SMALKANKA 3
Rahab Jehova ra kasak lukan
¿Want kama ki plis kum ra impakaia? Luki kaiks Jeriko tawanka ra, Kenan tasbaya ra. Baha pliska ra upla nani ba Jehova ra kasak lukras kan. Sakuna bahara mairin kum iwisa upla wala nani ba wal sât wala sa. Nina ba Rahab.
Rahab ba tuktan kan piua ba wina Jehova dukiara sturka ailal walan kan. Nahki Israel uplika nani ra hilp munan waihla nani ra pura luaia. Witin walan Moses ba Jehova karnika wal Israel uplika nani ra Idsip wina sakan. Bara baku sin ¡kabu Pauni ba pîs wâl ra baiki sakan bahak luaia dukiara! Nanara Rahab sturka wala walan: ¡Israel uplika nani ba Jeriko lamara sa witin iwi pliska ra!
Rahab biki kakaira nani ra kaina kahban, kan Jehova ra kasak luki kan
Tihmia kum, Israel wina biki kakaira wâl Jeriko ra diman yukuwi muni tawan ba kaikaia dukiara. Rahab watla ra diman, bara witin mita paiwisa bahara takaskaia. Baha tihmika, Jeriko kingka ba nu takan biki kakaira kum kum ba tawanka ra balan sa bara Rahab watla ra sa. Ba mita ai suldiarka nani ra blikisa plikbia dukiara. ¿Rahab dîa daukisa? Biki kakaira nani ra ai watla banhta ra yukukisa bara king waitnika nani ra wisa: “Biki kakaira nani ba pat wan. Kuna nina blikisma kaka, alkma”. ¡Baku Rahab Israel uplika nani ra kan kahbisa! ¿Nu takan mai daukisa dîa muni hilp munisa?... Kan witin ba Jehova ra kasak lukisa. Bara nu sa witin ba Israel uplika nani ra hilp munbia Jeriko pura luaia bara Kenan tasbaya ba sin.
Biki kakaira nani ba Rahab watla wina kau takras kainara, witin ra pramis munisa: Gâd Jeriko sauhki tikbia taim, witin bara ai pamalika ba swaki sâkbia. Kuna Rahab diara kum daukaia sa ai rayaka ba swaki sakaia dukiara. ¿Dîa sa?... Biki kakaira nani mita win: “Naha awka pauni na windarkam ra pamaia sma bara pamalikam nani ra wamtla bilara asla dauks”. Rahab ba biki kakaira nani dîa wi ba kat daukisa. ¿Nu takan mai daukisa dîa takan ningkara?...
Jehova Rahab bara ai pamalika nani swaki sakan
Yua kum kum luan ningkara, Israel uplika nani ba Jeriko tnaya kir ra aima ailal karna wapi tawisa. Yu 6 wapi tawisa, yu kumi bilara aima kum, kuna kisbras kan. Sakuna yua 7 ra aima 7 tnaya kir ra karna wapi tawisa, bara witin nani sut ba karna pali kisbisa. Ban wina, diara aihka kum takan: ¡Jehova yaban Jeriko tnaya kutbanka tara nani ba kauhbia! Sakuna ¿dîa takan Rahab watla wal? Awa pauni kum windar ra pami bri na ra, watla ba kauhras kan. ¿Lilka ra awka ba kaikisma?... ¡Baku sika Rahab bara ai pamalika nani swakwi takan!
¿Kaikram Rahab ba swakwi takan Jehova bîla walan ba mita?... Witin nu kan Gâd ba main kaiki kan ba, ba mita witin ra kasak lukan. Baku sin Gâd diara painkira sut daukan ba witin ra win taim, lan takan Jehova ra kasak lukaia. Man sin Jehova wina diara ailal lan takisma. ¿Jehova bîla walma, Rahab daukan ba baku?... ¡Âu sika!
