SMALKANKA 12
Pal lakrika luhpia ba si brin âpu kan
Wahma kum apastil Pal rayaka swaki sakan sturka ba dukiara mai wiaisna. Witin nina ba yawan nu âpu, kuna yawan nu sa witin ba Pal lakrika luhpia waitna kan. Si briras wahmika kum kan. ¿Nu takaia want sma witin dîa daukan?...
Pal ba Jerusalem ra silak watla ra kan. Jisas dukiara upla ra smalki kan ba mita silak ra dingkan. Sakuna waitna kum kum ba Pal ra misbara kaiki kan an saura munaia want kan. Militar baska ra wiaia want kan: “Suldiarkam nani Pal mata blîks lâ daukaia watla ra brih wabia”. Witin nani ba yabal tnaya ra yukuwaia want kan, Pal lubia taim, ¡alki ikaia!
Pal lakrika luhpia ba pas ai tahtika ra win, ba wina militar baska ra
Pal lakrika luhpia ba baha nu takan. ¿Witin dîa daukaia sip kan? Ai tahtika ra wih win. Pana pana win: “Militar baska ra isti was bara sut ba wis”. Baku daukaia isi apia kan, kan militar baska ba kulkanka tara bri kan. ¿Pal lakrika luhpia ba wilin kan witin wal aisaia?... Âu, witin si briras kan an sut ba win.
Militar baska ba walan, bara Pal ra plis wala ra blikan, tawan kum nina Sesaria. Baku sin suldiar 500 ra adar yaban Pal impakanka ra yula kahbaia. Witin nani ra win: “Naha tihmia witin ra brih was”. ¿Pal ba swakwi takan, apia kaka witin ra ikan? ¿Man dîa lukisma?... ¡Âu, swakwi takan! Baha waitnika nani ba sip alkras munan.
¿Sturka na laik takram?... ¿Kaikram, Pal lakrika luhpia ba si briras kan? ¡Man sip sma witin baku sibrin âpu kaia! Sibrin âpu kaia sa upla nani ra Jehova dukiara aisaia. ¿Kupia karna kama bara Jehova dukiara upla nani ra ban aisi kama?... Diara tara sa Gâd dukiara aisi kaia. Baku lika upla ailal swakwi takaia sip sa.