SMALKANKA 55
Kangrigisankam ra tâ baiks
Tasba aiska ra, kangrigisan milian nani ra, upla milian milian Jehova ra liliakira mayuni banhwisa. Smalkanka nani yabi ba ra, naha kristianka nani ba kasak tingki lukisa, bara tnatka sât sât ra wilinkira kangrigisan ra tâ baikisa. ¿Man sin kangrigisankam ra sim sât damra walisma ki?
1. ¿Nahki sip sma taimkam bara karnikam wal kangrigisan tâ baikaia?
Yawan sut ba kangrigisan ra wan hilpka yabaia sip sa. Tânka kum baku, ¿muihni lakri almuk, apia kaka siknis nani bâra sa ki? ¿Man aidrubanka nani ra witin nani brih waia sip sma? Apia kaka, markit ra waia, utla warkka nani hilp munaia baku, ¿witin nani yamnika dukiara diara wala nani daukaia sip sma? (Jems 1:27 aisi kaikma). Baku sin Asla Aidrubanka Watla klin munaia bara main kaikaia warkka tâ baikaia sip sma. Yawan kumi sin naha dukia nani ba taiban lâka ni daukras. Gâd ra, bara wan muihni lakri nani ra latwan kaiki ba mita, naku wiaia brin wan daukisa; “Yang nâra sni, yang ai blîks” (Aiseya 6:8).
Pat aihtabi takan Jehova witniska nani ba, tnatka wala nani wal kangrigisan ra tâ baikaia sanska sin brisa. Hilp mamunra nani takaia dukiara Baibil dîa wi ba kat alki dauki kristian waitnika nani ba, baha warkka alkaia sip sa. Bara piua ba wal, kangrigisan almukka takaia sin sip sa. Kristian waitna kabia, mairin kabia kra sin, tâura smasmalkra taki, smalkaia warkka kau tâ baikaia sip sa. Baku sin Jehova witniska nani kum kum ba mayunaia pliska mâkaia warkka tâ baikisa. Apia kaka, pliska nani kau nit ba ra wih tâ baikisa.
2. ¿Wan lalahka bara dîa bri ba wal, nahki kangrigisan ra tâ baikaia sip sa?
Baibil ba wisa: “Dawan ra kulkanka yas man yuyakam nani ba wal” (Sins Lâka 3:9). Yawan mapara diara pranakira kum sa, wan lalahka bara dîa bri ba wal wan kangrigisanka ra tâ baiki, tasba aiska smalkaia warkka ba hilp munaia (2 Korint 9:7 aisi kaikma). Tasba sauhkanka kum takisa taim, wan prisantka wal hilp yabisa. Kristian manis, dîa prisant yabaia luki ba piua bani “tnaya ra laki swi[sa]” (1 Korint 16:2 aisi kaikma). Mayuni pliska ra prisant bakska nani bâra ba ra mangkaia sip sa, apia kaka Internet pliska donate.pr418.com bâk blikaia sin sip sa. Jehova sanska wankisa dîa bri ba wal latwan lâka marikaia.
KAU LAN TAKS
Laki kaiks, tnatka kum kum kangrigisankam ra tâ baikaia sip sma ba.
3. Dîa brisma ba yus munaia sip sma
Jehova bara Jisas ba, ya liliakira yabi ba ra latwan kaikisa. Baha mita, lalah prisant yabaia dukiara sakripais daukan piarka mairin umpira kum ra, Jisas tara kulkan. Luk 21:1-4 aisi kaikma bara naha dukiara aisi banhma:
-
¿Jehova lilia kabia dukiara lalah ailal prisant yabaia sa ki?
-
Wan kupia wina prisant yabisa taim, ¿Jehova bara Jisas nahki ai dara walisa ki?
Wan prisantka nani nahki yus muni ba nu takaia dukiara, LILKA ba kaikma. Ningkara naha dukiara aisi banhma:
-
¿Yawan prisant nani yabi ba, tasba aiska ra kangrigisan nani ra nahki yamni munisa?
