Nahara luks: wahma kum nina ba Jorge 17 mani brisa, bara witin wensdi yua kum tutni ra, skul warkka nani sut danh dauki ris briaia want sa. ¡Baha ba pain sa lukisa! Tele ba angki bara sir kum ra iwi kaikaia want sa.

Baha minitka ra, ai aisika ba utla ra dimi ai kupia baiwisa.

Man ba Jorge baku damra walma kaka, ¿dîa daukma naha trabilka na baku takbia apia dukiara?

Man truk wakisma sakuna tâura kaikisma yabal ba prakan, ba mita yabal wala plikisma kaina tani waia dukiara. Sim tnatka ra, man aisikam bara yaptikam wal pain aisi bara walaia dukiara, tnatka wala sip sma plikaia.

 UPLA STURKA BA RA LUKS:

Tiara kum nina Luisa bila: “Yang aisiki wal aisaia ba karna ai munisa. Sam taim, yang turi aisisna kuna witin walras, bara ai wisa: ‘Kapo, ¿dîa ai wi kapram?’”.

LUISA BA DIARA YUMHPA DAUKAIA SIP SA

1. Ai aisika ra pura wini aisaia.

   Luisa ba ai aisika ra pura wini aisisa: “¡Yang ra wals! ¡Dîa mai wisna ba yang maipara tara sa!”.

2. Dîa aisi kan ba danh kli aisaia apia.

   Luisa ba ai aisika wal baha trabilka dukiara kli aisaia apia lukisa.

3. Piu wala ra kli aisaia taimka ba plikbia.

   Luisa ba piu wala ai aisika wal aisabia, apia kaka trabilka ba dukiara wauhtaya kum ulbi si yabia.

¿Man dîa lukisma, Luisa mapara dîa kau pain sa ki?

NAHARA LUKS: Luisa aisika ba diara wala ra ai sinska mangkisa, bara Luisa dîa aisan ba witin walras kan. Luisa ba Letra A munhtara dîa ulban ba daukbia kaka, ai aisika ra pura wini aisabia, sakuna ai aisika ba ban kra tânka bribia apia, bara walbia apia. Luisa baha daukbia kaka ai aisika ra rispik munbia apia (Epesus 6:2). Baha mita, dîa ulban ba witin nani mapara pain apia sa.

Letra B munhtara dîa ulban ba daukbia kaka kau isi sa, sakuna sins lâka âpu sa. ¿Dîa muni? Kan Luisa ba baha trabilka wapni daukaia want sa kaka, ai aisika wal aisaia sa. Aisika ba dîa takan ba nu takaia nit sa hilp munaia dukiara. Luisa ba ai aisika wal aisaras kaka, trabilka ba wapni takbia apia.

Ban sakuna, Letra C munhtara dîa ulban ba Luisa daukbia kaka, witin ba tnatka wala plikaia sa. Piu wala ra ai aisika wal trabilka ba dukiara aisabia. Witin wauhtaya kum ra trabilka tânka ulbi ai aisika ra yabia, bara baku kau pain ai dara walbia.

Luisa ba wauhtaya kum ra trabilka ba dukiara ulbia kaka, kau pain ai tânka ba mariki kabia. Aisika ba wauhkataya aisi kaikbia taim, Luisa nahki ai dara wali ba kau ai tânka bribia bara hilpka ba yabia. Letra C munhtara dîa ulban ba wâlsut mapara kau pain sa. Luisa ba ai aisika mawan kat aisi, apia kaka wauhtaya kum ra trabilka tânka ba ulbia sin, Baibil dîa aisi ba alki daukbia: “kupia kumi lâka dauki dukia nani ba nina blîkpi” (Roman 14:19).

¿Luisa ba tnatka wala ra trabilka ba wapni daukaia sip sa ki?

Nahki wapni daukaia nu sma kaka, bahara luks. Baku sin, dîa takaia sip ba luks.

Kupiam krauks: aima kum kum ra man dîa aisisma ba, aisikam bara yaptikam ba pain ai tânka bribia apia.

NAHARA LUKS:

Aisikam bara yaptikam ba mai makabi walisa dîa muni man praut sma. Bara man pana wisma: “Baha dukiara ai aisapara”.

Sakuna witin nani ban kra lukbia naha wiaia want sma: “Trabilki dukiara man nani wal aisaras. Yang pâinika nani ra baman wisna”.

Luki kaiks man trabil tara brisma sapa, bara aisikam nani hilp mai munaia want sa, sakuna man bila: “Lukpara, yang silp wapni daukamna”.

• ¿Ban kra aisikam bara yaptikam ba naku lukbia?

• ¿Kau pain kabia man naku wima?