SMALKANKA 57
¿Saurka tara kum daukma kaka, dîa takbia?
Man Jehova ra latwan kaikisma, bara want apia sma witin ra sari daukaia, sakuna sam taim mistik nani daukaia sip sma. Bara mistik nani kum kum ba mistik wala nani ba wal kau saura sa (1 Korint 6:9, 10). Man saurka kum ra kauhma kaka, kupiam krauks Jehova ban latwan mai kaikisa, baha mita padin mai munaia bara hilpka maikaia wilin sa.
1. ¿Jehova padin wan munbia dukiara, yawan dîa daukaia nit sa?
Jehova ra latwan kaiki uplika kum ba, saurka lâka tara kum ra kauhan taim, sari ai dara walisa. Sakuna Jehova ai maisa nihkisa naha pramiska ai uplika ra daukan ba wal: “Man nani saurkam ba tala pauni kabia sin, kwala pihni wahmuk baku daukamni” (Aiseya 1:18). Wan kupia lakisa kaka, Jehova padin wan munbia. ¿Wan kupia lakaia tânka ba dîa sa? Baha ba tânka sa, wan kupia wina kasak sari lukaia dîa daukan ba mita, dîa dauki kan ba swiaia, bara padin wan munbia Jehova ra makabaia. Baku bara, saurka lâka ra wan brih wan lukanka nani, bara daukanka nani ba chens munaia dukiara karna pali wark takaia sa. Bara Jehova dîa makabi ba wan rayaka aiska ra alki daukaia trai munaia sa (Aiseya 55:6, 7 aisi kaikma).
2. Saurka kum ra kauhan sa kaka, ¿kangrigisan almukka nani bâk Jehova nahki hilp wan munisa?
Saurka tara kum ra kauhan sa kaka, Jehova naha smalkanka wankisa: “[Kangrigisan] almukka nani ba paiwaia sa” (Jems 5:14, 15 aisi kaiks). Spirit holikira ni wahbi sakan naha waitnika nani ba, Jehova bara ai sîpka nani ra latwan kaikisa. Bara Gâd wal wan pânika lâka ba kli pain briaia hilp wan munaia sip sa (Galesha 6:1).
Saurka tara kum ra kauhan kaka, ¿kangrigisan almukka nani ba ani tnatka nani wal hilp wan munisa? Kangrigisan almukka wâl apia kaka yumhpa ba, Baibil wal hilp wan munbia tânka briaia, dîa muni dîa daukan ba saura kan. Baku sin smalkanka pain nani wankbia bara kli saurka ra kauhaia apia dukiara wan kupia bukbia. Upla kum saurka tara ra kauhi ai kupia lakras kaka, kangrigisan ra kaina kahbaia dukiara almukka nani ba witin ra kanrigisan wina sâkbia.
KAU LAN TAKS
Saurka tara kum ra kauhisa kaka, Jehova mita hilp wan munaia dukiara dîa daukbia ba pain tânka bris, bara tingki sin luks.
3. Saurka daukan dahra sakaia ba tâura waia hilp wan munisa
Saurka lâka sut ba Jehova sarka paskisa, baha mita witin ra wan dahra sakaia sa. Lawana Nani 32:1-5 aisi kaikma, bara naha dukiara aisi banhma:
-
¿Dîa muni diara pain kum sa, dîa daukan ba yukukaia watlika ra Jehova ra wan dahra sakaia ba?
Jehova ra wan dahra sakaia purkara, kangrigisan almukka nani ra hilpka makabisa kaka, pain wan dara walbia. LILKA ba kaikma, bara naha dukiara aisi banhma:
-
¿Canon kli Jehova lamara waia dukiara kangrigisan almukka nani ba dîa hilpka yaban?
Kangrigisan almukka nani ba hilp wan munaia want sa. Baha mita tânka tara brisa witin nani ra kunin âpu param aisaia. Jems 5:16 aisi kaikma, bara naha dukiara aisi banhma:
-
¿Yawan kunin âpu aisabia kaka, kangrigisan almukka nani mapara hilp wan munaia isi kabia lukisma? ¿Dîa muni baku lukisma?
