Yawan kumi bani, dîa kwalka dimaia bara ridi takaia tnatka sât sât brisa. Baibil smalkanka nani kum kum nina blîkbia kaka, Jehova kupia lilia daukaia sip sa, baku wan stailka marikaia sin sip sa. Tila wina kum kum laki kaikbia.

1. Ridi takaisa taim, ¿Baibil smalkanka nani wina ani ra kau lukaia sa?

Kristian ba “ai prâka nani dimra ra ai sinska yamni bri nani kaia sa, bara baha nani ba tânkira ai prâka dimi kabia”. Baku sin, ai wîna aiska klin wal marikaia sa “Gâd ra pliki” ba (1 Timoti 2:9, 10). Kaiks smalkanka 4 naha tikska ra taki ba. 1) Wan kwalka dimra ba rispik lâka bara bawan lâka marikaia sa. Jehova uplika nani tilara dîa laik kaiki ba, kumi bani sât sât sa—kangrigisan aidrubanka nani ra kaikram baku—, sakuna wan kwalka dimra bara nahki ridi taki ba, Gâd ra mayuni bara rispik lâka marikisa. 2) Wan kwalka dimra ba “sinska yamni bri” ba marikaia sa. Naha tânka ba, kwala uba kunhku bara uba pamni dimaia apia. Upla sut mai kaikbia bîla kaikaia apia sma. 3) “Tânkira” lâka marikaia sa. Upla manis dimi kwalka sâtka nani piua bani nina blikaia nit apia sa. 4) “Gâd ra pliki” ba wan kwalka dimra ni marikaia sa. Kan baku tnatka ra, upla nani nu takbia yawan Gâd aihwa ra mayuni ba (1 Korint 10:31).

2. ¿Wan kwalka dimra ba kaiki, kristian wala nani ba nahki ai dara walbia ki?

Rait sa, yawan kumi bani dîa dimaia want ba wahbi sakaia sip sa. Kuna lukaia nit sa, kan wan kwalka dimra ba upla wala nani mapara trabil kum kaia sip sa. Wala nani aihka ai dara walbia apia dukiara, dîa daukaia sip ba sut daukisa. Naha smalkanka nina blikisa: “Yawan kumi bani wan muihni kupia lâka daukaia sa, witin ba pain kabia dukiara bara kasak lukan lâka ra sin pâwbia dukiara” (Roman 15:1, 2 aisi kaikma).

3. ¿Wan kwalka dimra ba nahki sip sa Jehova ra kau kakaira takbia upla wala nani kupia bukaia?

Yawan piua bani trai munisa wan kwalka dimra ba pain kaia. Kau pali, aidrubanka nani bara smalkaia warkka ra waia dukiara aman pali wahbi sakisa. Want apia sa wan kwalka dimra ba sturka yamni nani yawan brih wi ba sauhkbia. Kau ni yawan want sa upla nani ba tânka kasak lan takbia, bara “Gâd wan Sasakra smalkanka ba painkira sa wibia” (Taitus 2:10).

 KAU LAN TAKS

4. Kwala dimra pain ba Jehova ra rispik lâka marikisa

¿Wan kwalka ba aman kaiki wahbi sakaia dukiara, dîa ba kau tânka tara brisa? Lawana Nani 47:2 aisi kaikma bara naha dukiara aisi banhma:

• ¿Nahki hilp wan munisa nu kaia, wan kwalka dimra ba Jehova ra rispik lâka mariki ba?

• ¿Aidrubanka nani bara smalkaia warkka ra waia dukiara, wan kwalka aman kaiki wahbi sakaia ba dîa muni tânka tara brisa? ¿Dîa muni baku lukisma?

 5. Wan kwalka dimra bara ridi takaia tnatka ba, nahki pain wahbi sakaia sip sa

LILKA ba kaiks.

Wan kwalka ba manakira kaia nit apia sa. Kau ni klin kaia, bara piua bani rispik lâka mariki kaia sa. 1 Korint 10:24 bara 1 Timoti 2:9, 10 aisi kaikma. Ningkara aisi banhma, dîa muni naha sât kwalka yus munma apia...

• ... rispik lâka marikras, apia kaka uba tâski ba.

• ... pamni, kunhku, apia kaka kwala sâtka kum upla rispik lâka wal mai kaikbia apia ba.

Kristian nani ba danh Moses lâka mununhtara apia sa, kuna naha lâka ba Jehova lukanka wan smalkisa. Kli Smalkanka 22:5 aisi kaikma bara naha dukiara aisi banhma:

• Mairin kum waitna kwalka dimaia, apia kaka waitna kum mairin baku kwala dimaia, ¿dîa muni pain apia sa?

1 Korint 10:32, 33 bara 1 Jan 2:15, 16 aisi kaikma, bara naha dukiara aisi banhma:

• Iwisma pliska apia kaka kangrigisankam bilara, nahki ridi takisma ba upla nani aihka kaikbia kaka, ¿bahara lukaia nit sma ki? ¿Dîa muni?

• ¿Iwisma pliska uplika nani ba dîa sât kwalka dimisa bara nahki ridi takisa?

• ¿Baha nani tila wina kum kum ba kristian kum mapara aitani apia sa lukisma? ¿Dîa muni baku lukisma?

 DÎA LAN TAKRAM

Dîa sât kwalka dimaia, bara nahki ridi takaia ba pain wahbi saki daukisa taim, Jehova bara upla wala nani ra rispik lâka marikisa.

Wan kupia krawaia

• ¿Dîa muni Jehova wan kwalka dimra ra lukisa?

• ¿Wan kwalka dimra dukiara, Baibil smalkanka nani wina ani ra kau lukaia sa?

• Upla nani wan kaikisa taim, ¿mayunanka rait aihwa dukiara dîa lukaia sip sa? ¿Dîa muni?