SMALKANKA 8
Josías ba pâna pain nani wahbi sakan
¿Jehova kupia lâka daukaia ba isi sa lukisma?... Upla aihkika ba, baha ba karna sa wisa. Kuna Baibil wan wisa baku apia sa. Josías sturka ba dukiara wan aisisa, wahma kum kan bara Jehova dukia daukaia karna trai munan. Pâna pain nani wahbi sakan ba mita. Kaisa kau lan takaia Josías bara ai pânika yamni nani brin ba dukiara.
Josías papika ba Amón kan, bara witin Juda kingka kan. Amón ba uba saura kan bara gâd bahki nani ra mayuni kan. Amón pruan taim, Josías ba Juda kingka takan. ¿Nu sma mani an bri kan king aimakan taim? ¡8 mani baman bri kan! ¿Ai papika baku saura kan?... Apia, baku apia kan.
Sofonías ba upla ra win gâd bahki nani ra mayunaia ba saura sa
Tuktan kan piua ba wina, Josías ba Jehova dukia daukaia want kan. Ba mita pâna pain nani pliki sakan. Gâd ra mayuni kan uplika baman wahbi sakan, bara witin nani Josías ra hilp munan Jehova bîla walaia. ¿Josías pânika nani ba ya kan?
Tila wina kum Sofonías kan. Witin bui Juda uplika nani ra naha wiaia kan: “Ya ya gâd bahki nani ra mayunisa kaka, uba saura witin ra takan kabia”. ¿Josías dîa daukan? ¿Prapit bîla walan? Âu sika, ba mita witin piua bani Jehova ra mayuni kan, gâd bahki nani ra lika apia.
Jirimaya ba Josías pânika wala kan. Witin nani ba sim mânka bri kan talia, wahma kan taim, ai lamara wâl iwi kan. Jirimaya wihki Josías wal pana pana hilp takan Jehova ra mayunaia. Wâl sut ba asla kan, ba mita Josías pruan taim, Jirimaya ba lawana kum paski bara sari kan ba dukiara aiwanan.
Jirimaya bara Josías ba Jehova ra mayunaia dukiara pana pana hilpka takan
¿Josías dukiara dîa lan takaia sip sma?... Witin tuktan kan ba wina Gâd bîla walaia want kan. Baha daukaia kaka, Jehova ra latwan kaiki kan pânika nani ba wahbi sakaia kan. ¿Rait apia man sin want sma Jehova dukia daukaia? Ba mita witin ra latwan kaiki pânika nani plikaia sma.