4. Wilinkira hilp munaia sip sma
Baibil piua ra Jehova napakanka nani ba, mayunaia pliska nani wilinkira main kaiki kan. Sakuna lalah baman yabras kan. 2 Kronikas 34:9-11 aisi kaikma bara naha dukiara aisi banhma:
-
Jehova watla, wibia sa kaka, mayunaia pliska main kaikaia dukiara, ¿Israel uplika nani sut ba dîa dauki banhwan?
Jehova witniska nani nahki Baibil piua uplika nani nina bliki ba kaikaia dukiara, LILKA ba kaikma. Ningkara naha dukiara aisi banhma:
-
¿Dîa muni tânka tara brisa, wan Asla Aidrubanka Watla ba klin bara pain bri kaia?
-
¿Dîa tnatka nani wal hilp munaia sip sma?
5. Kristian waitna nani ba spirit lainka ra kau wark briaia dukiara trai munaia sip sa
Baibil ba kristian waitna nani kupia bukisa, spirit lainka ra kau pâwaia, bara dîa sip ba kat ai kangrigisanka ra tâ baikaia. Kristian waitna kum nahki daukan ba nu takaia dukiara, LILKA ba kaikma. Ningkara naha dukiara aisi banhma:
-
Spirit lainka ra pâwaia, bara kangrigisan ra kau hilp munaia dukiara, ¿Ryan ba dîa dukia nani daukan?
Hilp mamunra bara kangrigisan almukka takaia dukiara kristian waitna nani dîa daukaia ba, Baibil wan smalkisa. 1 Timoti 3:1-13 aisi kaikma bara naha dukiara aisi banhma:
-
¿Kristian waitna nani, hilp mamunra bara kangrigisan almukka takaia want nani wina dîa bîla kaikisa?
-
¿Ai pamalika nani wina dîa bîla kaikisa? (bors 4 bara 11 ba kaiks).
-
Kristian waitna nani ba, naha tikska nani dîa wi ba alki daukaia karna trai munisa kaka, ¿kangrigisan bilara dîa yamnika bâra kabia?
UPLA KUM KUM MAKABI WALISA: “¿Jehova witniska nani ba ai warkka nani daukaia dukiara nahki lalah sakisa?”.
-
¿Nahki ansa munma ki?
DÎA LAN TAKRAM
Wan taimka, karnika, bara dîa bri ba wal kangrigisan ra tâ baikaia dukiara yawan sakripais dauki ba, Jehova tara kulkisa.
Wan kupia krawaia
-
¿Wan taimka bara karnika yus muni, nahki kangrigisan ra tâ baikaia sip sa?
-
¿Yawan dîa bri ba wal, nahki kangrigisan ra tâ baikaia sip sa?
-
¿Dîa tnatka nani wal kangrigisan ra hilp munaia want sma?
KAU PLIKI KAIKS
Laki kaiks, dîa muni Jehova ai napakanka nani ra 10 bani wina 1 yabaia danh makabras sa.
“¿10 bani wina 1 yabaia dukiara Baibil ba dîa wisa?” (jw.org ra kaiks)
Baibil ba tahbi daukan lâka brin waitnika nani kangrigisan bilara wark nani yabisa, kuna ¿tahbi daukan lâka brin kristianka mairin kum naha sât warkka nani daukaia nitka takisa kaka?
“kangrigisan bilara tâ briaia lâka ba” (La Atalaya febrero, 2021)
Muihni lakri nani ulbi sakanka nani bribia dukiara, Jehova witniska nani ba kupia karna lâka wal wark taki banhwi ba kaiks.
Jehova witniska nani ani wina lalah saki ba, rilidian wala nani ba wal sât wala sa. Tânka na kaiks.
“¿Jehova witniska nani ba ani wina lalah sakisa?” (jw.org ra kaiks)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
