Nahara luks: David ba tawan kum ra wapisa sakuna uba tihmia let pali sa, ba mita yabal ba pain sip kaikras. Ban kra yabal ra kan taim, mistik taki plis wala ra tawi yabal ba lus tikan.

Man ba David katma kaka, ¿dîa daukaia kapram?

Tnatka kum kum bâra sa yabal ba sakaia dukiara:

1. Upla kum ra sip sma hilp makabaia anira waia lukram pliska ba sakaia.

2. Map kum kaiki, apia kaka GPS (yabal kum nahki pliki sakaia celular ra, apia kaka computadora) yus muni ba wal.

3. Tâura wapi wama kaka, ban kra yabalka plikisma ba sâkma.

Param sa, letra C aisi ba daukma kaka kau saura kabia.

Letra A aisi ba wira bitar sa, sakuna letra B aisi ba lika kau pain sa: kan mihtam ra map kum, apia kaka GPS kum wal kau isi kabia yabalkam sakaia.

Sim baku, Baibil ba hilp mai munaia sip sa.

Piu luan nani wina upla ailal Baibil ba atki brisa, baha mita:

• Baibil ba rayakam trabilka nani tilara tâm briaia sip sa.

• Baibil ba hilp mai munaia sip sa man silp laki kaikma bara upla kau pain takma dukiara.

• Baibil ba mai smalkisa nahki tnatka ra kau pain iwaia sip sma.

Yawan tuktan lupia ba wina turi aisaia lan taki mahka makabi walisa:

• ¿Dîa muni kasbrika ba blu sa?

• ¿Slilma nani ba dîa ni paskan?

Baha wina yawan tasba ra dîa taki ba kaiki makabi walisa:

• ¿Dîa muni diara saura takisa?

• ¿Dîa muni yawan pruisa?

¿Nu kapram ki Baibil ba naha tânka nani dukiara aisisa?

Upla ailal lukisa Baibil ra sturi nani bara kisi baman aisisa, apia kaka buk uba almuk kum sa, bara aisi kaiki tânka briaia ba karna pali sa. Sakuna, ¿baha ba rait sa ki? ¿Baibil dukiara upla aisi ba kasak sa ki? Apia kaka, ¿upla nani nu âpu ba mita baku lukisa ki?

Luki kaiks, upla nani lukisa Baibil ba wisa Gâd tasba na ai karnika mununhtara brisa. Sakuna, ¿baku sa ki? Naha tasba ra trabil nani ailal bâra sa. Pât wahwanka, latwanka, siknis nani, prura, umpira lâka bara sauhkanka nani sin bâra sa. ¿Nahki muni latwan wan kaiki Gâdka ba naha trabilka nani daukbia?

¿Naha tasba na ya mita ai karnika mununhtara bri ba nu takan mai daukisa ki? Baibil ba tânka smalki ba nu takma kaka tânka ba param kaikma.

Naha wauhkataya hilp yabi ba Baibil wina sakan kaikram, ¿rait apia? Jehova witniska nani ba kasak lukisa Baibil ba hilp tara kum sa, kan “Gâd wingka puhbra mita sika, bara baha ba yamni sa upla ra smalkaia bara lawi daukaia, swakwanka nani ba wapni daukaia” dukiara (2 Timoti 3:16, 17). Baibil wina lan takaia chanska brisma ba alki dauks, patitara bukka kum sa, sakuna naiwa piua ra wan rayaka ra hilp munisa.