MAKABI WALANKA 9
¿Evolución ba dukiara dîa lukaia sna ki?
¿MAN DÎA DAUKMA?
Nahara luks: Alex ba diara kum ai tânka briras sa. Witin lukan sa Gâd ba diara sut paskan. Sakuna skul ra, Biología profesorka ba tadi wisa científico nani ba laki kaikan sa evolución ba wina rayaka sut ba bal takan sa. Alex ba sinskas baku ai dara walaia want apia sa, baha mita witin lukisa: “Científico nani ba evolución pat laki kaiki kasak sa win kaka, ¿dîa muni yang wimna baha ba kunin sa?”.
Man ba Alex katma kaka, ¿evolución ra kasak lukma ki, skul bukka nani ra diara rait baku mariki ba mita?
LUKI KAIKS
Upla kum kum evolución ba kasak sa lukisa, apia kaka Gâd wan paskan ba kasak lukisa, sakuna tânka marikaia ba lika nu âpu sa.
-
Upla kum kum ba prias ra lan takan sa Gâd mita wan paskan ba.
-
Wala nani ba evolución ra kasak lukisa, kan skul ra baku lan takan.
MAKABI WALANKA 6 LAKI KAIKS
Hibru Nani 3:4 wisa: “Utla bani ba upla kum mâkan kaia sa; sakuna Gâd sika diara nani sut paskan ba”. ¿Baibil tikska na kasak lukaia sip sa ki?
Wan rayaka ba ban wina bal takan lukaia ba, naha watla na ban wina silp aipaswi takan ba baku sa, kuna baha ba rait apia sa, kan diara bani ba papaskra kum brisa.
UPLA AILAL WISA: Universo ba diara tara kum baiwan ba mita ban wina bal takan, baha ba Big Bang mâkisa.
1. ¿Big Bang ba ya mita daukan, apia kaka dîa mita takan ki?
2. ¿Dîa ba kau pain sa kasak lukaia: diara sut ba ban wina bal takan, apia kaka Gâd mita diara sut paskan ba?
UPLA AILAL WISA: Upla nani ba daiwan nani wina bal takan.
3. Upla nani lukisa yawan urus daiwra nani wina bal takan sa, sakuna baha ba rait sa kaka, ¿dîa muni yawan ba kau sinskira sa ki daiwan nani ba wal?
4. ¿Dîa muni daiwra lupia nani rayaka ba sirpi kabia sin sins lâka tara bri baku iwisa?
UPLA AILAL WISA: Evolución ba kasak sa.
5. Upla kum evolución ba kasak luki ba, ¿witin silp laki kaikan sa ki?
6. Upla manis lukisa, sinskira nani ba evolución kulki ba mita wala nani ba sin nina blikaia sa.
“Luki kaiks, unta tara biara ra man taukisma, ba wina utla painkira tat ni mâkan ba kaikisma. ‘¿Man ba lukma ki baha watla ba ban wina bal takan ba? Dus nani silp kauhi asla taki, bara watla painkira takan ba, ¿kasak sa lukma ki?’. Utla kum sip silp aipaswi takras, upla mita mâkisa, ¿rait apia? Baku sa kaka, ¿dîa muni yawan kasak lukbia universo ra diara sut bâra ba ban wina bal takan ba?” (Julia).
“Nahara luks, upla kum mai wisa kaka imprenta kum (wauhtaya print muni masinka ba) saura taki baiwan, diara ulbi laya sut ba laiwan bara baha wina diccionario kum ban wina silp takan, ¿man baha turka kasak lukma ki?” (Gwen).
¿DÎA MUNI GÂD RA KASAK LUKISNA?
Baibil ba wan sinska pain yus munaia wisa (Roman 12:1). Wibia kaka, dîa kasak lukisma ba naha baman kaia apia sa:
-
KUPIAM LUKANKA WINA: “Yang daira walisna karnika tara bri dukia kum bâra sa, baha mayunaia sna”.
-
UPLA WALA LUKI BA NINA BLIKAIA: “Yang laima uplika nani ba Gâd ra kasak luki ba mita, yang sin kasak lukisna”.
-
UPLA MAI WISA DÎA KASAK LUKMA: “Yang pamaliki ba ai wisa Gâd ra kasak lukaia sna ba”.
Baha sut watlika ra, man dîa kasak lukisma ba kau bapi bri kaia sma.
“Maestro ba wan wîna tara bilara dîa bri ba dukiara tânka marikisa taim, yang ba kau lukisna Gâd ba rait bâra sa. Wan wîna pîska bani ba, sirpi kabia sin wark tara daukisa. Yawan ba nu âpu sa wan wîna tara bilara diara sut ba nahki pain wark dauki ba. ¡Rait diara painkira sa!” (Teresa).
“Utla uptis tara kum, but tara kum, apia kaka truk kum yang kaikisna taim, wîni kat maikabi walisna: ‘¿Naha na ya mita paskan ki?’. Kan upla sinskira kum baman truk paskaia sip sa, kan pîs sirpi ailal brisa bara sut asla pain wark takisa. Baku ba ra, truk kum upla mita paskan sa kaka, yawan na Gâd mita wan paskan kaia sa” (Richard).
“Skul ra ciencias klaska ba ra kau lan taki kapri taim, evolución ba kasak lukras kapri. [...] Gâd ra kasak lukaia ba kau isi sa, kan klir kaikisa ai paskanka ba, sakuna evolución ba sip kasak lukras, kan baha lukanka ba tânka briras sa” (Anthony).
NAHARA LUKS
Científico nani ba evolución tânka ba piu aihwa wina laki kaikisa, bara nahki pali takan lukanka ba sât sât brisa. Witin nani upla sinskira wi ba, sakuna ai lukanka ra asla apia sa, baku bamna evolución ba laki kaiki kasak lukras sma kaka, man saura daukras ¿rait apia?
