SMALKANKA 1
Diara kum yukuki bri kan ba nu takaia want sa
¿Nu sma dîa sa diara kum yukuki bri ba?... * Tânka ba sika upla wiria baman diara kum nu sa. Baibil ba diara yukukan tânka ba dukiara aisisa bara wisa “Gâd yukuki bri kan ba”. Diara tara sa kan Gâd wina balisa. Pas taim upla kumi sin nu âpu kan dîa kan ba. Insal nani ba sin nu takaia want kan. ¿Tânka yukuki bri kan ba nu takaia want sma?...
Insal nani ba sin nu takaia want kan yukukan tânka ba
Mani ailal luan ra, Gâd ba pas waitna an pas mairin ra paskan. ¿Witin nani nina dîa kan?... Adam bara Iv. Eden giadinka ra iwi kan. Baha ba plis painkira kan, Gâd mita ridi dauki yaban bahara iwbia dukiara. Gâd want kan witin nani bara ai luhpia nani wal tasba aiska ba uba painkira daukbia, sim Eden giadinka ba baku. Gâd want kan sut ba ban kaia ra iwbia paradais kum ra. Kuna baku takras kan. ¿Dîa muni?
Kan Adam bara Iv wal Gâd bîla walras kan, ba mita yawan naiwa paradais kum ra iwras. Kuna Gâd pramis munan yu kum tasba aiska ba paradais kum kabia. Upla sut lilia iwbia bara ban kaia ra. ¿Pramiska ba nahki takbia? Mani ailal upla kumi sin nu âpu kan. ¡Tânka ba yukuwan ra kan!
Kuna tawa tawa latan taki kan. Jisas tasba ra balan taim, upla nani ra tânka yukukan ba smalkan. Witin win baha ba Gâd Kingka Lâka sa. Bara wan pura suni makabia Gâd Kingka Lâka ba balbia. ¿Dîa muni? Kan baha Kingka Lâka ba Tasba aiska ba paradais painkira kum daukbia.
¿Baha paradaiska ra iwaia want kama ki?... Kupiam krauks Gâd bîla wali nani ba baman Paradais ra iwbia. Waitna bara mairin ailal Gâd bîla walan sturka dukiara aisisa Baibil ba. Naha wauhkataya ra yawan lan takbia witin nani ba ya kan an nahki witin nani baku kaia. ¿Witin nani ra kakaira takaia want sma?...
BAIBIL RA AISI KAIKBIA:
^ baiki.s 3 Naha sturka nani ra man kaikma makabi walanka kum kum ningkara puntos nani bâra sa (...). Tânka ba luhpiam ba makabi walanka dukiara mai wibia chanska sa.
