SMALKANKA 13
Timoti ba upla ra hilp munaia want kan
Timoti ba wahma kum kan, upla wala nani ra hilp muni kan ba mita lilia kan. Plis ailal ra impakan upla nani ra hilp munaia. Rayaka painkira kum bri kan. ¿Witin dukiara kau nu takaia want sma?...
Timoti mamika bara kukika ba Jehova dukiara witin ra aisi kan
Timoti ba tawan kum nina Listra ra pâwan. Ai mamika nina ba Eunice an ai kukika nina ba Loida. Witin nani ba Timoti ra sirpi wina Jehova dukiara smalkan. Timoti ba tuktan wina upla ra hilp munaia want kan Jehova ra kakaira takbia.
Yu kum, Timoti wahma takan taim, Pal witin ra win: “Plis wala nani ra smalkaisna. ¿Yang wal waia want sma?”. Timoti ba uba lilia takan bara pana win: “¡Âu, wan ai daukisa!”. Witin want kan upla ra hilp munaia.
Pal wal Tesalonaika ra impakan, Grik tawanka kum kan. Bahara waia dukiara laihura wapan, ba wina duri tara ra aimakan. Las kat tawanka ra wan taim, upla ailal ra hilp munan Jehova ra kakaira takbia. Kuna upla kum kum lika uba praut takan bara saura munaia want kan. Ba mita, Pal Timoti wal plis wala nani ra waia kan smalkaia dukiara.
Timoti rayaka ba lilia bara painkira kan
Kati kum kum ningkara, Pal ba Timoti ra win Tesalonaika ra kli tawi wabia. Muihni lakri nani nahki kan sapa nu takaia want kan. Kuna Tesalonaika ra upla kum kum ba kristian nani ra saura muni kan. ¡Timoti ba sibrin âpu kaia kan bahara kli waia dukiara! Witin waia âu win, kan muihni, lakri nani dukiara sari kan. Bara kli Pal ra balan taim, sturi pain brih balan. ¡Tesalonaika muihni bara lakri nani ba Jehova ra ban mayunisa!
Mani ailal Timoti ba Pal wal Jehova warkka daukan. Ba mita, yu kum, Pal ba Timoti dukiara ulban: “Timoti blikamna muihni, lakri nani ra hilp munbia. Witin baku upla wala âpu sa, kan upla ra latwan sa bara Jehova ra sin”.
Man sin upla wala ra latwan kaikaia want sma, ¿rait apia? ¿Jehova dukiara lan takbia hilp munaia want sma?... Daukma kaka rayakam ba lilia bara painkira kabia Timoti baku.