Wan muihni lakri nani wal sa taim, king Debit baku wan dara walisa. Witin naku win: “¡Kaiks, yamni bara painkira pali sa, muihni nani wal asla lâka ra iwaia ba!” (Lawana Nani 133:1). Wan aslika lâka ba ban wina takras; baha tiwbia apia dukiara, yawan karna wark takaia nit sa.

1. ¿Jehova uplika daukanka nani wina ani ba kau pain kaikisma?

Kuntri wala ra kangrigisan kum ra wama kaka, ban kra pliska bîla aisi ba tânka brima apia; sakuna pain damra walma. ¿Dîa muni? Kan, anira kabia sin kaikma Jehova witniska nani ba sim ulbanka nani wal Baibil stadi takisa. Baku sin pana pana latwan lâka marikaia trai munisa. Yawan anira iwi kabia sin aikuki, “sut kumi baku” Jehova nina mâki winaia bara mayunaia want sa (Sofonías 3:9).

2. ¿Nahki sip sma kangrigisan aslika lâka ra tâ baikaia?

“Pana pana walkam ra latwan kaikaia sma, kupiam aiska […] ni” (1 Pita 1:22). ¿Nahki naha smalkanka nina blikaia sip sma? Upla wala nani saurka ra baman kaikaia watlika ra, kau ni daukanka pain nani ra lukaia sip sma. Man dîa laik sma ba laik uplika nani wal baman asla takpara; muihni lakri nani plis sât sât wina bara iwanka tnatka sât sât bri nani ba wal kakaira takaia trai muns. Baku sin, upla mawan bâk saki kulkisma kaka, trai muns baha lukanka kupiam wina sakaia (1 Pita 2:17 aisi kaikma). a

3. ¿Kristian wala wal blahwanka brima taim, dîa daukaia sip sma?

Yawan raitka pali ba asla sa; sakuna mistikkira ba mita, sam taim pana pana wan kupia sarka paskisa. Baha mita Gâd Bîla ba wan wisa: “Pana pana [...] swih tiki bas”. Baku sin: “Dawan [Jehova] mita pâtkam swih tikan ba baku, man nani sin pana pana baku dauki bas” (Kolosi 3:13 aisi kaikma). Yawan aima ailal Jehova ra sarka paskisa, kuna witin padin wan munisa. Baha mita witin yawan wina bîla kaikisa, wan muihni lakri nani ra padin munbia. Man upla kum sarka paskram nu takma kaka, wapnika mangkaia wilinkira bas (Matiu 5:23, 24 aisi kaikma). b

 KAU LAN TAKS

4. Upla mawan bâk saki kulkaia lâka ba pura lus

Wan muihni lakri nani sut ra latwan lâka marikaia want sa. Sakuna upla kum kum sim lukanka briras sa taim, baku daukaia karna sa. ¿Dîa hilp wan munaia sip sa? Apastil Nani Sturka 10:34, 35 aisi kaikma, bara naha dukiara aisi banhma:

• Jehova upla sât sât ai witniska nani baku brisa. Baha dukiara lukisma taim, ¿sim lukanka briras uplika nani ra nahki kaikaia sma?

• Man iwisma pliska ra, ¿upla mawan bâk saki kulkaia lâka ani sâtka ba upla nani kau marikisa? ¿Dîa muni baha sât daukanka nina blikaia apia sa?

2 Korint 6:11-13 aisi kaikma, bara naha dukiara aisi banhma:

• ¿Muihni lakri nani ra latwan lâka kau marikaia dukiara, dîa daukaia sip sa?

5. Kupiam wina padin muns bara kli kupia kumi taks

Jehova mistik luha ba mita, yawan nit apia sa witin ra padin munaia, kuna witin ai kupia wina padin wan munisa. Lawana Nani 86:5 aisi kaikma, bara naha dukiara aisi banhma:

• ¿Jehova nahki padin muni ba dukiara, naha tikska ba dîa wan smalkisa?

• ¿Jehova padinka lâka ra tingki lukisma ki? ¿Dîa muni baku damra walisma?

• ¿Ani piua nani ra karna kaia sip sa, upla wala nani wal pain kaia?

Jehova nina blikaia, bara wan muihni lakri nani wal aslika lâka ra kaia dukiara, ¿yawan dîa daukaia sa? Sins Lâka 19:11 aisi kaikma, bara naha dukiara aisi banhma:

• Upla kum saura mai munan, apia kaka kupiam sarka paskan kaka, ¿kli kupia kumi takaia dukiara dîa daukaia sip sma?

 Sam taim yawan nani ba upla kupia sarka paskisa. ¿Baha takisa taim, dîa daukaia sip sa? LILKA ba kaikma, bara naha dukiara aisi banhma:

• ¿Lilkika ra kaikan baku, kristian mairka ba kupia kumi lâka plikaia dukiara dîa daukan?

 DÎA LAN TAKRAM

Muihni lakri nani ra padin munma, bara sut ra latwan lâka marikma kaka, kangrigisan aslika lâka ra tâ baikma.

Wan kupia krawaia

• ¿Upla mawan bâk saki kulkaia lâka ba nahki pura luaia sip sma?

• ¿Kristian wala wal blahwanka brima taim, dîa daukaia sip sma?

• ¿Jehova padin muni ba baku, man sin daukaia want sma ki? ¿Dîa muni baku lukisma?