SMALKANKA 2
Rebeca want kan Jehova kupia lilia daukaia
Rebeca ba mairin kum kan Jehova ra latwan kaiki kan ba. Ai maya waitna Aisak ba sim sât. Naha sturka ra kaikbia nahki witin nani kakaira takan, bara lan takbia dîa muni Jehova uba lilia takan Rebeca dukiara.
Aisak papika nina Ebraham bara mamika nina Sara. Witin nani Kenan ra iwi kan, an bahara upla nani ba Jehova ra mayunras kan. Ebraham ba want kan ai luhpia ba, Jehova ra latwan kaiki mairka kum wal marit takbia. Ba mita ai suliarka kum blikan (ban kra Eliézer) Harán ra waia. ¿Dîa muni bahara blikan? Kan bahara Ebraham pamalika kum kum ba iwi kan, ba wina Eliézer ba sip kan maya mairin pain kum sakaia Aisak dukiara.
Rebeca karna wark takaia kan kiamil nani ra lî yabaia dukiara
Eliézer ba laihura impakan Ebraham suliarka wala nani wal. Kiamil 10 ra plun bara prisant nani brih wan. Sakuna ¿nahki Eliézer ba Aisak dukiara maya kum sakaia kan? Witin nu kan tawan mairka nani ba liwanhta kum ra lî panhkaia wi kan. Ba mita, Harán ra balan taim, baha layawanhta ra wan. Bamna Jehova ra ai pura sunan: “Tiara kum ra lî aikbia makabamna. Yang ra bara kiamilki nani ra sin lî wankbia kaka, nu takamna baha mairka ba man wahbi sakram kabia ba”.
Baha minitka ra Rebeca liwanhta ra balan. Baibil wisa witin ba tiara uba painkira kan. Eliézer mita lî makaban, an pâna win: “Âu want sna lî maikaisna bara kiamilkam nani ra sin”. Kiamil nani lî uba di na ra, Rebeca ba lî ailal panhkaia kan liwanhta ba wina. ¡Wih bara kli bali kan aima ailal! Wahia luan ra lilkika ba kaiks. ¿Rebeca dîa daukisa?... Eliézer ba kaikan karna wark taki kan, ba mita witin tâ iwan: ¡Jehova mita ai pura sunra ba wali hilp munan!
Eliézer mita prisantka painkira nani Rebeca ra yaban, bara witin mita Eliézer bara suliar wala nani ra paiwan ai pamalika wal iwi kan watla ra. Eliézer tânka win dîa muni Ebraham witin ra blikan Harán ra. Baku sin win nahki Jehova ai pura sunra ba wali hilp munan ba. Rebeca pamalika nani ba baha walan taim, uba lilia takan. Eliézer ra win: “Pain kaiki banhwisna witin ba Aisak wal marit takbia”.
Rebeca Eliézer wal Kenan ra wan bara Aisak wal marit takan
¿Lukisma Rebeca Aisak wal marit takaia want kan?... Ai pamalika ba baha makabi walan taim, witin âu win. ¿Dîa muni? Kan Rebeca nu kan Jehova Eliézer ra blikan kan. Baku ba ra witin wal Kenan ra wan, baha ra wan taim, witin ba Aisak wal marit takan.
Rebeca Jehova bîla walan, ba mita witin ra yamni munan. Bara baha baman apia: witin kiamka wina Jisas balan. Jehova sim sât yamni mai munbia Rebeca baku sma kaka. Baku sin Jehova man dukiamra uba lilia kabia.