Saura daukram ba dukiara damhra sâks, kangrigisan almukka nani wal kunin âpu aisas, bara Jehova hilpka latwankira ba bris.
4. Saura dadaukra nani ra Jehova umpira kaikan lâka marikisa
Upla kum saurka tara dauki, Jehova dîa wi ba alki daukaia want apia sa kaka, ban kangrigisan bilara kaia sip apia sa. Baha mita sakisa. Baku takisa taim, yawan danh uplika ba wal asla takras, sturi sin aisaras. 1 Korint 5:6, 11 bara naha dukiara aisi banhma:
-
Îs plawar akban aiska ba puskbia yabi ba ra luki, ¿ai kupia lakras uplika kum wal asla sa kaka, kangrigisan ra ambuk munaia sip sa lukisma ki? ¿Dîa muni?
Jehova saurka dauki uplika nani ra umpira kaikan lâka mariki ba baku kangrigisan almukka nani sin kangrigisan wina sakan nani ra hilp muni banhwisa. Manis ba kli kangrigisan ra tawi banhwan kan ai tânka bri banhwan sa lawi daukan lâka ba witin nani mapara yamnika kum kan (Lawana Nani 141:5).
¿Saurka daukan uplika ra Jehova nahki umpira kaikan lâka, latwan lâka bara kasak lâka marikisa ki?
5. Wan kupia lakisa kaka, Jehova padin wan munisa
Jisas maprika lilka kum aisan ba hilp wan munisa tânka briaia, upla kum ai kupia lakisa taim Jehova nahki ai dara wali ba. Luk 15:1-7 aisi kaikma, bara naha dukiara aisi banhma:
-
¿Naha maprika lilkika ba Jehova dukiara dîa wan smalkisa?
Isikiel 33:11 aisi kaikma, bara naha dukiara aisi banhma:
-
¿Wan kupia lakan ba marikaia dukiara, dîa daukaia sip sa?
Jehova ba sepad kum baku sa, ai sîpka nani ra uba lukisa.
UPLA KUM KUM NAKU LUKISA: “Kangrigisan almukka nani wal aisaia sibrin ai daukisa. Dîa daukri ba wimna kaka, witin nani kangrigisan wina ai sâkbia”.
-
¿Upla kum baku lukisa kaka, dîa wiaia sip sma?
DÎA LAN TAKRAM
Yawan saurka tara kum ra kauhisa, kuna kasak pali wan kupia laki, kli daukaia apia luki pali sa kaka, Jehova padin wan munbia.
Wan kupia krawaia
-
¿Dîa muni yamni sa, Jehova ra wan saurka nani dahra sakaia ba?
-
¿Jehova padin wan munbia dukiara dîa daukaia sip sa?
-
Saurka tara kum ra kauhan kaka, ¿dîa muni kangrigisan almukka nani hilpka plikaia sa?
KAU PLIKI KAIKS
Aiseya 1:18 wi ba baku, Jehova umpira kaikan lâka ba waitna kum ra nahki yamni munan ba kaiks.
Jehova umpira kaikan lâka ba dukiara namhpa namhpa lukras (5:02)
¿Saurka tara kum daukan uplika nani ra kangrigisan almukka nani ba nahki hilp munisa?
Latwan lâka bara umpira kaikan lâka wal saurka lâka ba pura luisa. (La Atalaya, agosto 2024)
Laki kaiks nahki saura daukan bara ai kupia lakras uplika nani ra nahki umpira kaikan lâka bara latwan lâka ba mairikisa.
“Kangrigisan wina sakan uplika nani dukiara hilpka nani” (La Atalaya, agosto 2024)
Upla sturka kum “Jehova ra kli tawaia nit kapri” ba aisi kaiks. Waitna kum ai dara walan, Jehova mita kli ai lamara brih balan.
“Baibil ba upla rayaka chens munisa” (La Atalaya abril 1, 2012)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
