¿Lilkika ra tuktan mairin bâra ba kaikisma?... Baibil ba ai nina ba wiras sa, kuna wan wisa ai aisika nina ba Jefté. Jehova an Jefté lilia takan witin dukiara, diara kum daukan ba mita. Kaisa Jefté bara ai luhpia mairin dukiara kau nu takaia.

Jefté ba upla pain kan. Baku sin, piua bani ai luhpia mairin ra Jehova dukiara smalki kan. Bara waitna karnakira kan, tawan ra tâ briaia lan kan. Baha mita Israel uplika nani ba witin ra win: “¿War aiklabanka ra wan baska kaia want sma?”.

Jefté Jehova ra makaban war aiklabanka ba pura luaia hilp munbia. Win takbia kaka, naha pramis munan: Ai watla ra kli tawi balbia taim, pas upla taki yamni balram wibia ba, Jehova dukia kabia. ¿Baha  ba dîa tânka kan? Tânka sa baha uplika ba Gâd tintka watla ra iwi bara wark takaia kan ai rayaka aiska ra. Gâd tintka watla ba plis kum kan bahara upla nani ba wi kan Jehova ra mayunaia. ¿Jefté ba aiklabanka ba win takan? Âu. Bara ai watla ra balan taim, ¿ya pas takan lukisma?...

¡Ai luhpia mairin kan! Ai luhpia kumi kan ba, bara nanara Jefté ba Gâd tintka watla ra iwbia blikaia kan. Kasak sari takan, kuna witin Jehova ra pramis kum daukan kan, ¿kupiam kraukisma? Ba mita ai luhpia win: “Papa, Jehova ra pramis kum daukram nanara daukaia sma”.

Tâura witin sin sari kan. ¿Dîa muni? Kan Gâd tintka watla ra iwbia taim, marit takaia bara luhpa briaia sin sip apia kabia. Kuna witin want kan ai asika pramiska ba daukaia. Baku sin want kan Jehova witin dukiara lilia takbia. Baha ba kau tânka tara bri kan witin mapara marit takaia apia kaka luhpa briaia. Ba mita Gâd tintka watla ra wan, bahara iwan ai rayaka aiska.

¿Jehova an Jefté witin dukiara lilia kan lukisma?... ¡Âu sika! Man sin Jefté luhpia mairin baku kaia sip sma. Bîla walisma kaka an Jehova ra uba latwan kaikisma kaka, witin ba man wal lilia kabia. Bara papikam bara mamikam sin lilia kabia.