Nahara luks: tuktan kum nina Tomas ai pânika nani wal bâl pulisa, bara ai dara walras si muni ai lamara iwi uplika trukka glaska ba baikisa.

Man ba Tomas katma kaka, ¿dîa daukaia kapram?

DIARA YUMHPA NA WINA KUM BRIS:

1. Plapi swakwaia.

2. Upla wala ra pâtka ba kahbaia.

3. Trukka dawanka ba wal aisi dîa sauhkram ba aibapma wima.

Ban kra letra A wahbi sakaia want sma. Sakuna, kau pain sa piu bani mistikkam nani dîa kabia sin dahra sâkma.

1. Baku daukaia pain sa.

   Baibil wisa: “Diara sut mapara yang nani pain tauki kaia want sna bamna” (Hibru Nani 13:18).

2. Man mistik takram ba kupiam param wal wima kaka, upla nani mapara kau isi padin mai munbia.

   Baibil wisa: “Ani uplika ai saurka nani pura biki ba, ai bisniska ba sip yamni takbia apia; sakuna baha nani ai dahra saki si mahka swi ba, saurka swih tikbia” (Sins Lâka 28:13).

3. Tânka tara bri ba sika: Jehova kupia lilia daukma.

   Baibil wisa: “Dawan watawikira nani ra waihla kaikisa, kuna pain nani ra ai kupia aiska kulkisa” (Sins Lâka 3:32).

Karina ba 20 mani brisa, yu kum witin truk uba isti wakan taim polis mita alkan bara lâ krikan mana aibapaia kan, kuna ai aisika ra wiras kan. Karina bila: “Mani kum luan taim aisiki ba nu takan. Polis ai alkan wauhkataya ba witin kaikan. ¡Pât ra dimri!”.

¿Yawan dîa lan takisa? Karina ba tânka marikisa: “Wan mistikka nani yukukisa kaka, trabilka ba kau tara takbia. Kan las kat mistik pâtka ba yawan bribia”.

Baibil wisa: “Yawan sut watawi uya daukisa” (Jems 3:2). Bara yawan kaikan baku, wan mistikka nani isti param sâkbia kaka, bawan lâka bara sins lâka aitani bri ba yawan marikisa.

Nanara man mistikkam nani daukram ba wina lan takaia sma. Tiara kum nina Vera bila: “Yang mistikki nani ba chans kum baku kaikisna baha nani wina lan takaia dukiara. Mistikki kumi bani wina smalkanka kum sakisna, bara hilp ai munisa upla kau pain takaia. Baku ba ra, piu wala yang sim mistikka takamna kaka, tnatka wala ra wapni daukamna”. ¿Man dîa daukma naha trabilka nani brima kaka?

Aisikam ba baisikil lin mai munan, bara man baisikilka ba krikram. ¿Nanara dîa daukma ki?

• Witin ra wimna apia, ban kra tânka ba nu takbia apia.

• Yang dîa daukri sut ba witin ra wimna.

• Upla wala baha pâtka bribia wisi, yang kunin aisamna.

Skul ra iksamin brisma, kuna man stadi munras kapram ba mita saura takram. ¿Nanara dîa daukma?

• Iksamin ba uba karna kan ba mita luras kapri wimna.

• Yang ba iksamin dukiara stadi takras kapri wimna.

• Maestro ba yang maipara bûi ba mita, iksamin luras kapri wimna.

 Nanara 1) man ba aisikam bara 2) maestrokam baku lukma kaka, ¿mistikkam nani ba dukiara witin nani dîa lukbia? Silp mamkabi wals: ¿Witin nani yang dukira dîa lukbia mistikki nani isti param sakamna kaka? ¿Witin nani yang dukira dîa lukbia mistikki nani yukukisna kaka?

Naha manka ra dîa mistikka daukram ba dukiara luki kaiks, bara naha makabi walanka nani laki kaiks:

¿Dîa mistikka takram? ¿Ba wina dîa daukram?

• Yukuki kapri.

• Yang mistikki takri pâtka ba upla wala ra kahbri.

• Isti param saki wîri.

Man mistikkam ba param sakras kapram kaka, ¿ningkara nahki damra walram ki?

• ¡Pain pali! Yang ba swakwi takri.

• Uba saura. Daihra sakaia kapri.

¿Mistikkam ba nahki wapni mangkaia kapram?

¿Baha mistikka ba wina man dîa lan takram?

¿Dîa muni isi apia sa wan mistikka nani dahra sakaia?

Man mistikkam nani piu bani yukukisma kaka, ¿upla ba man dukiamra dîa lukbia? Sakuna, ¿kupiam param mistikkam nani sakisma kaka upla ba dîa lukbia? (Luk 16:10).