupia kumi ra witin ra mayunbia.
Wan kupia krawaia
-
¿Aisa yapti nani ba nahki ai luhpia nani ra smalki kaina kahbaia sip sa?
-
¿Luhpa nani ba ai aisika yaptika nani ra rispik muni ba, nahki dauki marikbia?
-
¿Wik bani taim saki brih, pamali baku Gâd ra mayunaia ba dîa yamnika nani brisa?
KAU PLIKI KAIKS
¿Luhpiam ba almuk takbia ba ra dîa smalkanka nani alki bribia?
“Smalkanka 6 nit pali sa luhpiam nani ra” (¡Despertad! num. 2, 2019)
Upla almuk ra main kaiki nani sturka ba aisi kaiks.
“¿Gâd brinka sa ki wan aisika yaptika almuk taki banhbia taim, main kaiki kabia?” (jw.org ra kaiks)
Waitna kum ai luhpia nani nahki pakaia lan âpu kan ba, aisa kum painkira takan ba kaiks.
Nahki aisa kum ai luhpia nani wal pain iwaia sip sa sapa tânka na laki kaiks.
a Baibil ra klala dukiara aisisa taim, smalki, tâ brih, bara wapni mangkaia tânka sa. Baha ba rau muni saura wiaia tânka apia sa (Sins Lâka 4:1).
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
